Ürümchidiki ottura mektep xadimliri yenila torda ders ötülidighanliqini bildürdi

Muxbirimiz méhriban
2020-09-09
Share
mejburiy-emgek-maska-tikish-1.jpg Ishchilar ürümchidiki dawalash üsküniliri zawutida qoghdash kiyimi tikiwatqan körünüsh. 2020-Yili 27-yanwar, ürümchi.
REUTERS

9-Ay kirishi bilen xitayning "Tengritagh tori", "Shinjang géziti", "Shinjang téléwiziyesi", "Xelq géziti" qatarliq hökümet taratqulirida 1-séntebirdin bashlap, Uyghur aptonom rayonda tajsiman wirustin yuqumlinishning 0 pirsentke ke chüshkenliki, ahalilerge qaritilghan karantinning bikar qilin'ghanliqi, normal xizmet we oqushning eslige kelgenliki heqqidiki xewerler bérilishke bashlighan idi.

"Tengritagh tori" ning 3-séntebirdiki xewerliride Uyghur aptonom rayonluq ma'arip nazaritining 6-séntebir küni rayondiki ottura-bashlan'ghuch mekteplerde ders bashlinidighanliqi, 10-séntebir küni aliy mekteplerde ders bashlinidighanliqi heqqidiki uqturushi élan qilindi.

7-Séntebir küni "Tengritagh tori" ning xitayche sanida "6-Séntebir küni shinjangning herqaysi jaylardiki ottura mekteplerde oqughuchilar mekteplerge kélip, ders bashlidi" serlewhelik tepsiliy xewer bérildi. Xewerde qumul sheherlik 2-ottura mektep, korla tejribe ottura mektep, ürümchi dawanching rayonidiki 40-ottura mektep, fukang 2-ottura mektep qatarliq mekteplerde oqughuchilarning qizitmisini ölchesh, ulargha maska, dézinféksiye suyuqluqi qatarliqlarni tarqitish, öz-ara ariliq saqlash qatarliq tedbirler yolgha qoyulup, 6-séntebir küni resmiy ders bashlan'ghanliqi xewer qilindi.

Emma radiyomiz Uyghur bölümining ürümchidiki bir qisim ottura mekteplerge téléfon qilip ehwal igilishiche, ürümchidiki mekteplerde küzlük oqush mewsumide oqughuchilarning yenila torda ders anglawatqanliqi melum boldi.

Ürümchi saybagh rayonigha qarashliq shinjang pédagogika uniwérsitéti shöbe ottura mektipi oqutush bölümidiki bir xadim téléfonimizni qobul qildi.

Biz bu xadimdin "Düshenbe küni bashlan'ghan ders tor arqiliq ötülemdu yaki mektep rayonida ötülemdu?" dep soriduq.

Bu xadim so'alimizgha jawab bérip, oqughuchilarning yenila téléfondiki ayrim uqturushni saqlishi kéreklikini bildürdi.

Biz uningdin ma'arip nazaritining mekteplerde 6-séntebir oqush bashlinidighanliqi heqqide uqturushning mezkur mektepte ijra qilinish ehwalini soriduq.

U uqturushta gerche 6-séntebir ders bashlinidighanliqi élan qilin'ghan bolsimu, emma mekteplerde ayrim orunlashturush barliqini éytti. Uning bildürüshiche, ulargha awwal toluq ottura mekteplerde, andin toluqsiz ottura we bashlan'ghuch mekteplerde tedrijiy halda normal oqutushni eslige keltürüsh uqturulghan iken.

Uning bildürüshiche, meyli toluqsiz ottura mektep oqughuchiliri bolsun yaki toluq ottura mektep oqughuchiliri bolsun, oqughuchilarning mektep rayonigha kélip ders bashlishi üchün yenila ma'arip nazaritining ayrim uqturushini saqlashi kérek iken.

Biz yene ürümchi yéngi sheher rayonigha qarashliq tömüryol idarisidiki 8-ottura mektepke téléfon qilip, "Bu mewsumluq oqutush torda élip bérilamdu yaki mektep rayonidimu?" dep soriduq.

Mektep oqughuchilar bölümidin téléfonimizni alghan xadim awwal qaysi yilliqning oqush ehwalini bilmekchi ikenlikimizni soridi. Andin u toluq ottura mektep oqughuchiliri bilen toluqsiz ottura mektep oqughuchilirining ders orunlashturulushida perq barliqini bildürdi.

U yene herqaysi yilliqlarning qachan oqush bashlaydighanliqi heqqidiki tepsiliy ehwallarni mektep oqutush bashqarmisidin igileshni bildürüp, mes'ul xadimning téléfon nomurini éytip berdi.

So'allirimizgha jawab bergen oqutush bashqarmisining bir xadimi yéngi mewsumluq oqush orunlashturushining yenila torda élip bérilidighanliqini bildürdi. U 6-séntebirdin bashlap bu mektepte tor arqiliq ders ötüsh meshghulatining élip bériliwatqanliqini éytti.

Xitay hökümet taratqulirida gerche ürümchide karantin tedbirliri emeldin qaldurulup, normal xizmet we oqush eslige keltürülgenliki heqqidiki xewerler bérilgen bolsimu, emma ijtima'iy taratqularda ürümchi tengrtagh rayonidiki Uyghurlar olturaqlashqan bezi a'ililikler rayonlirining téxiche échiwétilmigenliki, tengritagh rayonidiki mekteplerning bu mewsumluq oqushi heqqide éniq melumat yoqluqi ilgiri sürülgen idi.

Biz téximu ilgirilep ehwal igilesh üchün tengritagh rayonidiki Uyghurlar olturaqlashqan birqanche ahaliler rayonigha, tengritagh rayonidiki ottura mekteplerdin ürümchi tejribe ottura mektipige we ürümchi toluq ottura mektep, yeni burunqi 14-ottura mektepke téléfon qilduq. Emma bu rayondiki meyli sheher ahaliliri bolsun yaki mekteplerning téléfoni bolsun ulanmidi yaki aptomatik jawab bérish üskinisidin kelgen jawapqila érishtuq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.