Uyghur herikiti teshkilati jenwede Uyghurlar heqqide bir qatar pa'aliyetler élip barghan

Ixtiyariy muxbirimiz erkin tarim
2022.04.11
Share on WhatsApp
Share on WhatsApp
Uyghur herikiti teshkilati jenwede Uyghurlar heqqide bir qatar pa'aliyetler élip barghan Uyghur herikiti teshkilatning re'isi roshen abbas, Uyghur tetqiqat merkizining mudiri abdulhékim idris amérikaning jenwediki b d t da turushluq alahide elchisi bilen körüshti. 2022-Yili 8-aprél.
RFA/Erkin Tarim

Uyghur herikiti teshkilatning re'isi roshen abbas, Uyghur tetqiqat merkizining mudiri abdulhékim idris ikkiylen shiwétsariyening jenwe shehiride bir qatar pa'aliyetlerde bolghan. Ular amérikaning jenwediki birleshken döletler teshkilatida turushluq alahide elchisining uyushturushi bilen yumilaq üstel yighinigha qatniship söz qilghan. Amérikaning bash elchisi riyasetchilik qilghan yighin'gha on'gha yéqin döletning birleshken döletler teshkilatida wezipe ötewatqan diplomatliri ishtirak qilghan.

4-Ayning 8-küni ötküzülgen yumilaq üstel yighinida Uyghurlarning hazirqi éghir weziyiti, xitayning Uyghurlargha élip bériwatqan irqiy qirghinchiliq siyasiti we dunyadiki her qaysi ellerning buninggha bolghan pozitsiyisi we tedbirliri toghrisida melumat bérilgen. Uningdin sirt, buningdin kéyin birleshken döletler teshkilatining bu heqte némelerni qilishi kérekliki toghrisidiki teleplermu otturigha qoyulghan.

Abdulhékim idris ependi mezkur yighin toghrisida melumat bérip, mundaq dédi: “Jenwede ötküzülgen yumilaq üstel yighinida, yighin ehli bizdin xitayning Uyghurlargha qarita élip bériwatqan irqiy qirghinchiliqi heqqide so'allar soridi, biz tepsiliy jawab berduq. Bolupmu atalmish Uyghur aptonom rayoni kompartiyisining bash sékrétari chén chu'en'goning ornigha ma shingruy kelgendin kéyinmu irqiy qirghinchiliqning dawamlishiwatqanliqini tekitlep öttuq.”

Abdulhékim idris ependi muhim diplomatlar ishtirak qilghan yumilaq üstel yighinida yene bezi muhim mesililer toghrisidimu söz bolghanliqini otturigha qoyup, mundaq dédi: “Birleshken döletler teshkilati kishilik hoquq aliy komisarliqi Uyghurlar toghrisida ötken yili élan qilishqa tégishlik doklatni téxiche élan qilmighan, emma ötken üch yilda amérikadiki kishilik hoquq depsendichiliki toghrisida 9 qétim doklat élan qilghan iken. Uyghur, qazaq qatarliq türkiy xelqlerdin 3 milyondin köp kishini jaza lagérlirigha qamighan, ayallarni tughmas qiliwatqan, Uyghur xelqini mejburiy emgekke séliwatqan xitay toghrisida élan qilishqa tégishlik bolghan kishilik hoquq depsendichiliki toghrisidiki doklatning téxighiche élan qilinmighanliqidin epsuslan'ghanliqimizni tekitliduq.”

Abdulhékim idris ependi 8-aprél küni chüshtin burun amérika elchisining riyasetchilikide uyushturulghan bu yighindin sirt, shiwétsariyening paytexti jenwe shehiridiki munasiwetlik organlar we xelq'araliq kechürüm teshkilatining mes'ulliri bilenmu körüshüp, bundin kéyin qandaq hemkarlishish toghrisidimu muzakire élip bérilghanliqini otturigha qoydi.

Abdulhékim idris ependi gerche hazir rusiyening ukra'inagha bésip kirishi, dunyaning qiziq nuqtisida turuwatqan bolsimu, emma jenwede Uyghur qirghinchiliqiningmu izchil halda küntertipke kéliwatqanliqidin xursen bolghanliqini bildürdi.

Uyghur herikiti teshkilatning re'isi roshen abbas xanimning éytishiche, hazirghiche gollandiye, bélgiye, ispaniye, firansiye türkiye we chéxiye qatarliq ondin artuq dölette bu xil pa'aliyetler élip bérilghan. Bu jenwede ötküzülgen tunji qétimliq pa'aliyet iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.