Уйғур акадимийәси 2022-йиллиқ хизмәт пилани йиғини өткүзди

Ихтиярий мухбиримиз азиғ
2022.01.24
Share on WhatsApp
Share on WhatsApp
Уйғур акадимийәси 2022-йиллиқ хизмәт пилани йиғини өткүзди Мәркизи истанбулдики уйғур академийәси өткүзгән 2022-йиллиқ язлиқ пилан йиғинидин көрүнүш. 2022-Йили 21-январ, түркийә.
RFA/Azigh

21-январ күни мәркизи истанбулдики уйғур академийәси тор арқилиқ 2022-йиллиқ хизмәт пилани йиғини өткүзди. Йиғинға уйғур акадимийәсиниң хадимлири вә уйғур акадимийәсиниң ичидә хизмәт қиливатқан уйғур зиялийлиридин башқа, яшлар вәкиллири вә җамаәт әрбаблириму қатнишип пикир билдүрди.

Йиғинда уйғур акадимийәсиниң 2021-йиллиқ хизмәтлирини хуласиләш, бу һәқтә тәпсилий бир доклат тәйярлап чиқиш қарар қилинди. Униңдин башқа йәнә уйғур акадимийәсиниң 2022-йиллиқ хизмәт пилани тоғрисида чүшкән тәклип-пикирләр мулаһизә қилинди.

Йиғинда илмий тәтқиқат вә тәрҗимә ишлири

Паалийәтлирини раваҗландуруш, шәхс, дөләт органлири, сиясий партийәләр, иҗтимаий тәшкилат вә ширкәтләргә қарита лобийчилиқ һәркәтлирини қанат яйдуруш һәмдә яшларни тәрбийәләш хизмәтлирини чиң тутуп ишләш қатарлиқ мәзмунларда конкирет хизмәт пиланлири оттуриға қоюлди.

Уйғур акадимийәсиниң муавин рәиси абдулһәмид қарахан әпәнди бу һәқтә зияритимизни қубул қилип, уйғур акадимийәсиниң уйғур дәвасини аңлитиш вә уйғур яшлирини тәрбийәләш җәһәттики конкирет хизмәт пиланлирини баян қилип өтти.

Йиғинда йәнә уйғур аяллири мәсилисиму муһим тимиларниң бири сүпитидә оттуриға қоюлди. Уйғур аяллириниң иҗтимаий вә сиясий хизмәтләргә қатнишишини күчәйтиш, уйғур акадимийәсиниң муһим хизмәтлириниң бири сүпитидә муһакимә қилинди.

Уйғур акадимийәсиниң муавин рәиси доктор мәғпирәт камал ханим зияритимизни қубул қилип, хәлқимизниң бешиға кәлгән күлпәттә әң чоң бәдәл төләватқанларниң йәнила уйғур аяллири икәнликини, чәт әлләрдики күрәштә хәтәрдин қоруқмай хитайниң җинайәтлирини паш қиливатқан лагер шаһитлириниң көпинчисиниң йәнила уйғур аяллири икәнликини, йетишкән уйғур аяллириниң үлгә болуп, уйғур мәсилисидә түрткилик рол ойнаватқанлиқини ейтти.

Мәғпирәт камал ханим йәнә уйғур аяллирини күчләндүрүшниң уйғур җәмийити вә уйғурларниң сиясий келәчики үчүн ентайин муһим икәнликини тәкитләп мундақ деди: “уйғур аяллириниң иҗтимаий вә сиясий хизмәтләргә қатнишишини күчәйтиш уларни буниңға риғбәтләндүрүш вә бу сәпкә қатнишишқа чақириш интайин муһим. Чәт әлдики уйғур ханим-қизлар йолуқуватқан қийинчилиқларму аз әмәс, ентайин иғир. Уйғур аяллири алди билән уйғур әрлири тәрипидин қәдирлиниши керәк. Уларға көрситидиған яхши муамилиниң милләтниң кәлгүси үчүн мутләқ әһмийәткә игә икәнликини тонуп йитиш керәк.”

Уйғур акадимийәсиниң баш катипи, қибрис 15-ноябир университетиниң оқутқучиси профессор шәвкәт насири әпәндиму зияритимизни қубул қилип, уйғур мәсилисини аңлитишта тәшвиқатниң муһимлиқини тәкитлиди вә уйғур акадимийәсиниң тәшвиқат пиланлири һәққидә тохталди.

Хитайниң уйғур елидики қирғинчилиқ сиясәтлири давамлишиватқан бүгүнкидәк вәзийәттә, уйғур давасиниң хәлқаралиқ сиясий бир мәсилигә айлинишида уйғур тәшкилатлири интайин муһим рол ойнап кәтмәктә. Көзәткүчиләр кәспийлики күчлүк уйғур тәшкилатлириниң уйғур сиясий вәзийитини бәлгиләштә һалқилиқ рол ойнайдиғанлиқини тәкитлимәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.