"Uyghur kishilik hoquq qanun layihesi" amérika kéngesh palatasi tashiqi munasiwetler komitétida maqulluqtin ötti

Muxbirimiz jüme
2019-05-22
Élxet
Pikir
Share
Print
Xitayning lagér we türmiliridiki türlük qiynashlargha shahit bolghan méhrigül tursun guwahliq bergen amérika dölet mejlisi qarmiqidiki xitay ishliri ijra'iye komitétida ötküzülgen "Kommunistik partiye xitayda diniy étiqadni qattiq basturdi" namliq guwahliq bérish yighinida amérika kéngesh palatasi ezasi marko rubiyo ependi sözde . 2018-Yili 28-noyabir, washin'gton.
Xitayning lagér we türmiliridiki türlük qiynashlargha shahit bolghan méhrigül tursun guwahliq bergen amérika dölet mejlisi qarmiqidiki xitay ishliri ijra'iye komitétida ötküzülgen "Kommunistik partiye xitayda diniy étiqadni qattiq basturdi" namliq guwahliq bérish yighinida amérika kéngesh palatasi ezasi marko rubiyo ependi sözde . 2018-Yili 28-noyabir, washin'gton.
Photo: RFA

"Uyghur kishilik hoquq siyasiti qanun layihesi" amérika kéngesh palatasi tashiqi munasiwetler komitétida maqulluqtin ötti.

Awam palata ezasi marko rubiyo we bob menendez qatarliqlar 22- may bayanat bérip, "Uyghur kishilik hoquq siyasiti qanun layihesi" ning awam palatasi tashqi munasiwetler komitétida maqulluqtin ötkenlikini bildürdi.

Marko rubiyo: xitay rehberliridin hésab élish bek kéchikip ketti

Rubiyo bayanatida mundaq dédi: "Shinjangdiki Uyghur we bashqa gholluq musulman az sanliqlargha qaritilghan sistémiliq we mislisiz kishilik hoquq depsendichilikide qoli bar xitay hökümiti we kommunistik partiyesi rehberliridin hésab élish bek kéchikip ketken idi."

Awam palatasi ezasi marko rubiyo ependi florida shtatining jumhuriyetchiler partiyesidin bolghan wekili.

U sözini dawam qilip mundaq dédi: "Kéngesh palatasi tashqi ishlar komitéti bizning ikki partiye hemkarliqida tonushturghan 'Uyghur kishilik hoquq siyasiti qanun layihesi' ni maqulluqtin ötküzüp intayin ehmiyetlik bir qedemni basti."

Bob menendez: "Bügün hemmeylen Uyghurmiz."

Mezkur qanunni hemkarliship tonushturghuchilarning biri awam palatasi ezasi yéngi jérséy shtatining démokratchilar partiyesidin bolghan wekili bob menendez ependidur.
U bu munasiwet bilen söz qilip öziningmu bir Uyghur ikenlikini jakarlidi.

U mundaq dédi: "Bügün hemmeylen Uyghurmiz. Xitay Uyghur puqralirigha séliwatqan qorqunchluq we sistémiliq zulum uniwérsal kishilik hoquq prinsiplirini qedirleydighan barliq insanlargha qilin'ghan ortaq haqaret. Béyjing shinjangda yürgüzüwatqan sistémiliq, kölemlik teqiblesh insanliqni, insanning hayatini, milliy, diniy we kültural erkinlikni qedirleydighan herbir ademni shürkündürüshi kérek."


U yene kéngesh palatasi tashqi munasiwetler komitétining mezkur qanun layihesini maqulluqtin ötküzüp xitay re'isi shi jinping we xitay kommunist partiyesining mudhish dunya qurush ghayisige qarshi kökrek kirip otturigha chiqqanliqigha apirin oqudi.

U bayanati dawamida amérika awam palatasining bashqa ezalirinimu mezkur qanunni tizdin maqulluqtin ötküzüshke dewet qildi.

Uyghur kishilik hoquq siyasiti qanun layihesi 2018- yili noyabirda bir qétim we bu yil yanwarda tüzitilip yene bir qétim tonushturulghan.
Qanun layihesige bu nöwet kéngesh palatasining jumhuriyetchi we démokratchilar partiyesi wekilliridin 30 nechche kishi imza qoyghan.

Bu qanun layihesi dölet mejilisi tereptin jumhuriyetchiler partiyesidin bolghan kristofér simit qatarliqlarning képillikide tonushturulghan idi.

Qanun layiheside töwendiki mezmunlar alahide közge chéliqidu

  • Amérika hökümiti birleshken döletler teshkilati kishilik hoquq aliy komissari we b d t ning munasiwetlik doklat teyyarlighuchilirining Uyghur rayonida, bolupmu atalmish "Qayta terbiyilesh lagérliri" da jiddiy hem cheklimisiz halda tekshürüsh élip bérishige qaritilghan chaqiriqlarni qollaydighan bir istratégiye tüzüp chiqish.
  • Amérikaning b d t wekillirige b d t diki awaz bérish hoquqidin paydilinip xitaydiki türkiy musulmanlargha qaritilghan keng kölemlik tutqun, ten jazasi we mejburiy emgek qilmishlirini eyibleshke yolyoruq bérish.
  • Amérika tashqi ishlar ministirliqida shinjang ishlar maslashturghuchisi teyinleshni oylishish.
  • Tashqi ishlar ministiri "Xelq'ara magnétski qanuni" ni yürgüzüp, Uyghur éli we bashqa rayonlardiki kishilik hoquq depsendichilikige biwasite chétilghan xitay hökümiti we partiyesi ichidiki emeldarlar hem Uyghur aptonom rayonning partiye sékrétari chén chu'en'go qatarliqlargha jaza tedbirliri qollinish.
  • "Erkin asiya radi'osi" ning qatmuqat qiyinchiliqlargha qarimay Uyghur rayonining nöwettiki weziyiti heqqide dawamliq tepsiliy melumatlarni bérip kéliwatqanliqini teqdirlesh.
  • Amérika fédératsiye tekshürüsh idarisi (FBI) xitay amérika tupraqlirida amérika puqralirigha salghan tehditler heqqide alaqidar organlarni uchur bilen teminlesh.
  • Amérika dunyawi médiya agéntliqi erkin asiya radiyosi Uyghur bölümige qaritilghan tehditler heqqide dölet mejlisige doklat bérip turush we xitayning chet'ellerdiki Uyghur jama'itige qaratqan tetür teshwiqatigha qarishi istratégiye belgilep chiqish.
Pikirler (0)
Share
Toluq bet