Abu-zebide ötküzülgen dunya musabiqiside üch neper Uyghur mahir chémpiyon boldi

Ixtiyariy muxbirimiz oyghan
2021.11.18
Abu-zebide ötküzülgen dunya musabiqiside üch neper Uyghur mahir chémpiyon boldi Abu-zebide ötküzülgen erkin chélishish we mushtlishish dunya ösmürler musabiqiside chémpiyon bolghan Uyghur tenheriket mahiri gülminem iminowa. 2021-Yili noyabir. Abu-zebi, ereb birleshme xelipiliki.
RFA/Oyghan

Qazaqistan ammiwiy axbarat wasitilirining xewerlirige qarighanda, 1-noyabirdin 16-noyabirghiche ereb birleshme xelipilikining paytexti ebu-zebide braziliyeche jyu-jitsu, yeni erkin chélishish we mushtlishish türi boyiche dunya ösmürler musabiqisi ötküzülgen. Bu musabiqige 65 memlikettin kelgen her xil beden éghirliqidiki 1500 din oshuq ösmür tenheriketchi qatnashqan. Qazaqistandin barghan tenheriketchiler 56 médal, yeni 11 altun, 16 kümüsh we 29 mis médal bilen rusiye we ereb birleshme xelipiliki komandisidin qalsila üchinchi orunni igiligen.

Mezkur musabiqide “Dunya chémpiyoni” dégen ataqqa érishkenler arisida Uyghur mahirlarmu bolup, ularning netijisi Uyghur jama'iti we ijtima'iy taratqularda küchlük inkas qozghighan. Bu üch neper Uyghur mahir almuta wilayitining emgekchiqazaq nahiyesi awat yézisidin bextiyar qehriman, panfilof nahiyesining yarkent shehiridin gülminem iminowa we iliyas abdullayéflardur.

Qazaqistanliq-dunya-chempiyonlirining-bir-guruppisi-202111.jpg
Qazaqistanliq dunya chémpiyonlirining bir guruppisi. 2021-Yili, noyabir. Abu-zebi, ereb birleshme xelipiliki.

Biz bu munasiwet bilen qazaqistan, asiya qit'esi we dunya boyiche ötküzülgen musabiqilerde bir nechche mertem chémpiyon bolghan tenheriket mahiri gülminem iminowa bilen alaqileshtuq. U radiyomiz ziyaritini qobul qilip, mundaq dédi: “Hemminglargha salam! méning ismim gülminem. Men bu yil 16 yashta. Men jyu-jitsu we gréppling, yeni yéqindin arilash chélishish türi boyiche tenheriket mahirining namzatimen. Birinchi kündin tartipla méning qolumdin hemme nerse keldi. Men hemmini séziwalidighan boldum. Yéqinda bolghan musabiqige men qattiq teyyarliq qildim. Men öz wetinim qazaqistan'gha altun médal hediye qilghum, élimning tughini égiz kötürgüm keldi. Manga ongay chüshmidi. Méning axiriqi kürishimge dubeyning yuqiri derijilik, tejribilik tenheriketchisi toghra kélip qaldi. Emma uni yengdim. Aldimda yene köpligen musabiqiler kütüp turidu. Men hazir rusiyede we türkiyede bolidighan dunya musabiqilirige teyyarliniwatimen. Bu ellerdimu qazaqistanning tughini lepeldetküm bar. Hemmisining mendin pexirlinishini xalaymen. Bu pursette méni maddiy we meniwiy jehettin qollawatqan ata-anamgha, momamgha we trénérlirimgha cheksiz minnetdarliqimni bildürimen.”

Gülminemning momisi ruqiyem xudaberdiyéwa xanim ziyaritimizni qobul qilip, gülminemge zor utuqlar tilidi.

Igilishimizche, tenheriketning braziliyeche jyu-jitsu, yeni erkin chélishish we mushtlishish türi qazaqistan paytexti nursultan shehiride pa'aliyet élip bériwatqan “Alyans” braziliyeche jyu-jitsu akadémiyesi teripidin tunji qétim teshkillen'geniken. Uni jyu-jitsu boyiche tenheriket mahiri armanjan rozaxunof bashquridiken.

Dunya-chempiyoni-iliyas-abdullayef-202111.jpg
Abu-zebide ötküzülgen erkin chélishish we mushtlishish dunya ösmürler musabiqiside chémpiyon bolghan Uyghur tenheriket mahiri iliyas abdullayéf.

Biz gülminem iminowa we iliyas abdullayéfning ustazi, jyu-jitsu we gréppling akadémiyesining trénéri bextiyar téyipof bilen alaqilashqinimizda, u mundaq dédi: “Men dangliq ösek wadisining boyigha jaylashqan gözel shehirimiz yarkentning perzendimen. 2017-Yili 5-öktebirdin bashlap meshqawulluq qilip kéliwatimen. Méning oyumche, trénér chidamliq, öz ishini yaxshi körüshi kérek. Eger men hayatimdiki oylirimni özgertish meqsitim bolsa, hayatimni trénér bolushqa béghishlayttim. Namish désenglar, bu hayatimning mezmunluq böliki. Her bir meshqqe bérishim, méning üchün chong bayram. Bu yili ebu-zebide ötken dunyawiy musabiqide méning oqughuchilirim abdullayéf ilyas, iminowa gülminem, usabayéf alpamish yuqiri derijilik dunyawiy chémpiyon atiqigha ige boldi. Men bexitlik. Sewebi kélechekte oqughuchilirimni dunyawiy olimpik sehniside yuqiri derijilik mukapatqa ige bolidu, dep ishench bildürimen.”

Dunya-chempiyoni-bekhtiyar-qehriman-202111.jpg
Abu-zebide ötküzülgen erkin chélishish we mushtlishish dunya ösmürler musabiqiside chémpiyon bolghan Uyghur tenheriket mahiri bextiyar qehriman.

bekhtiyar-qehriman-202111.jpg
Dunya chémpiyoni bextiyar qehriman nahiyilik hakimiyet huzurida. 2021-Yili, noyabir. Ishikte shehiri, qazaqistan.

Melum bolushiche, qazaqistanda ene shundaq yash Uyghur chémpiyonlirining érishken utuqlirini terghib qilish ishlirimu yolgha qoyulmaqtiken. Jumhuriyetlik “Uyghur awazi” gézitining yéngi sanida ebu-zebide bolup ötken dunya musabiqiside chémpiyon bolghan bextiyar qehriman heqqide maqale élan qilin'ghan. “Chémpiyon'gha hörmet körsitildi” dep atalghan mezkur maqalida éytilishiche, emgekchiqazaq nahiyesining awat yézisidiki ömer muhemmediy namidiki mektepning 11-sinip oqughuchisi bextiyar qehrimanni uning yurtdashliri almuta ayrodromida daghdughiliq kütüwalghan. Nahiyelik hökümet we mektep bextiyar qehrimanning hörmitige uchrishishlarni uyushturup, uninggha maddiy sowghilar hediye qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.