«японийә уйғур достлуқ гурупписи» уйғурлар тоғрисида японийә парламентиға тәклип лайиһәси сунмақчикән

Ихтиярий мухбиримиз әркин тарим
2020-11-20
Share
yaponiye-uyghur-uyushmisi-1.jpg Әркин демократлар партийәсиниң парламент әзалириниң тәшәббуси билән ечилған йиғиндин көрүнүш. 2020-Йили 1-ноябир, японийә.
RFA/Erkin Tarim

2020-Йили 11-айниң 18-күни японийә парламентидики әң чоң партийәләрдин бири болған әркин демократлар партийәсиниң парламент әзалириниң тәшәббуси билән «японийә уйғур достлуқ гурупписи» билән «йәрлик парламент әзалири достлуқ гурупписи» қайта һәрикәткә өткән. японийә уйғур җәмийитиниң рәиси доктор абдулкерим абдурахманниң билдүрүшичә, йиғинда японийә парламентида хитайниң һазир уйғурларға елип бериватқан сияситини «ирқий қирғинчилиқ» дәп қобул қилдуруш, йәрлик парламент әзалиридин пайдилинип, уйғур дәвасини пүтүн японийәгә йейиш һәмдә бу һәқтә тәклип лайиһәси тәйярлап, японийә парламентиға сунуш мәсилиси оттуриға қоюлған.

Биз нәқ мәйданға телефон қилип бу һәқтә мәлумат игилидуқ. Йиғинда алди билән уйғурларниң һазирқи еғир вәзийити тоғрисида доклат берип өтүлгән. Йиғин риясәтчиси алди билән японийә парламентидики «уйғур достлуқ гурупписи» ниң мәсули кеиҗи фуруя әпәндини сөзгә тәклип қилип мундақ дегән: «бүгүн японийә парламент әзалири ‹уйғур достлуқ гурупписи' ға әза парламент әзалири вә мухбирлар бир йәргә җәм болуп, японийә уйғур җәмийити вә японийәдә яшаватқан уйғурлар тәрипидин чақирилған йиғинда алди билән уйғурларниң һазирқи еғир вәзийити тоғрисида мәлуматқа игә болуш пурситигә наил болдуқ. Вақтимиз чәклик болсиму яхши пайдилансақ дәп ойлаймән вә достлуқ гуруппимизниң башлиқи кеиҗи фуруя әпәндини сөзгә тәклип қилимән.»

Парламент бинаси ичидә чақирилған японийә парламенти «уйғур достлуқ гурупписи» ниң йиғини вә асияда әркинлик, демократийәни илгири сүрүш җәмийитиниң йиғинлирида уйғурларниң һазирқи еғир вәзийити тоғрисида доклат берилгән. Йиғин ахирлашқандин кейин японийә уйғур җәмийитиниң рәиси доктор абдулкерим абдурахман әпәнди зияритимизни қобул қилип, бүгүн 8 йил бурун қурулған японийә парламентидики «уйғур достлуқ гурупписи» ниң қайта һәрикәткә өткәнликини, буниңдики мәқсәтниң биринчидин, уйғур мәсилисини японийәдики барлиқ партийәләрниң мәсилисигә айландуруш, иккинчидин, японийә парламентидикиләргә уйғурларға елип бериливатқан сиясәтни «ирқий қирғинчилиқ», «шәрқий түркистанни бесивелинған земин» дәп қобул қилдуруштин ибарәт икәнликини баян қилди.

Доктор абдукерим абдурахман әпәнди йәрлик парламент әзалири билән өткүзүлгән йиғинда уйғур дәвасини пүтүн японийәгә омумлаштурушни қарар қилғанлиқини баян қилди.

Д у қ ниң японийәдики вәкили илһам мәхмут әпәндиниң ейтишичә, японийә парламентидики «уйғур достлуқ гурупписи» ниң йиғинида мәзкур гуруппиниң уйғурлар тоғрисида қарарнамә тәйярлап, японийә парламентиға сунудиғанлиқи оттуриға қоюлған. Илһам мәхмут әпәнди бу һәқтә мәлумат бәрди.

Илһам мәхмут әпәнди 18-ноябир күни японийә парламентида өткүзүлгән асияда әркинлик вә демократийини илгири сүрүш җәмийитиниң йиғинида доклат бәргән. У йиғинда мәзкур тәшкилатниң уйғур мәсилисини асиядики башқа дөләтләргә йейиши вә японийә парламентиниң бу һәқтә конкрет позитсийә билдүрүши үчүн күч чиқиришини тәләп қилған. У бу һәқтиму мәлумат бәрди.

Ундақта, японийә һөкүмити хитайниң уйғурларға елип бериватқан сияситини «ирқий қирғинчилиқ», уйғур диярини «бесивелинған земин» дәп қобул қилиши мумкинму? уйғур зиялийси сәдуллаһ онуйғур әпәнди бу һәқтики көз қаришини баян қилди.

2012-Йили 4-айниң 20-күни японийә парламентидики әң чоң өктичи партийәләрдин бири болған әркин демократлар партийәсиниң парламент әзалириниң тәшәббуси билән «японийә уйғур достлуқ гурупписи» қурулған иди. Мәзкур гуруппиға 20 нәпәр парламент әзаси рәсмий әза болған болуп, японийиниң сабиқ баш министири шинзо абе әпәнди баш мәслиһәтчи, парламент әзаси кеиҗи фуруя әпәнди болса гуруппа мәсули, сеиичи ето әпәнди баш катиплиққа сайланған иди.

Буниңдин башқа йәнә японийә парламентида район вә шәһәрлик парламент әзалиридин тәркиб тапқан йәнә бир «уйғур достлуқ гурупписи» му қурулған. Бу гуруппа район вә шәһәрләргә вәкиллик қилидиған бәзи парламент әзалири тәрипидин қурулған иди. Мәзкур икки «уйғур достлуқ гурупписи» ниң рәсмий қурулғанлиқини сабиқ баш министир шинзо абе әпәнди җакарлиған иди. Бу йиғинға японийә уйғур җәмийитиниң рәһбәрлириму қатнашқан иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт