Yerlik da'iriler satirash ümid tursun'gha lagérda ormanchiliqtin ders bériliwatqanliqini ilgiri sürdi
2019.12.05
Nöwette türkiyede yashawatqan muhajir islamjan qorghas nahiyesining aqsu yézisigha nopusluq oghli ümid tursun heqqide yéqinda guwahliq bayanati élan qilip, ürümchide satirashliq qiliwatqan bu oghlidin 3 yildin buyan xewer alalmaywatqanliqini élan qilghan we xelq'ara jama'ettin oghlining iz-dériki üchün yardem telep qilghan idi. Muxbirimizning téléfonini qobul qilghan aqsu yézisidiki yerlik da'iriler, satirash ümid tursunning bir yil 11 aydin buyan atalmish terbiyeleshte ikenliki we u yerde ormanchiliq téxnikisini öginiwatqanliqini ilgiri sürdi.
Hörmetlik radi'o anglighuchlar, muhajir islamjan hajining guwahliq bayanatidin melum bolushiche, qorghas nahiyesining aqsu yézisigha nopusluq bolghan ümid tursun, 2015-yili ata-anisi bilen türkiyege kélip bir mezgil turghandin kéyin, yurtigha qaytip ketken we ürümchide esli kespini dawam qilip satirashliq dukini achqan. 2016-Yili türkiyediki ata-anisi bilen normal alaqiliship turuwatqan ümid tursun 2017-yildin kéyin ün-tinsiz ghayib bolghan. Hazirgha qeder éniqlashlirimizdin Uyghur rayonidin türkiyege herqandaq bir seweb bilen bérip kelgenlerning hemmisining dégüdek tutup soraq qilin'ghanliqi we mutleq köpinchisining lagér yaki türmige solan'ghanliqi melum. Qorghasning aqsu, yene bir atilishi dashigür yézisidiki xadimlardin biri ümid tursunning ehwalidin xewersizlikini bayan qildi. Emma bir kent ayallar mudiri, ümid tursunning 1-guruppidiki 8 dosti bilen topliship namaz oqughanliqi üchün, tutqun qilin'ghanliqini ashkarilidi. Ümid tursunning anisi xanimmu tiwittira guwahliq bayanati bérip, oghlining iz-dériki üchün xelq'ara teshkilatlardin yardem sorighanidi.
Aqsu yézisidiki yene kent kadiri ümid tursunning atalmish terbiyeleshke ekétilginige bir yil 11 ay bolghanliqini we qorghas 3-ottura mektepte tesis qilin'ghan “Terbiyelesh mektipi” de ikenlikini melum qildi. Melum bolushiche 3 -ottura mektep qorghas nahiyesining süzüksu. Yene bir atilishi chingsixoza bazirigha jaylashqan bolup, 2017-lagérgha tutqun bashlan'ghanda, shu yézidiki doxturxana bilen birlikte, lagér ornida ishlitilgen. Weziyettin xewerdar kishilerdin bezilirining déyishiche, mezkur mektep we doxturxanidiki tutqunlar kéyinche qorghas nahiyeside mexsus lagérlarning qurulushi pütkendin kéyin, shu yerge yötkiwétilgen. Mezkur xadim, ümid tursun qatarliq tutqunlarni kent kadiri süpitide yoqlap turuwatqanliqi we ularning yaxshi oquwatqanliqini ilgiri sürdi؛ emma u 3-ottura mektepke axirqi qétim barghan waqtining qachan ikenliki we bu mektepning lagér ornida hélihem ishilitiliwatqan-ishlitilmeywatqanliqi heqqide melumat bérelmidi.
Muhajir islamjan haji oghlining usta we xéridarliq bir satirash ikenlikini, özi we a'ilisini qamdighudek iqtisadiy kirimge ige ikenlikini, shunga, oghlining héchqandaq bir kespiy terbiyege éhtiyaji yoqluqini otturigha qoyghanidi. Mezkur kent kadiri, satirash ümid tursun'gha, xitay tili we qanun bilimliridin bashqa, ormanchiliq téxnikisi ögitiliwatqanliqini ilgiri sürdi. Emma u hünerwen ümid tursun'gha qandaq bir zörüriyet bilen ormanchiliqni ögitiwatqanliqi we heqqide izahat bermidi.
Xelq'ara musteqil közetküchiler, atalmish terbiyelesh merkezlirining emeliyette éghir qéyin-qistaq lagéri ikenlikini, u yerde peqet xelq aragha körgezmilik üchünla tolimu az bir waqitta herxil xil kesip ögitiliwatqanliqini ilgiri sürgen. Yéqinda ashkarilan'ghan xitayning lagérlar heqqidiki mexpiy höjjetliridimu, bu jaylarda kesip ögitilidighanliqi heqqide héchnerse déyilmigen؛ peqet éghir derijidiki zorlash métodliri bilen ménge yuyush élip bérilidighanliqi melum bolghan idi.