Германийәдә "явропа уйғур әркинлик лоңқисини талишиш путбол мусабиқиси" өткүзүлди

Ихтиярий мухбиримиз әкрәм
2019-06-17
Share

Дуня уйғур қурултийиниң маддий вә мәниви җәһәтләрдин қоллиши, явропа шәрқий түркистан бирликиниң уюштуруши билән 6-айниң 15-16-күнлири германийәниң мюнхен шәһиридә "явропа уйғур әркинлик лоңқисини талишиш мусабиқиси" нәтиҗилик өткүзүлди.

Бу мусабиқә башлиништин илгири һәрқайси дөләтләрдин кәлгән командиларниң әзалири һәмдә әнәниви уйғур миллий кийимлирини кийгән мюнхендики уйғур ана тил мәктипиниң оқутқучи-оқуғучилири уйғурчә музика садаси ичидә ай-юлтузлуқ көк байрақ билән өз дөлитиниң байрақлирини көтүргән һалда параттин өтти. Мусабиқигә саһипхан болған явропа шәрқий түркистан бирликиниң рәиси әсқәрҗан әпәндиниң баян қилишичә, бу мусабиқигә 6 дөләттин 100 дин артуқ команда әзаси қәдәм тәшрип қилған икән. 

Бу қетимқи мусабиқә шәрқий түркистанниң истиқлал марши билән башланди. Йүзләрчә команда әзалири вә тамашибинлар қоллирини көксигә қоюп миллий маршқа болған һөрмәт-еһтирамлирини билдүрди. 

Д у қ рәиси долқун әйса, илһам тохти гурупписиниң рәиси әнвәрҗан һәмдә чәтәлләрдин кәлгән бәзи муһим меһманлар вә баварийә парламентиниң рәһбәрлириму бу қетимқи мусабиқиниң ечилиш мурасимиға қатнашти. Баварийә парламентиниң муавин рәиси маркус рендибачер әпәнди ечилиш мурасимида сөз елип, бу қетимқи мусабиқини қизғин тәбрикләйдиғанлиқини, өзиниң һәрқачан уйғур миллий дәвасини қоллайдиғанлиқини, җаза лагерлириниң тақилиши үчүн қолидин келишичә тиришчанлиқ көрситидиғанлиқини ипадә қилди. 
15-Июндики ечилиш мурасимидин кейин тунҗи мәйдан мусабиқини германийә уйғур командиси билән фирансийә уйғур командиси башлиди. Қериндашлиқ сөйгүси вә муһәббәт ичидә 2 күн давамлашқан бу мусабиқидә шиветсийә командиси биринчиликкә, норвегийә командиси иккинчиликкә, белгийә командиси үчинчиликкә еришти. Д у қ рәиси долқун әйса әпәнди нәтиҗә қазанған командиларни д у қ намидин маддий җәһәттин тәқдирлиди һәмдә мукапат лоңқиси тәқдим қилди.

Бу қетимқи мусабиқә һәққидә тохталған илһам тохти гурупписиниң рәиси әнвәрҗан әпәнди бундақ бир мусабиқини уюштуруштики мәқсәт вә униң әһмийити һәққидә қарашлирини баян қилип өтти. Д у қ ниң муавин рәиси пәрһат муһәммиди әпәнди мусабиқиниң наһайити қизғин кәйпият ичидә давам қилғанлиқини тилға алди. 

Уйғур җамаәт әрбаби аблимит турсун әпәнди "явропа уйғур әркинлик лоңқисини талишиш путбол мусабиқиси" үчүн кәлгән меһманларни яхши күтүвелиш үчүн мюнхендики уйғур җамаитиниң һәр җәһәттин көп хизмәтләрдә болғанлиқини әскәртти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт