Ғулҗада аз дегәндә 5 балиниң ғайиб болғанлиқи, оқуғичиларниң мәктәпкә сақчиларниң назаритидә берип-келиватқанлиқи ашкариланди

Мухбиримиз шөһрәт һошур
2021-03-15
Share
Ғулҗада аз дегәндә 5 балиниң ғайиб болғанлиқи, оқуғичиларниң мәктәпкә сақчиларниң назаритидә берип-келиватқанлиқи ашкариланди Ғайиб болған өсмүрләрдин гүлзиба аюп вә ризвангүл имин.
Social Media

Иҗтимаий ахбаратларда адәм бедиклириниң зиянкәшликкә учриғанлиқи илгири сүрүлгән 13 яшлиқ абдулла рахманҗан һәққидә илгириләп елип барған ениқлашлиримиз давамида, ғулҗа наһийәсиниң пәнҗим вә моллитохти йезисидин вә чапчалниң сумбул йезисидин болуп җәмий 4 оқуғучиниңму ғайиб болғанлиқи, уларниң аилилири вә сақчилар тәрипидин издиливатқанлиқи ашкариланди. Телефон зиярәтлиримиздин мәлум болушичә, 13 билән 16 яш арисидики балиларнәиң йоқап кетиш вәқәси йеқинқи бирқанчә айдин бери арқа-арқидин йүз бериватқан вәқәләрдин болуп, нөвәттә ғулҗада өсмүр балилар мәктәпкә ата-анилири яки сақчиларниң назаритидә берип-кәлмәктикән.

Ғайиб болған өсмүрләрдин нәргизә абдулла.

Алдинқи күнләрдики ениқлашлиримизда иҗтимаий ахбаратларда тарқалған ғулҗа наһийәсиниң үчон хуйзу йеза тохучийүзи кәнтидики 13 яшлиқ оқуғучи абдулла рахманҗанниң адәм бедиклириниң зиякәншиликигә учриғанлиқи һәққидики хәвәрниң тоғрилиқи дәлилләнгән иди. Иҗтимаий ахбаратларда тарқалған йәнә башқа адәм издәш еланлиридиму ғулҗа наһийәсиниң пәнҗим йезисидин музәппәр мәмәтәли, моллитохтийүзи йезисидин гүлзиба вә ризвангүл, чапчалниң йәттәсумбул йезисидин нәргизә абдулла қатарлиқ җәмий 4 оқуғучиниң4-март күнидин етибарән ғайиб икәнлики баян қилинған. Ғайиб балиларниң сүрәтлириму көрситилгән бу еланларда уларниң оқуватқан мәктәп, турушлуқ адреслири берилгән. Биз алди билән чапчал наһийәсдики алақидар идарә-органларға телефон қилип, нәргизә абдулланиң тепилған яки тепилмиғанлиқи һәққидә мәлумат соридуқ. Хадимлар соаллримизни асасән дегүдәк җавабсиз қалдурди, әмма һечқайсиси ғулҗада давам қилған балиларниң йитип кетиш вәқәсиини инкар қилмиди. Пәнҗим йезилиқ һөкүмәт хадими әһвални алақидар рәһбири органлардин сүрүштә қилишимизни тәвсийә қилип, соалимизға җаваб бериштин өзини қачурди.

Ғайиб балилар һәққидики адәм издәш еланлириниң биридә моллитохтиййүзилик оқуғучи гүлзибаниң5-оттура мәктәп формиси кәйгәнлики қәйт қилинған. Телефонимизни қобул қилған ғулҗа наһийәлик 5-оттура мәктәпниң бир хадими мәзкур оқуғучиларниң йитип кетиш вәқәсидин хәвири барлиқини ейтти, әмма балиларниң ақивитидин та һазирғичә хәвири йоқлуқини ашкарилиди.

Телефонимизни қобул қилған бир кәнт кадири ғулҗада бала йитип кетиш вәқәлири арқа-арқидин йүз бәргәнлики үчүн кәнтләрдә бу һәқтә йиғин ечилғанлиқи вә ата-аниларниң балилирини мәктәпкә өзлири апирип әкеливатқанлиқини ашкарилиди. Ғулҗадики йәнә бир сақчи хадимиму тохучийүздә 13 яшлиқ абдулла рахманҗанниң җәсити тепилғандин кейин, бихтәрлик тәдбирлири сүпитидә доқмуштики сақчи понкитлири (гаңтиң) ниң балиларни мәктәпкә апирип-әкилишкә мәсул болғанлиқини ашкарилиди. У йәнә ғулҗада бала йүтүш вәқәсиниң йеңи бир әһвал әмәслики, шуңа мәктәп башланғандин буян сақчиларниң оқоғуғучиларға мәктәпкә берип-келиш җәрянида һәмраһ болуватқанлиқини ашкарилиди.

Телефонимизни қобул қилған сақчилар һазирға қәдәр бу адәм бедиклириниң кимликлири һәққидә мәлумат бәрмиди, әмма үндидардики бир учурда бир аял кечидә өз өйигә намәлум бир кишиниң оғрилиқчә киргәнлики вә у җиддий қутқузушқа телефон қилғандин кейин у кишиниң қечип чиқип кәткәнликини баян қилған. Бу учурда өйгә оғрилиқчә киргән кишиниң аялдин "йолдишиң нәдә?" дәп хитай тилида гәп қилғанлиқи әскәртилгән.

Юқирида ғулҗада аз дегәндә бәш оқуғучиниң из-дерәксиз ғайиб болғанлиқи, булардин бириниң җәсити тепилғанлиқи, қалғанлириниң из-дерики қилиниватқанлиқи һәққидә аңлитиш бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт