Әр-аял уйғур докторлириниң мувәппәқийити: түркийәдә ечилған икки чоң дохтурхана

Ихтиярий мухбиримиз әркин тарим
2021-10-25
Share
Әр-аял уйғур докторлириниң мувәппәқийити: түркийәдә ечилған икки чоң дохтурхана Доктор абдукерим буғра билән аяли доктор аминә буғра "форум дент чиш вә еғиз саламәтлики мәркизи" намида ачқан чиш дохтурханиси алдида. 2021-Йили 23-өктәбир, әнқәрә.
RFA/Erkin Tarim

Түркийәдә чиш дохтурилиқ саһәсидә оқуп йетишкән доктор абдукерим буғра билән аяли доктор аминә буғра түркийәниң пайтәхти әнқәрә шәһиридә "форум дент чиш вә еғиз саламәтлики мәркизи" намида йеңи дохтурханисини ечип, өзлириниң кәспи саһәсидики йеңи мувәппәқийәтлирини йәнә бир пәллә юқири көтүргәнликини намаян қилди.

Бу, түркийәдики уйғурларниң һаятидики муһим йеңилиқлардин бири һесаблиниду. 10-Айниң 23-күни мәзкур дохтурханиниң ечилип иш башлаш мурасими өткүзүлгән болуп, мәзкур мурасимға "ийи" партийәсидин болған парламент әзаси фаһрәттин йоқуш әпәнди, "бүйүк бирлик" партийәси муавин рәиси алий кесәр әпәнди, "келәчәк" партийәси муавин рәиси фатма мараш ханим, дуня уйғур қурултийи рәһбәрлири, шәрқий түркистан тәшкилатлар бирлики рәиси һидайәттулла оғузхан әпәнди вә абдукерим буғра билән аминә буғраниң оқутқучилири, кәсипдаш достлири шуниңдәк түркийәниң һәр қайси җайлиридин кәлгән уйғурлардин болуп көп санда киши иштирак қилди. Ечилиш мурасими әнқәрәдики чоң җамә имаминиң дуаси билән башланди.

"форум дент чиш вә еғиз саламәтлики мәркизи" абдукерим буғра аилисиниң йеқинқи бирқанчә йиллар ичидә ачқан иккинчи дохтурхана болуп, йеңидин ечилған мәзкур дохтурханида 5 чиш дохтури вә башқа хадимлар хизмәт қилидикән.

Доктор абдукерим буғра билән аяли доктор аминә буғра
Доктор абдукерим буғра билән аяли доктор аминә буғра "форум дент чиш вә еғиз саламәтлики мәркизи" намида ачқан чиш дохтурханисиниң ечилиш мурасимида лента кесиш мурасими. 2021-Йили 23-өктәбир, әнқәрә.

Абдукерим буғра билән аяли аминә буғра 2000-йилларда уйғур елидин түркийәгә оқушқа келип, тиришип оқуп магистирлиқ вә докторлуқ унвани елип нәтиҗә қазанған уйғурлардин һесаблиниду.

Түркийәниң пайтәхти әнқәрә шәһириниң кечиөрән районида ечилған "форум дент чиш вә еғиз саламәтлики мәркизи" ниң иш башлаш мурасимида дохтур абдукерим буғра әпәнди билән униң аяли доктор аминә ханимни зиярәт қилдуқ.

Абдукерим буғраниң баян қилишичә, у 1977-йили 9-айниң 1-күни қаримай шәһиридә туғулған. 1978-Йили дадисиниң хизмити мунасивити билән поскам нефитликигә көчүп барған. Башланғуч вә толуқсиз оттура мәктәпни поскамда оқуғандин кейин хитайниң нәнҗиң шәһиригә толуқ оттура мәктәпни оқуш үчүн әвәтилгән. Тунҗи қарар ичкири хитайда толуқ оттура мәктәптә оқуш үчүн әвәтилгән 32 оқуғучи арисидин орун алған абдукерим буғра 1996-йили бейҗиң мәркизи милләтләр университетиниң тәйярлиқ синипида бир йил оқуған. 1997-Йилидин 2002-йилиғичә шинҗаң теббий университетиниң чиш вә еғиз бошлуқи факултетида оқуған. 2005-Йили магистир вә докторлуқ унвани үчүн оқуш мәқситидә түркийәгә кәлгән абдукерим буғра әпәнди 2013-йили әнқәрә ғази университети чиш дохтурилиқ факултетиниң еғиз бошлуқини давалаш вә түзәш кәспидә докторлуқ унвани алди.

Доктор абдукерим буғра билән аяли доктор аминә буғра
Доктор абдукерим буғра билән аяли доктор аминә буғра "форум дент чиш вә еғиз саламәтлики мәркизи" намида ачқан чиш дохтурханисиниң үскүнилириниң бири. 2021-Йили 23-өктәбир, әнқәрә.

Доктор абдукерим буғра әпәнди, һазирғичә көп санда хәлқаралиқ илмий муһакимә йиғинлириға қатнашқандин сирт йәнә өзи явропа өлчәмлиригә тошидиған 2 дохтурхана ечиш сәвийәсигә йәткән. У, өз кәспидә мувәппәқийәтләрни қолға кәлтүргәндин сирт шәрқий түркистан тәтқиқат вәхписиниң қурғучилири ичидин орун елип, мәзкур вәхпиниң рәислик вәзиписини өтмәктә. У, уйғур дәвасиғиму зор төһпиләрни қошуватқан уйғур зиялийлиридин бири һесаблиниду.

Аминә ханим зияритимиз җәрянида өзиниң қисқичә һаят мусаписи һәққидә мәлумат бәрди. У, 1979-йили үрүмчидә туғулған болуп, 1997-йилидин 2003-йилиғичә бейҗиң университети еғиз бошлуқи давалаш кәспидә оқуған. У, үрүмчидики 2-дохтурханида бир мәзгил ишлигәндин кейин түркийәгә келип оқуп чиш дохтурилиқ кәспидә магистирлиқ вә докторлуқ унвани алған. .

Абдукерим буғра әпәнди түркийәдә оқуш җәрянида көп қийинчилиқларға дуч кәлгәнликини, лекин җапа-мушәққәттин қорқмай тиришип өгиниш арқилиқ мувәппәқийәтлик болғанлиқини, һәрқандақ киши, җүмлидин уйғур яшлири пәқәт тиришсила мувәппәқийәт қазиналайдиғанлиқини баян қилди.

Дохтурханиниң ечилиш мурасимиға иштирак қилған шәрқий түркистан тәшкилатлар бирлики рәиси һидайәтулла оғузхан абдукерим буғраниң кәспий җәһәттин мувәппәқийәт қазинипла қалмастин бәлки уйғурларниң сиясий тәқдиригиму баш қатуруп келиватқан, өрнәклик бир зиялий икәнликини билдүрди.

Әрзурумдики ататүрк университети чиш дохтурилиқ кәспини пүттүргән абдуқеюм әпәнди чиш дохтурилиқ кәспи бойичә оқуп таки докторлуқ унваниғичә еришишниң бәк қийин вә узун мусапә икәнликини, абдукерим вә униң аялидин башқа түркийәдә бу кәсиптә докторлуқ унвани алған уйғурниң йоқ икәнликини, буларниң икки дохтурхана ечишиниң пәхирлинишкә тегишлик иш икәнликини баян қилди.

Абдукерим буғра 2015-йили 30-май күни түркийәниң ички анатолийә районидики қиршәһир шәһиридә "инҗи чиш вә еғиз саламәтлики мәркизи" ни ачқан вә қисқа вақит ичидә униң кәспи қабилийити вә дохтурхана мулазимитидә шу җайдики хәлқниң алқишиға еришип дохтурханиси тәрәққий қилиш вә барғансери кеңийиш дәриҗисигә қарап йүзләнгәниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт