Yerken odanliq weqesige alaqidar yene bir türküm melumatlar ashkarilandi

Muxbirimiz yerkende 26 ‏-sintebir küni yüz bergen odanliq weqesi heqqide bügün yene bir qatar yéngi  melumatlargha érishti. Melum bolishiche saqchilar, odanliqning xanköwrük kentide 3 gumandarni étip öltürgendin kéyin, weqege chétishliq yene bashqa  gumandarlarni tutush üchün rahet'östeng kentidimu opiratsiye élip barghan. 
Bu jeryanda gumandarlarning qarshiliqigha duch kelgen saqchilar gumandarlardin az dégende yene ikki kishini étip öltürgen. Yene ashkarlinishiche, odanliqta weqe chiqip weziyet jiddiyleshkendin kéyin, saqchilar  yerkenning misha yézisidiki bir meschitte  özliri bilen gep talashqan bir kishini  étip tashlighan.  Töwende muxbirimiz shöhret hoshurning bu heqte teyyarlighan programisini anglaysiler melum bolishiche bir türküm pidayilar, odanliqning chet yaqidiki  4 ‏-kent yeni topan kentide toplan'ghan. Ular bir mehel teyyarlan'ghandin kéyin öz planliri boyiche odanliqning qeshqerge mangidighan chong yol boyidiki xanköwrük yézisigha qarap herket qilghan. . Ular  xanköwrükke yétip kélip  sepdashliridin bir nepirini kütüp turghanda yeni 26 ‏-sintebir kuni  yérim kéchide saqchilarning qorshawida qalghan. Saqchilar pidayilardin 3 nepirini neq meydanda étip tashlighan. Pidaylardin üch nepiri qéchip qutulghan.  Shuningdin kéyin saqchilar, qéchip ketken pidayilarni tutush üchün  opiratsiye bashlighan. 9 ‏-Ayning 30 küni saqchilar qéchip ketken pidayilarni  rahet'östeng kentide qorshawgha alghan. Pidayilar teslim bolushni ret qilip, saqchilargha qarshliq körsetken. Saqchilar bu meydandimu pidayilardin az dégende ikki nepirini étip tashlighan. Odanliqta weqe yüz bergendin kéyin, yekende omumyuzluk weziyet jiddiyleshken. Yerkenning misha yézisida 6 yashliq oghlini meschitke élip kirip kétiwatqan bir yash meschitni qorshap turghan saqchilarning tosqunluqigha uchrighan we gep takalliship qalghan. Odanliqtidiki weqedin kéyin esebitleshken saqchilar, bu kishinimu étip tashlighan.  Hörmetlik radiyo anglighuchilar, yuqurida yerkende yüz bergen 26 ‏-sintebir odanliq weqesi heqqide yene bir qisim melumatlarni diqqitinglargha sunduq.