D u q re'isi oksford uniwérsitétida Uyghurlar toghruluq doklat berdi

Ixtiyariy muxbirimiz ekrem
2021-06-11
Share
D u q re'isi oksford uniwérsitétida Uyghurlar toghruluq doklat berdi D u q re'isi dolqun eysa meshhur oksford uniwérsitétida Uyghurlar we sherqiy türkistanning nöwettiki weziyiti toghrisida doklat bériwatqan körünüsh. 2021-Yili 10-iyun, en'gliye.
RFA/Ekrem

D u q re'isi dolqun eysa meshhur oksford uniwérsitétida Uyghurlar we sherqiy türkistanning nöwettiki weziyiti toghrisida doklat bergen.

10-Iyun küni en'gliyening dunyagha dangliq aliy mektepliridin biri bolghan oksford uniwérsitétining oqughuchilar uyushmisi d u q re'isi dolqun eysa ependini Uyghurlar we sherqiy türkistanning nöwettiki weziyiti toghrisida doklat bérishke teklip qilghan. Yighin'gha dolqun eysa bilen birge d u q ning bash teptishi abdulhakim idris we d u q sehiye-ékologiye bölümining mudiri enwer toxtilarmu qatnashqan.

D u q re'isining bildürüshiche, oksford uniwérsitétining oqughuchilar uyushmisi tunji qétim 2020-yili 3-ayda Uyghur siyasiy aktiplirini bir qétim doklat bérishke teklip qilghan. Bu qétimqi doklat bérish yighinida oqughuchilar d u q re'isi dolqun eysaning qandaq bolup bügünkidek bir aktip siyasiy pa'aliyetchige aylan'ghanliqi toghrisida so'allar sorighan. Dolqun eysa ependi özining yashliq dewridiki kechmishlirini bayan qilish bilen birge, nöwettiki sherqiy türkistanning omumiy weziyiti toghrisida etrapliq toxtalghan.

4-Iyundin 7-iyun'ghiche londonda dawam qilghan "Uyghur sot kollégiyesi" ning guwahliq anglash yighinigha qatnishish üchün amérikidin kelgen d u q ning bash teptishi abdulhekim idris ependi ziyaritimizni qobul qilip bu doklat bérish yighini heqqide toxtalghanda, d u q re'isining bergen doklatining oksford uniwérsitétining oqughuchilirigha küchlük tesir qilghanliqini, yighinning so'al-jawab sheklide nahayiti qiziqarliq ötkenlikini tilgha aldi.

Dolqun eysa ependi sözining axirida, kélechekte en'gliyening we dunyaning siyasiy, iqtisadiy weziyitige tesir körsitidighan kishilerdin bolup yétiship chiqidighan bu yashlargha sherqiy türkistanning omumiy ehwalini anglitish pursitige ige bolghanliqidin memnunluq hés qilghanliqini ipade qildi.

"Uyghur sot kollégiyesi" ning guwahliq anglash yighinini axirlashturup londonda qalghan birqisim d u q rehberliri hazir 11-iyundin 13-iyun'ghiche dawam qilidighan en'gliyediki G7 yighinida Uyghurlar duch kéliwatqan "Irqiy qirghinchiliq" ning küntertipni igilishi we yighindin Uyghurlar toghruluq yaxshi bir netijining wujudqa chiqishi üchün térishchanliq körsetmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet