D u q yawro'asiya yazghuchilar birlikining Uyghur edebiyati üchün körsetken xizmetlirini teqdirlep médal teqdim qilghan

Ixtiyariy muxbirimiz erkin tarim
2022-05-16
Share
D u q yawro'asiya yazghuchilar birlikining Uyghur edebiyati üchün körsetken xizmetlirini teqdirlep médal teqdim qilghan Yawro'asiya yazghuchilar birlikining re'isi doktor yaqup ömer'oghlugha ependi yighinda sözge teklip qilindi. 2022-Yili 13-may, istanbul.
Photo: RFA

Dunya Uyghur qurultiyi muhajirette Uyghur edebiyati üchün töhpe qoshqan bir qisim shexisler we uyushmilargha médal teqdim qildi. Bu munasiwet bilen 2022-yili 5-ayning 13-küni türkiye paytexti enqerede mexsus murasim ötküzülüp, yawro'asiya yazghuchilar birlikining re'isi doktor yaqup ömer'oghlugha “Shükran médali” bérildi we ton kéydürüldi. Murasimda yawrosiya yazghuchilar birliki teripidin neshir qilin'ghan Uyghur sha'iri mutellip seydullaning “Soghuq qirghaq” namliq shé'irlar toplimi tonushturuldi.

Dunya Uyghur qurultiyining re'isi dolqun eysa ependining teshebbusi bilen istanbulda pa'aliyet élip bériwatqan dunya Uyghur qurultiyi wexpisi uyushturghan mezkur yighin'gha yawro'asiya yazghuchilar birlikining re'isi doktor yaqup ömer'oghlu bashchiliqidiki yazghuchilar, sha'irlar, uniwérsitétlerde Uyghur tili we edebiyati tetqiqati bilen shughulliniwatqan mutexessisler, Uyghur tili boyiche doktorluq we magéstirliq oquwatqan oquchilar hemde Uyghur ziyaliylardin bolup, 60 etrapida kishi qatnashti.

Yawro'asiya yazghuchilar birlikining re'isi doktor yaqup ömer'oghlugha “Shükran médali” bérildi we ton kiydürüldi. 2022-Yili 13-may, istanbul.
Yawro'asiya yazghuchilar birlikining re'isi doktor yaqup ömer'oghlugha “Shükran médali” bérildi we ton kiydürüldi. 2022-Yili 13-may, istanbul.
RFA/Erkin Tarim

Yighinda aldi bilen d u q wexpisining re'isi abdureshit abdulxemit ependi d u q re'isi dolqun eysa ependining salamini yetküzgendin kéyin, yawro'asiya yazghuchilar birlikining Uyghur edebiyati üchün qilghan xizmetliri toghrisida melumat bérip ötti. U mundaq dédi: “Xitay hökümiti Uyghur tilidiki milliy ma'aripni cheklep, Uyghur yazghuchi, sha'irlarni lagér we türmilerge tashlawatqan bügünki künde, Uyghur edebiyatining türkiyede tonulushida zor töhpilerni qoshqan doktor yaqup ömer'oghlugha rehmet éytish üchün bu murasimni ötküzüwatimiz. Yawro'asiya yazghuchilar birliki bügün'giche qazaqistanliq Uyghur yazghuchi exmetjan ashirining ‛idiqut‚ namliq tarixiy romanini, tonulghan yazghuchi merhum xéwir tömürning ‛baldur oyghan'ghan adem‚ namliq tarixiy romanini, merhum yazghuchi zordun sabirning ‛ana yurt‚ namliq romanini türk tiligha terjime qildurup, neshir qildurdi. Bulardin sirt norwégiyede turuwatqan Uyghur sha'iri mutellip seydullaning ikki shé'irlar toplimini türk tilida neshir qildurdi. Uningdin bashqa yene Uyghur sha'iri abduxaliq Uyghur bilen abdurehim ötkürning hayati tonushturulghan höjjetlik kino ishlep tarqatti. Yawro'asiya yazghuchilar birliki qurulghan kündin tartip her yili ‛xelq'ara mehmud kashgheri hékaye yézish musabiqisi‚ ötküzüp, Uyghur élining tonulushigha zor töhpe qoshmaqta. Bulardin sirt yawro'asya yazghuchilar uyushmisi neshir qiliwatqan ‛tughqan qelemler‚ namliq tor zhurnilida Uyghur edebiyati torghisida nurghun tetqiqat maqalisi élan qilindi. Biz dunya Uyghur qurultiyi wexpisi bolush süpitimiz bilen ularning qilghan bu xizmetlirige rehmet éytimiz.”

Murasimning küntertipi boyiche médal teqdim qilinip, ton we doppa kéydürülgen yaqup ömer'oghlu özining minnetdarliqini bildürüp, söz qildi. U sözide d u q ning xelq'arada Uyghurlargha wekillik qiliwatqan eng muhim teshkilat ikenlikini, d u q re'isi dolqun eysa ependini 1995-yilidin tartip tonuydighanliqini, bundin kéyinmu yawro'asiya yazghuchilar birlikining Uyghur edebiyatining türkiye we ottura asya türkiy jumhuriyetliride téximu köp tonutulishi üchün töhpe qoshushqa tirishidighanliqini tekitlidi. U sözini mundaq dawamlashturdi: “Yawro'asiya yazghuchilar birlikige rehmet éytish üchün bu pa'aliyetni uyushturghanliqinglargha köp rehmet! biz Uyghurlar üchün, Uyghur edebiyati üchün téximu köp xizmetlerni qilishni arzu qilimiz. Lékin imkaniyetimiz taza yar bermidi. Shundaq bolsimu biz 16 yildin buyan Uyghur edebiyatini türkiyede tonutush üchün tiriship kelduq. Bundin kéyinmu biz Uyghur edebiyatini türk dunyasida, bolupmu türkiye tonutush üchün téximu köp edebiy eserlerni neshir qildurushni oylishiwatimiz. Uyghur sha'ir we yazghuchilarning biz bilen yenimu hemkarlishishini ümid qilimiz.”

Norwégiyede yashawatqan sha'ir mutellip seyidullaning “Soghuq qirghaq” namliq shé'irlar toplimini tonushturush we yawro'asiya yazghuchilar birlikige rehmet éytish murasimi axirlashqandin kéyin, biz yighin'gha ishtirak qilghan enqerediki yildirim beyazit uniwérsitétining oqutquchisi nametjan memet ependini ziyaret qilduq. U Uyghur edebiyatini türkiyede tonushturushning ehmiyitining zor ikenlikini bayan qildi.

Yawro'asiya yazghuchilar birliki 2006-yili türkiye paytexti enqerede qurulghan bolup, ottura asiya türkiy jumhuriyetliri, rusye fédératsiyesi we herqaysi döletlerdiki türkiy milletlerdin bolghan yazghuchi we sha'irlar eza bolghan teshkilattur. Yawro'asiya yazghuchilar birlikining bashqurushi astida “Ben'gü neshriyati” bilen “Qérindash qelemler” namidiki zhurnal bar bolup, ular türkiy milletlerdin bolghan yazghuchi we sha'irlarning eserlirini tallap türkchige tejime qildurup, neshir qilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet