Gérmaniyede “Yawropa Uyghur erkinlik longqisini talishish putbol musabiqisi” ötküzüldi

Dunya Uyghur qurultiyining maddiy we meniwi jehetlerdin qollishi, yawropa sherqiy türkistan birlikining uyushturushi bilen 6-ayning 15-16-künliri gérmaniyening myunxén shehiride “Yawropa Uyghur erkinlik longqisini talishish musabiqisi” netijilik ötküzüldi.

Bu musabiqe bashlinishtin ilgiri herqaysi döletlerdin kelgen komandilarning ezaliri hemde en'eniwi Uyghur milliy kiyimlirini kiygen myunxéndiki Uyghur ana til mektipining oqutquchi-oqughuchiliri Uyghurche muzika sadasi ichide ay-yultuzluq kök bayraq bilen öz dölitining bayraqlirini kötürgen halda parattin ötti. Musabiqige sahipxan bolghan yawropa sherqiy türkistan birlikining re'isi esqerjan ependining bayan qilishiche, bu musabiqige 6 dölettin 100 din artuq komanda ezasi qedem teshrip qilghan iken. 

Bu qétimqi musabiqe sherqiy türkistanning istiqlal marshi bilen bashlandi. Yüzlerche komanda ezaliri we tamashibinlar qollirini köksige qoyup milliy marshqa bolghan hörmet-éhtiramlirini bildürdi. 

D u q re'isi dolqun eysa, ilham toxti guruppisining re'isi enwerjan hemde chet'ellerdin kelgen bezi muhim méhmanlar we bawariye parlaméntining rehberlirimu bu qétimqi musabiqining échilish murasimigha qatnashti. Bawariye parlaméntining mu'awin re'isi markus réndibachér ependi échilish murasimida söz élip, bu qétimqi musabiqini qizghin tebrikleydighanliqini, özining herqachan Uyghur milliy dewasini qollaydighanliqini, jaza lagérlirining taqilishi üchün qolidin kélishiche tirishchanliq körsitidighanliqini ipade qildi. 
15-Iyundiki échilish murasimidin kéyin tunji meydan musabiqini gérmaniye Uyghur komandisi bilen firansiye Uyghur komandisi bashlidi. Qérindashliq söygüsi we muhebbet ichide 2 kün dawamlashqan bu musabiqide shiwétsiye komandisi birinchilikke, norwégiye komandisi ikkinchilikke, bélgiye komandisi üchinchilikke érishti. D u q re'isi dolqun eysa ependi netije qazan'ghan komandilarni d u q namidin maddiy jehettin teqdirlidi hemde mukapat longqisi teqdim qildi.

Bu qétimqi musabiqe heqqide toxtalghan ilham toxti guruppisining re'isi enwerjan ependi bundaq bir musabiqini uyushturushtiki meqset we uning ehmiyiti heqqide qarashlirini bayan qilip ötti. D u q ning mu'awin re'isi perhat muhemmidi ependi musabiqining nahayiti qizghin keypiyat ichide dawam qilghanliqini tilgha aldi. 

Uyghur jama'et erbabi ablimit tursun ependi “Yawropa Uyghur erkinlik longqisini talishish putbol musabiqisi” üchün kelgen méhmanlarni yaxshi kütüwélish üchün myunxéndiki Uyghur jama'itining her jehettin köp xizmetlerde bolghanliqini eskertti.