"үмид юлтузлири" хәлқара уйғур балилар мусабиқисиниң нәтиҗилири йәкүнләнди

Ихтиярий мухбиримиз ферузә
2021-06-09
Share
Қирғизистан уйғурлири Қирғизистан уйғурлириниң "иттипақ" җәмийити уюштуруши билән өткүзүл "ана тил" күнигә беғишланған "уйғур мәдәнийәт фестивали" мурасимидин көрүнүш. 2021-Йили 19- феврал, қирғизистан.
RFA/Féruze

5-Июн күни қирғизистан пайтәхти бишкәк шәһиридә "үмид юлтузлири" мусабиқисиниң нәтиҗилири йәкүнләнди. Мәзкур мусабиқә 2020-йили баһар айлирида дуня уйғур аяллар бирлики тәрипидин тор арқилиқ уюштурулған икән. Мусабиқиниң мәқсити яш әвладниң ана-тил сөйгүсини ашуруш вә кәлгүсидә вәтән рәһбәрлирини тәрбийәләштин ибарәт икән. Мәзкур мусабиқигә түркийә, қазақистан, қирғизистан вә явропа әллиридики уйғур балилар болуп тәхминән 300 бала қатнашқаниди. "үмид юлтузлири" мусабиқисигә уйғур мәдәнийитиниң төт түри көрситилгән болуп, булар: уйғур шеирийити, миллий уссул, рәсим вә испорт.

"үмид юлтузлири" хәлқара уйғур балилар мусабиқиси 2020-йили уюштурулған болсиму, лекин дуняға тарқалған "ковид-19" ағриқи түпәйлидин, мукапат тапшуруш паалийити өткүзүлмәй қалғаниди. Бу йил әһвал сәл оңшилип, аз санда мурасим өткүзүшкә иҗазәт елинип, балиларни тәбрикләп, уларға рәһмәт ейтиш вә риғбәтләндүрүш үчүн совғат тапшуруш мурасими уюштурулди.

"үмид юлтузлири" мусабиқисигә қатнашқан балиларни тәбрикләш вә риғбәтләндүрүш мурасими дуня уйғур аяллар бирликиниң қирғизистандики шөбиси тәрипидин бишкәк шәһириниң "DI-2" ашханисида уюштурулди. Мурасимға қирғизистан уйғурлири "иттипақ" җәмийитиниң рәиси әсқәр қасимоф, "иттипақ" гезитиниң муһәррирлири, "бирлик" топиниң әзалири, "үмид юлтузлири" мусабиқисиниң қатнашқучилири вә уларниң ата-анилири болуп оттузға йеқин адәм қатнашти. Қирғизистан уйғур аяллар бирлики тәрипидин мусабиқә қатнашқучилириға медал вә совғатлар тапшурулди. Қирғизистандики "бирлик" топиниң шөбә рәиси чәшмә мухтарова ханим, мурасим давамида, балиларни тәбрикләп, қатнашқучиларға өз миннәтдарлиқини билдүрди.

Қирғизистанлиқ балилар "үмид юлтузлири" мусабиқисиниң һәр бир түригә тиришчанлиқ билән иштирак қилип мәзкур хәлқара мусабиқидә қирғизистан уйғур җамаитигә вәкил болушти. Фәзийә қасимова рәсим түридә, лейла қасимова вә гүзәл мәнһикова-миллий уссул түридә иштирак қилишти. Қара балта шәһиридин яш қиз сәбина мусабиқиниң икки түригә иштирак қилди. Алимҗан йүнүс розиматоф испорт түригә қатнишип "хәлқ таллаш мукапати" ға еришти.

Қирғизистандики "бирлик" топиниң актип әзаси нилүфәр хашимова ханим мукапат тапшуруш мурасимида нутуқ сөзләп, яш әвладларни вәтәнпәрвәрлик роһида тәрбийәләп келиватқан ата-аниларға өз рәһмитини билдүрди.

Мурасим давамида "үмид юлтузлири" мусабиқисиниң яш сәнәткарлири йәнә бир қетим өзлириниң маһарәтлирини орундап, тәшкиллигүчиләрни хушал қилип, уларниң қизғин алқишлириға еришишти.

"хәлқ таллаш мукапати" ға еришкән алимҗан юнусниң момиси гүлнара ғәзийева ханим, зияритимизни қобул қилип нәврисиниң бу типтики мусабиқиләргә келәчәктә хушаллиқ билән қатнишидиғанлиқини билдүрди.

Қирғизистан уйғурларниң тарихий вәтини билән қошна болғачқа, бу дөләт қазақистандин қалса, әң көп уйғур аһалиси яшайдиған мәмликәт. Лекин қирғизистандики уйғур балилар ана тил тәрәптин қаттиқ қийнилиду. Улар асасән рус тиллиқ мәктәпләрдә, бирқисми қирғиз тилидики мәктәпләрдә оқуйду. Мәзкур паалийәт давамида қирғизистан уйғурлири "иттипақ" җәмийитиниң рәиси әсқәр қасимоф нутуқ сөзләп, балиларни тәрбийәләштә аялларниң ролиға алаһидә әһмийәт бәрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт