Uyghur akadémiyesi özining yéngi xizmet dewrini bashlidi

Ixtiyariy muxbirimiz erkin tarim
2021.06.21
Share on WhatsApp
Share on WhatsApp
Uyghur akadémiyesi özining yéngi xizmet dewrini bashlidi Uyghur akadémiyesi wexpisining re'isi doktor perhat qurban tengritaghli(solda) bilen kéngesh hey'et ezasi prof. Dr. Alimjan inayet ependi. 2021-Yili 19-iyun, türkiye.
RFA/Erkin Tarim

Uyghur akadémiyesi 19-iyun küni istanbulda chaqirghan 5-nöwetlik omumiy yighinida, Uyghur akadémiyesining özgertip qurup chiqilip, buningdin kéyin “Uyghur akadémiyesi wexpisi” namida pa'aliyet qilidighanliqini jakarlidi. Bu qétim yene Uyghur akadémiyesi wexpisining yéngi rehberlikimu saylap chiqilghan.

Türkiye we sherqiy türkistanning istiqlal marshi bilen bashlan'ghan yighinda aldi bilen Uyghur akadémiyesining re'isi, izmirdiki ege uniwérsitéti proféssori alimjan inayet ependi Uyghur akadémiyesining 2018-yilidin buyanqi 3 yilliq xizmitidin doklat berdi. U, doklatida 3 yil jeryanida qolgha keltürülgen netijiler we yétersizlikler toghrisida toxtaldi.

Alimjan inayet ependi yighinda Uyghur akadémiyesi bashqurush hey'iti ezalirining 2020-yilining axirida, Uyghur akadémiyesining xizmet da'irisini kéngeytish meqsiti bilen akadémiyeni wexpige aylandurushni qarar qilip, munasiwetlik resmiyetlerni béjirip, 2021-yili 5-ayning 9-küni resmiy testiqlashqa érishkenlikini bildürdi.

Arqidin yighinning kün tertipige bina'en Uyghur akadémiyesi wexpisining yéngi rehberlik hey'iti démokratik yollar bilen saylap chiqildi. Saylamda, 2018-yilidin 2021-yilighiche Uyghur akadémiyesining bash katipiliq wezipisini ötigen doktor perhat qurban tengritaghli ependi Uyghur akadémiyesi wexpisining tunji qétimliq re'islikige, alimjan inayet ependi bolsa 11 kishilik kéngesh hey'itining re'islikige saylandi.

Uyghur akadémiyesining 5-nöwetlik omumiy yighinidin körünüsh. 2021-Yili 19-iyun, türkiye.

Uyghur akadémiyesi wexpisining kéngesh hey'iti re'islikige saylan'ghan alimjan inayet ependi mezkur wexpini qurushtiki meqsiti heqqide toxtaldi.

Uyghur akadémiyesi wexpisining mu'awin re'isi abdulxemit qaraxan ependi mezkur wexpining Uyghur akadémiyesining xizmetlirini dawamlashturidighanliqini, ezaliriningmu özgermeydighanliqini bayan qildi.

Uyghur akadémiyesi 2009-yili 9-ayning 9-küni türkiyediki 9 Uyghur ziyaliysi teripidin qurulghan bolup, 12 yilgha yéqin waqit ichide nurghun xizmetlerni qilghan. Alimjan inayet ependi bu heqte toxtaldi.

Uyghur akadémiyesi wexpisining re'isi perhat qurban tengritaghli ependi ziyaritimizni qobul qilip, yoshurun bélet tashlash arqiliq özining re'islikke saylan'ghanliqini, özini bu wezipige layiq körgen ziyaliylargha rehmet étidighanliqini, tiriship ishlep Uyghur xelqining özidin kütken ümidini yerde qoymaydighanliqini éytti.

Uyghur akadémiyesi wexpisining 11 kishidin terkib tapqan kéngesh hey'itining ezaliridin abdulxemit qaraxan bilen doktor meghpiret kamal xanim mu'awin re'islikke, doktor shewket nasir ependi bash katipliqqa, doktor burhan ulughyol ependi maliye ishliri mudirliqigha, doktor rahile qeshqerli xanim bilen doktor aliy exmetbeyoghlu ependi bashqurush hey'iti ezaliqigha saylandi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.