"Ümid yultuzliri" xelq'ara Uyghur balilar musabiqisining netijiliri yekünlendi

Ixtiyariy muxbirimiz féruze
2021-06-09
Share
Qirghizistan Uyghurliri Qirghizistan Uyghurlirining "Ittipaq" jem'iyiti uyushturushi bilen ötküzül "Ana til" künige béghishlan'ghan "Uyghur medeniyet féstiwali" murasimidin körünüsh. 2021-Yili 19- féwral, qirghizistan.
RFA/Féruze

5-Iyun küni qirghizistan paytexti bishkek shehiride "Ümid yultuzliri" musabiqisining netijiliri yekünlendi. Mezkur musabiqe 2020-yili bahar aylirida dunya Uyghur ayallar birliki teripidin tor arqiliq uyushturulghan iken. Musabiqining meqsiti yash ewladning ana-til söygüsini ashurush we kelgüside weten rehberlirini terbiyeleshtin ibaret iken. Mezkur musabiqige türkiye, qazaqistan, qirghizistan we yawropa elliridiki Uyghur balilar bolup texminen 300 bala qatnashqanidi. "Ümid yultuzliri" musabiqisige Uyghur medeniyitining töt türi körsitilgen bolup, bular: Uyghur shé'iriyiti, milliy ussul, resim we isport.

"Ümid yultuzliri" xelq'ara Uyghur balilar musabiqisi 2020-yili uyushturulghan bolsimu, lékin dunyagha tarqalghan "Kowid-19" aghriqi tüpeylidin, mukapat tapshurush pa'aliyiti ötküzülmey qalghanidi. Bu yil ehwal sel ongshilip, az sanda murasim ötküzüshke ijazet élinip, balilarni tebriklep, ulargha rehmet éytish we righbetlendürüsh üchün sowghat tapshurush murasimi uyushturuldi.

"Ümid yultuzliri" musabiqisige qatnashqan balilarni tebriklesh we righbetlendürüsh murasimi dunya Uyghur ayallar birlikining qirghizistandiki shöbisi teripidin bishkek shehirining "DI-2" ashxanisida uyushturuldi. Murasimgha qirghizistan Uyghurliri "Ittipaq" jem'iyitining re'isi esqer qasimof, "Ittipaq" gézitining muherrirliri, "Birlik" topining ezaliri, "Ümid yultuzliri" musabiqisining qatnashquchiliri we ularning ata-aniliri bolup ottuzgha yéqin adem qatnashti. Qirghizistan Uyghur ayallar birliki teripidin musabiqe qatnashquchilirigha médal we sowghatlar tapshuruldi. Qirghizistandiki "Birlik" topining shöbe re'isi cheshme muxtarowa xanim, murasim dawamida, balilarni tebriklep, qatnashquchilargha öz minnetdarliqini bildürdi.

Qirghizistanliq balilar "Ümid yultuzliri" musabiqisining her bir türige tirishchanliq bilen ishtirak qilip mezkur xelq'ara musabiqide qirghizistan Uyghur jama'itige wekil bolushti. Feziye qasimowa resim türide, léyla qasimowa we güzel menhikowa-milliy ussul türide ishtirak qilishti. Qara balta shehiridin yash qiz sebina musabiqining ikki türige ishtirak qildi. Alimjan yünüs rozimatof isport türige qatniship "Xelq tallash mukapati" gha érishti.

Qirghizistandiki "Birlik" topining aktip ezasi nilüfer xashimowa xanim mukapat tapshurush murasimida nutuq sözlep, yash ewladlarni wetenperwerlik rohida terbiyelep kéliwatqan ata-anilargha öz rehmitini bildürdi.

Murasim dawamida "Ümid yultuzliri" musabiqisining yash sen'etkarliri yene bir qétim özlirining maharetlirini orundap, teshkilligüchilerni xushal qilip, ularning qizghin alqishlirigha érishishti.

"Xelq tallash mukapati" gha érishken alimjan yunusning momisi gülnara gheziyéwa xanim, ziyaritimizni qobul qilip newrisining bu tiptiki musabiqilerge kélechekte xushalliq bilen qatnishidighanliqini bildürdi.

Qirghizistan Uyghurlarning tarixiy wetini bilen qoshna bolghachqa, bu dölet qazaqistandin qalsa, eng köp Uyghur ahalisi yashaydighan memliket. Lékin qirghizistandiki Uyghur balilar ana til tereptin qattiq qiynilidu. Ular asasen rus tilliq mekteplerde, birqismi qirghiz tilidiki mekteplerde oquydu. Mezkur pa'aliyet dawamida qirghizistan Uyghurliri "Ittipaq" jem'iyitining re'isi esqer qasimof nutuq sözlep, balilarni terbiyeleshte ayallarning roligha alahide ehmiyet berdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet