"Usta ashpez" musabiqiside Uyghurlarning éghir weziyiti tilgha élindi

Ixtiyariy muxbirimiz erkin tarim
2021-07-13
Share
(Soldin onggha) türkiyelik dangliq ashpez somer siwri'oghlu, mehmet yalchinqaya ependi we tonulghan italiyelik ashpez danilo zanna ependi. 2021-Yili 12-iyul. "Usta ashpez" programmisidin süretke élin'ghan.
RFA/Erkin Tarim

Uyghur mesilisining xelq'aralishishigha egiship, dangliq siyasiyonlar, yazghuchilar, sha'irlar, sen'etchiler, ressamlar arqa-arqidin her xil yollar bilen bayanatlar élan qilip, xitayning Uyghurlargha qarita élip bériwatqan bésim siyasitini eyiblesh bilen birlikte Uyghurlarning heqqaniy dewasini qollaydighanliqini jakarlimaqta. Yéqinda türkiyede eng köp körürmini bar téléwiziye programmiliridin "Usta ashpez" namliq tamaq étish musabiqisining riyasetchisi dangliq usta ashpez, köp sandiki dangliq ashxanining xojayini somer siwri'oghlu Uyghurlarning heqliq dewasini qollaydighanliqini bildürdi.

12-Iyul küni axsham neq meydandin tarqitilghan programmida burju önal isimlik ashpez ayal musabiqige Uyghurlarning kawa mantisi bilen qatnashqan bolup, u, tamaq bahalighuchilarning yaxshi bahasigha ériship, achquchluq musabiqige qatnishish heqqige érishti.

Burju önal xanim bir qanche milletning tamiqini birleshtürüp etken tamaqqa Uyghurlarning kawa mantisini qoyghanliqini, kawa mantisini yaxshi köridighanliqini bayan qilip mundaq dédi: "Bu tamaqqa mantinimu qoydum. Bu, Uyghur mantisi, ichide hesel kawisi bar, Uyghurlarning hékayisini otturigha qoyay dédim".

Uyghurlarning kawa mantisi bilen musabiqige qatnashqan burju önal xanim. 2021-Yili 12-iyul.
Uyghurlarning kawa mantisi bilen musabiqige qatnashqan burju önal xanim. 2021-Yili 12-iyul. "Usta ashpez" programmisidin süretke élin'ghan.

Arqidin mezkur programma riyasetchisi, tamaqning temini tétip bahalash hey'iti ezasi somer siwri'oghlu Uyghurlarni tilgha élip mundaq dédi: "He'e, shundaq Uyghur türkliri rastinila uzun yillardin buyan japaliq küresh élip bériwatidu. Uyghur türklirige salam we éhtiramimni bildürimen, Uyghur rayonining tinchliq we rahetlikke érishishini ümid qilimen".

"Usta ashpez "Programmisining bahalash hey'et ezasi mehmet yalchinqaya ependimu somer siwri'oghluning dégenlirini testiqlap mundaq dédi: "Rastinila Uyghurlar uzun zamandin buyan küresh qiliwatidu ".

"Mastér chéf türkéy" yeni "Türkiye usta ashpizi "Namliq ashpezlik musabiqisi tunji qétim en'gliyede bashlan'ghan bolup, hazir dunyadiki 18 dölette bar iken. Türkiyege 2011-yilida kirgen bolup 2018-yilidin tartip "Qanal-8" téléwiziyeside neq meydandin tarqitilmaqta. Bu, türkiyede eng köp körürmini bar musabiqe bolup, mezkur programmigha dunyada tonulghan italiyelik ashpez danilo zanna, türkiyelik dangliq ashpez somer siwri'oghlu bilen memet yalchinqaya ependi riyasetchilik qilmaqta.

Türkiyede eng köp kishi, bolupmu yashlar qiziqip köridighan bundaq bir téléwiziye programmisida Uyghur mesilisining tilgha élinishini qandaq chüshinishimiz kérek? bu heqte ziyaritimizni qobul qilghan sherqiy türkistan teshkilatlar birliki re'isi hidayetulla oghuzxan ependi buning sherqiy türkistan dewasining türkiyede zorayghanliqining ipadisi ikenlikini otturigha qoyidu.

Qahraman marashtiki sütchü imam uniwérsitéti diniy ilimler fakultétining magistir aspiranti iparxan Uyghur xanim bu xil t w programmilirini on milyonlighan ademning köridighanliqini, buningda Uyghur mantisining körsitilishi we Uyghurlarning tilgha élinishining Uyghur medeniyiti bilen Uyghurlarning hazirqi éghir weziyitining tonulushi ikenlikini bayan qildi.

"Usta ashpez "Tamaq étish musabiqisining mestaniliridin türkiye döletlik radiyo-téléwiziye idarisi muxbiri mirkamil qeshqerli ependi, bu musabiqide somer siwri'oghluning Uyghur dewasini tilgha élishining ehmiyitining tesewwur qilghili bolmaydighan derijide zor ikenlikini otturigha qoydi.

Uyghurlar bay tamaq medeniyitige ige bir millet bolsimu tamaqliri dunyada dégendek bilinmeydu. Bularni dunyagha tonutush üchün némilerni qilish kérek? kastamonu uniwérsitéti magistir aspiranti subinur nuri xanim bu heqte köz qarishini biz bilen ortaqlashti.

Bu musabiqide kawa mantisi teyyarlap achquchluq musabiqige tallan'ghan burju önal xanim bu yil 35 yashqa kirgen bolup, 13 yéshidin tartip tamaq étishke qiziqidiken. U eslide türkiyening diyarbaqir shehiride tughulghan bolup, istanbulda chong bolghan. Burju önal xanim yapon tamiqi bilen shughullinidighan bolup, asiya döletliri tamaqliri bilen türk tamaqlirini birleshtürüp, yéngi tamaq türliri ijat qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet