Уйғур һәрикити тәшкилати җәнвәдә уйғурлар һәққидә бир қатар паалийәтләр елип барған

Ихтиярий мухбиримиз әркин тарим
2022.04.11
Уйғур һәрикити тәшкилати җәнвәдә уйғурлар һәққидә бир қатар паалийәтләр елип барған Уйғур һәрикити тәшкилатниң рәиси рошән аббас, уйғур тәтқиқат мәркизиниң мудири абдулһеким идрис американиң җәнвәдики б д т да турушлуқ алаһидә әлчиси билән көрүшти. 2022-Йили 8-апрел.
RFA/Erkin Tarim

Уйғур һәрикити тәшкилатниң рәиси рошән аббас, уйғур тәтқиқат мәркизиниң мудири абдулһеким идрис иккийлән шиветсарийәниң җәнвә шәһиридә бир қатар паалийәтләрдә болған. Улар американиң җәнвәдики бирләшкән дөләтләр тәшкилатида турушлуқ алаһидә әлчисиниң уюштуруши билән юмилақ үстәл йиғиниға қатнишип сөз қилған. Американиң баш әлчиси риясәтчилик қилған йиғинға онға йеқин дөләтниң бирләшкән дөләтләр тәшкилатида вәзипә өтәватқан дипломатлири иштирак қилған.

4-Айниң 8-күни өткүзүлгән юмилақ үстәл йиғинида уйғурларниң һазирқи еғир вәзийити, хитайниң уйғурларға елип бериватқан ирқий қирғинчилиқ сиясити вә дунядики һәр қайси әлләрниң буниңға болған позитсийиси вә тәдбирлири тоғрисида мәлумат берилгән. Униңдин сирт, буниңдин кейин бирләшкән дөләтләр тәшкилатиниң бу һәқтә немәләрни қилиши керәклики тоғрисидики тәләпләрму оттуриға қоюлған.

Абдулһеким идрис әпәнди мәзкур йиғин тоғрисида мәлумат берип, мундақ деди: “җәнвәдә өткүзүлгән юмилақ үстәл йиғинида, йиғин әһли биздин хитайниң уйғурларға қарита елип бериватқан ирқий қирғинчилиқи һәққидә соаллар сориди, биз тәпсилий җаваб бәрдуқ. Болупму аталмиш уйғур аптоном райони компартийисиниң баш секретари чен чуәнгониң орниға ма шиңруй кәлгәндин кейинму ирқий қирғинчилиқниң давамлишиватқанлиқини тәкитләп өттуқ.”

Абдулһеким идрис әпәнди муһим дипломатлар иштирак қилған юмилақ үстәл йиғинида йәнә бәзи муһим мәсилиләр тоғрисидиму сөз болғанлиқини оттуриға қоюп, мундақ деди: “бирләшкән дөләтләр тәшкилати кишилик һоқуқ алий комисарлиқи уйғурлар тоғрисида өткән йили елан қилишқа тегишлик доклатни техичә елан қилмиған, әмма өткән үч йилда америкадики кишилик һоқуқ дәпсәндичилики тоғрисида 9 қетим доклат елан қилған икән. Уйғур, қазақ қатарлиқ түркий хәлқләрдин 3 милйондин көп кишини җаза лагерлириға қамиған, аялларни туғмас қиливатқан, уйғур хәлқини мәҗбурий әмгәккә селиватқан хитай тоғрисида елан қилишқа тегишлик болған кишилик һоқуқ дәпсәндичилики тоғрисидики доклатниң техиғичә елан қилинмиғанлиқидин әпсусланғанлиқимизни тәкитлидуқ.”

Абдулһеким идрис әпәнди 8-апрел күни чүштин бурун америка әлчисиниң риясәтчиликидә уюштурулған бу йиғиндин сирт, шиветсарийәниң пайтәхти җәнвә шәһиридики мунасивәтлик органлар вә хәлқаралиқ кәчүрүм тәшкилатиниң мәсуллири биләнму көрүшүп, бундин кейин қандақ һәмкарлишиш тоғрисидиму музакирә елип берилғанлиқини оттуриға қойди.

Абдулһеким идрис әпәнди гәрчә һазир русийәниң украинаға бесип кириши, дуняниң қизиқ нуқтисида туруватқан болсиму, әмма җәнвәдә уйғур қирғинчилиқиниңму изчил һалда күнтәртипкә келиватқанлиқидин хурсән болғанлиқини билдүрди.

Уйғур һәрикити тәшкилатниң рәиси рошән аббас ханимниң ейтишичә, һазирғичә голландийә, белгийә, испанийә, фирансийә түркийә вә чехийә қатарлиқ ондин артуқ дөләттә бу хил паалийәтләр елип берилған. Бу җәнвәдә өткүзүлгән тунҗи қетимлиқ паалийәт икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.