Amérika awam palatasi Uyghurlarning mejburiy emgikini ayaghlashturush yolida yene bir qanun layihesi maqullidi

Muxbirimiz irade
2020-10-05
Share
jennifer-wexton-jennifer-wekiston.jpg "Uyghur mejburiy emgikini ashkarilash qanun layihisi" teyyarlighan, amérika awam palatasining démokratlar partiyesige tewe ezasi jénnifér wekiston(Jennifer Wexton) xanim tor yighinida bashqilargha salam bermekte. 2020-Yili séntebir.
Social Media

Xitay hökümitining Uyghurlarni keng kölemde tutqun qilghandin sirt, ularni yene mejburiy qul emgekchilerge aylanduruwatqanliqi amérika hökümiti qattiq diqqet qiliwatqan mesililerning biri. Amérika hökümiti Uyghur mejburiy emgikini cheklesh we Uyghur mejburiy emgiki asasida ishlen'gen mehsulatlarning bilip-bilmey amérika bazirigha kirishining aldini élish üchün toxtimay tedbir qollanmaqta. Amérika dölet mejlisining her ikki partiyedin bolghan ezalirining bu mesilige yüksek ehmiyet bériwatqanliqi melum. 30-Séntebir küni amérika awam palatasida maqullan'ghan "Uyghur mejburiy emgikini ashkarilash qanun layihesi" ene shuning jümlisidindur.

Awam palatada 163 ge qarshi 253 awaz bilen maqulluqtin ötken bu qanun layihesini amérika awam palatasining démokratlar partiyesige tewe ezasi jénnifér wekiston xanim teyyarlighan bolup, u amérikada Uyghurlar eng köp olturaqlashqan wirginiye shtatining dölet mejlisidiki wekilidur. U charshenbe küni dölet mejliside qanun layihesi awazgha qoyulushtin awwalqi munazire qismida layihe heqqide chüshenche bérip mundaq dédi: "Men bu qanun layihesini Uyghurlar üchün otturigha qoydum. Buning men bilen yaki saylam bilen alaqisi yoq. Men awam palatagha saylinip kirishtin awalla wirginiye shtatidiki Uyghur jama'iti bilen körüshken. Méning wekillikimdiki u rayon Uyghur jama'iti eng köp olturaqlashqan jay. Ular manga özlirining lagérlargha tutqun qilin'ghan uruq-tughqanliri heqqide nurghun qorqunchluq nersilerni éytip bergen".

U sözi dawamida Uyghur élide yüz bériwatqanlarni köp qétim "Insaniyetke qarshi jinayet we irqiy qirghinchiliq" dep atidi. Shunga u amérika dölet mejlisi ezalirining meyli qaysi partiyedin bolushidin qet'iynezer Uyghurlarning mejburiy emgekke sélinishigha a'it bu qanun layihesini qollishi kéreklikini tekitlidi. U yene mundaq dédi: "Amérika dölet mejliside Uyghurlarning ékspilatatsiye qilinishigha qarshi turushtin ibaret ortaq ang mewjut. Amérikaliqlar mejburiy qul emgikidin yasalghan nersilerni sétiwélishni xalimaydu. . . Biz bu qanun arqiliq mejburiy emgekke qarshi turalaymiz, irqiy qirghinchiliqqa qarshi turalaymiz. Biz 'Uyghur mejburiy emgikini ashkarilash qanun layihesi'ni maqullash arqiliq Uyghurlarning dini erkinlikini qolgha keltürüsh üchün heriket qilghan bolimiz".

Téxi aldinqi hepte amérika awam palatasida "Uyghur mejburiy emgikini cheklesh qanuni" namliq bir qanun layihesi 3 ke qarshi 406 awaz bilen testiqlan'ghanidi. Bu qétimqisi amérika awam palatasida Uyghur mejburiy emgikini chekleshke munasiwetlik awazgha qoyulghan ikkinchi qanun layihesi bolup hésablinidu.

Melum bolushiche, bu qanun maqullinip ishqa kirishken teqdirde amérikada tizimgha aldurghan herqandaq shirket öz mehsulatlirida ishlitilgen matériyallarning kélish menbesini ashkarilashqa, teminlesh zenjirliride mejburiy emgekning bar-yoqluqini tekshürüp qerellik halda doklat qilip turushqa mejbur bolidiken.

Amérikadiki Uyghur kishilik hoquq qurulushi bashliqi ömer qanatning éytishiche, bu qanun yene, amérika shirketlirini pay chek baziridiki xitay shirketlirige meblegh sélishtin burun ularning mejburiy emgek bilen bolghan munasiwitini tekshürüshke mejburlaydiken.

Shunga ömer qanat ependi 'Uyghur mejburiy emgikini cheklesh qanuni' we 'Uyghur mejburiy emgikini ashkarilash qanuni'din ibaret ikki qanun layihesining emeliyette bir-birini toluqlash xaraktérige ige ikenlikini éytti.

Aldinqi hepte maqullan'ghan "Uyghur mejburiy emgikini cheklesh qanuni" layihesi boyiche amérika shirketlirining xitaydiki mejburiy emgekke chétishliq shirketler bilen soda qilishi we paxta mehsulatlirini kirgüzüshi cheklen'genidi. Amérika jumhuriyetchiler partiyesidin bolghan bir qisim wekiller démokrat wekiller otturigha qoyghan bu qanun layihesining amérikadiki erkin tijaret prinsipliri boyiche alghanda shirketler üstidiki nazaretni kücheytip, amérika shirketlirining pay bazirida ziyan tartishigha seweb bolidighanliqini munazire qilghan. Biraq démokrat wekiller mushundaq qilmighanda mejburiy emgekni toxtatqili we herqandaq shirketning mejburiy emgektin payda élishini ünümlük halda tosighili bolmaydighanliqini éytqan. Biraq, ikki terep arisida bolun'ghan munazirilerge qarimay, qanun layihesi yenila 26 neper jumhuriyetchi ezaningmu qollishi bilen oxshashla awazdin ötti.

Shu küni qanun layihesi amérika awam palatadin ongushluq ötkendin kéyin nurghun démokrat mejlis ezaliri tiwittirdiki inkaslirida bu qanun layihesining awam palatadin ötkenlikini we özlirining Uyghurlar uchrawatqan mejburiy emgekni toxtitish yolida bir qedem basqanliqini tebriklep inkas yézishti. Jénnifir wekiston, met kartrayt, jéf fortinbérriy qatarliq mejlis ezaliri tiwittir uchurlirida birdek "Uyghur mejburiy emgikidin paydiliniwatqan xitay hökümiti we shirketler choqum jawabkarliqqa tartilishi kérek" dep tekitlidi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.