Doktur rishat abbas Uyghur akadémiyesi merkizi komitétining re'islikige saylandi

Ixtiyariy muxbirimiz arslan
2021-12-14
Share
Doktur rishat abbas Uyghur akadémiyesi merkizi komitétining re'islikige saylandi Doktor rishat abbas ependi Uyghur akadémiyisining yighinida sözlimekte. 2017-Yili 8-öktebir, türkiye.
RFA/Arslan

11-Dékabir shenbe küni Uyghur akadémiyesi özining herqaysiy ellerdiki ilmiy xadimliri we mes'ul kishilirining qatnishishi bilen tor yighini ötküzgen. Bu yighin'gha Uyghur akadémiyesining türkiye, amérika, yawropa elliri, awstiraliye, kanada we yaponiye qatarliq döletlerdiki asasliq xadimliri, Uyghur akadémiyesining herqaysiy döletlerdiki shöbe organlirining re'is we mu'awin re'isliri, bash katipliri, qutadghubilig inistituti, xitayni tetqiq qilish inistituti we ana til kométitining mes'ulliri bolup, 30 etrapida kishi qatnashqan. Yighinda her qaysi döletlerde qurulghan Uyghur akadémiyelirige yétekchilik qilidighan bir merkizi komtétit we uning re'isi saylap chiqilghan. Ikki kishi re'islik namzatigha körsitilgen bolup, her ikki namzat özlirining kelgüsi pilanliri we we ishqa ashurmaqchi bolghan xizmet layihelirini otturigha qoyghan. Saylam netijiside doktor rishat abbas ependi yuqiri awaz bilen Uyghur akadémiyesi merkizi komitétining re'isi bolup saylan'ghan.

Biz bu munasiwet bilen merkizi istanbulgha jaylashqan Uyghur akadémiyesi wexpining re'isi doktur perhat qurban tengritaghli ependi bilen mezkur saylam toghrisida söhbet élip barduq. Doktur perhat ependi türkiye we dunyaning her qaysi jaylirida qurulghan Uyghur akadémiyeliri otturisida buningdin kéyin hemkarliqni yenimu kücheytish meqisitide ortaq yétekchilik qilidighan bir merkiziy komitét hemde uning re'isini saylap chiqqanliqini, doktur rishat abbasning re'islikke saylan'ghanliqini bildürdi.

Ziyaritimizni qobul qilghan Uyghur akadémiyesi merkizi komitétining bash katipi abdulhemit qaraxan mundaq dédi: “Uyghur akadémiyesi türkiyediki Uyghur ziyaliylirining tirishchanliqi bilen 2009-yili 9-séntebirde qurulghan, muhajirette Uyghur ziyaliylar we oqughuchilar üchün bir yéngi ümid menbesi bolghan idi. Uyghur akadémiyesining 2017-yilighiche bolghan 8 yilliq emeliy xizmetliri muhajirettiki ziyaliylar we oqughuchilar ichide belgilik tesir qozghighan idi. Shunga biz 2017-yili Uyghur akadémiyesining tesirini türkiyedin bashqa döletlergimu kéngeytishni pilan qilghan iduq. Mushu pilan boyiche, türkiyedin bashqa yene amérika, yawropa döletliri, awstraliye, ottura asiya elliri, kanada we yapuniyede ilgiri-kéyin bolup, Uyghur akadémiyeliri arqa-arqidin quruldi. Hazirghiche jem'iy 7 dölet we qit'ede Uyghur akadémiyeliri quruldi, buningdin bashqa uyghu akadémiyesi yene terkibide xitay tetqiqati inistituti, qutadghubilig inistituti we ana til komitétli'i quruldi.”

Uyghur akadémiyesi merkizi komitétigha yéngidin re'is bolup saylan'ghan doktur rishat abbas ependi Uyghur akadémiyesi toghrisidiki so'allirimizgha yazma shekilde jawap bérip, mundaq dédi: “Biz bu yéngi dewride aldi bilen her qaysi döletlerde qurulghan Uyghur akadémiyelirining öz ara hemkarliqini téximu kücheytip, ortaq tetqiqat türlirini birge ishlesh arqiliq, akadémiyening sherqiy türkistan milliy kürishidiki rolini téximu jari qildurushni meqset qiliwatimiz. Buning tipik misali süpitide londonda qurulghan musteqil Uyghur sot kollégiyesige her qaysi döletlerdiki akadémiye ezaliri sotqa kéreklik matériyallarni teyyarlash, terjime qilish we tehrirleshte köp térishchanliqlarni körsetkenlikini alahide tilgha élishqa bolidu. Buningdin bashqa yene Uyghur akadémiyesige téxiche eza bolmighan her qaysi döletlerdiki Uyghur tetqiqatchiliri we mutexessislirini ezaliqqa qobul qilish qilip arqiliq, sherqiy türkistan milliy körishige aktip qatnishidighan ziyaliylar qoshunini zoraytishni, shundaqla Uyghurlar üchün kelgüsi yaramliq iz basarlarni terbiyelep chiqishni pilan qiliwatimiz.”

Uyghur akadémiyesi wexpining re'isi doktur perhat qurban tengritaghli, Uyghur akadémiyesining eng muhim pilanining mehmud qeshqeri uniwéristéti qurush ikenlikini, özlirining bu heqte jiddiy izdinish élip bériwatqanliqini bildürdi.

Abdulhemit qaraxan Uyghur akadémiyesi toghrisida toxtilip mundaq dédi: “Türkiyediki Uyghur akadémiyesi, yeni Uyghur akadémiyesi wexpining re'isi doktor perhat qurban tengritaghli we bashqa hey'etlerning yétekchilikide, türkiyediki Uyghur ziyaliylar we aliy mektep oqughuchilirining milliy körishimizdiki aktipchanliqini qozghash, türkiyediki siyasiy shexsler, dölet emeldarliri we her sahesidiki serxil türklerning sherqiy türkistan milliy körishini qollishini qolgha keltürüsh, shundaqla yashlarni terbiyelesh qatarliq bir qatar emeliy xizmetlerni dawamlashturmaqchi boliwatimiz.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet