Уйғур академийәси "шәрқий түркистан миллий күришиниң йеңи йүзлиниши вә қилишқа тегишлик зөрүр хизмәтләр" намлиқ йиғин өткүзди

Ихтиярий мухбиримиз арслан
2021-09-20
Share
Уйғур академийәси Уйғур академийәсиниң уюштуруши билән ечилған "шәрқий түркистан миллий күришиниң йеңи йүзлиниши вә қилишқа тегишлик зөрүр хизмәтләр" темисидики йиғинда уйғур академийисиниң рәиси доктор пәрһат қурбан тәңритағли сөзлимәктә. 2021-Йили 18-сентәбир, түркийә.
RFA/Arslan

18‏-Сентәбир шәнбә күни мәркизи истанбулға җайлашқан уйғур академийәсиниң уюштуруши билән "шәрқий түркистан миллий күришиниң йеңи йүзлиниши вә қилишқа тегишлик зөрүр хизмәтләр" дегән темидамәхсус йиғин ечилди.

Йиғинға түркийәниң һәр қайси җайлирида хизмәт қиливатқан уйғур зиялийлар, илмий тәтқиқатчилар вә уйғур тәшкилатларниң рәһбәрлири болуп, 35 киши қатнашти.

Уйғур академийәсиниң уюштуруши билән ечилған
Уйғур академийәсиниң уюштуруши билән ечилған "шәрқий түркистан миллий күришиниң йеңи йүзлиниши вә қилишқа тегишлик зөрүр хизмәтләр" темисидики йиғиндин көрүнүш. 2021-Йили 18-сентәбир, түркийә.

Йиғин түркийә вә шәрқий түркистанниң истиқлал марши оқуш билән башланди. Йиғинда алди билән уйғур академийәсиниң рәиси доктур пәрһат қурбан тәңритағли ечилиш сөзи қилди. У сөзидә охшимиған бир пикир-қарашларға һөрмәт қилиш, охшаш болған ноқтиларда бирлик һасил қилишни оттуриға қоюп мундақ деди: "биз үчүн һазир муһим болғини аримиздики ортақ ноқтиларни қезип чиқирип бирлик һасил қилиштур. Хәлқимиз еғир дәриҗидә һуҗумға учраватиду, шуниң үчүн биз охшимиған пикир вә идеологийәлик қарашларни бир тәрәпкә қайрип қоюп, ортақ ноқтилиримизда бир йәр җәм болсақ, күч бирлики оттуриға чиқиши мумкин дәп қараймән."

Шуниңдин кейин йиғинға қатнашқучилар икки гурупиға айрилип, хитайниң җаза лагерлирини тақатқузуш, уйғурларға қаратқан мәдәнийәт вә ирқий қирғинчилиқини тохтитиш һәққидә муһакимә вә музакирә елип барди.

Йиғинда йәнә муһаҗирәттики уйғурларниң миллий аң вә мәсулийәтчанлиқини юқири көтүрүш, шундақла шәрқий түркистан дәвасида билим, ярамлиқ избасарларни йетиштурушниң лайиһәси тоғрисида музакирә елип берилди.

Йиғинниң чүштин кейинки бөлүмидә, шәрқий түркистан миллий күриши үчүн иқтисадий күч бәрпа қилиш, лобийчилик һәрикитини күчәйтиш, миллий мустәқиллиқниң қәдәм басқучлирини ениқ айриш дегәнгә охшаш темиларда муһакимә вә музакирә елип берилди. Ахирида доктур пәрһат қурбан тәңритағли хуласә сөзи қилди.

Биз бу йиғиндаоттуриға қоюлған муһим нуқтилар уйғур академийәсиниң рәиси пәрһат қурбан тәңритағли вә иҗраийә рәиси абдулһәмит қарахан әпәндиләр билән сөһбәт елип бардуқ.

Доктур пәрһат қурбан тәңритағли бу йиғинда уйғурлар вәзийитини тоғра тәһлил қилиш вә қилишқа тегишлик зөрүр һәм әмәлий ишлар үстидә музакирә елип берилғанлиқини тәкитлди.

Уйғур академийәсиниң иҗраийә рәиси абдулһәмит қарахан, нөвәттә шәрқий түркистан миллий көришиниң йеңи бир йүзлинишкә қарап давам қиливатқанлиқини, бу хил йеңи вәзийәткә қандақ тақабил туруш мәсилиси бойичә уйғур зиялийилири вә уйғур тәшкилатларниң мәсуллири билән музакирә елип барғанлиқини оттуриға қойди.

Абдулһәмит қарахан әпәнди йәнә мундақ деди: "һәр қайси дөләтләрдики лагер шаһитлири арқилиқ җаза лагерларға аит дәлил-испатларни топлаш, доклат тәйярлаш, гуваһлиқ видийолирини ишләп тарқитиш, шу арқилиқ лагер мәсилисини давамлиқ күнтәртиптә тутуп туруш муһакимә қилинди. Йәнә бири уйғурлар яшаватқан дөләтләрниң һөкүмәтлирини хитайға қарита иқтисадий имбарго йүргүзүшкә, хитай мелини байқот қилишқа чақриш мәсилиси, шундақла хитайниң хирсиға учраватқан чоң дөләтләрни хитайға қарита қаттиқ болушқа чақириш тоғрилиқ муһакимиләр елип берилди."

Абдулһәмит қарахан йәнә бу йиғинда оттуриға қоюлған пикир-тәклипләр тоғрисидиму тәпсилий мәлумат бәрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт