Хитай уйғур ирқий қирғинчилиқи мәсилисидә франсийәдики мусулманларни алдап кәлгән

Ихтиярий мухбиримиз әкрәм
2022.04.13
Share on WhatsApp
Share on WhatsApp
Хитай уйғур ирқий қирғинчилиқи мәсилисидә франсийәдики мусулманларни алдап кәлгән Уйғур һәрикити тәшкилатиниң директори рошән аббас ханим билән уйғур тәтқиқат мәркизиниң мудири абдулһаким идрис әпәнди американиң фирансийәдә турушлуқ баш әлчиси денис кампбел бавер (иккинчи солда) билән көрүшти. 2022-Йили 12-апрел.
Roshen abbas teminligen

Уйғур тәтқиқат мәркизиниң мудири абдулһаким идрис әпәнди вә уйғур һәрикити тәшкилатиниң директори рушән аббас ханимлар 12-април җәнвәдики паалийәтлирини ахирлаштуруп, франсийә пайтәхти париждики паалийәтлирини башлиған.

Париждин зияритимизни қобул қилған абдулһаким идрис әпәндиниң баян қилишичә, хитайниң франсийәдики баш әлчиханиси франсийәдики мусулманларни уйғур ирқий қирғинчилиқи мәсилисидә изчил алдап кәлгән. У бу һәқтики мәлуматларға 12-април күни париждики чоң мәсчитләрниң мудири, франсийә мәмликәтлик кишилик һоқуқ комитетиниң әзаси шәмсиддин һапиз әпәнди билән учрашқанда еришкән.

Оңдин солға: таҗикистанниң баш әлчиси, мисирниң баш әлчиси, абдулһаким идрис, бенгалниң баш әлчиси, рошән аббас, өзбекистанниң баш әлчиси, иорданийә баш әлчиси вә қатарниң фирансийәдә турушлуқ баш әлчиси. 2022-Йили 12-апрел.
Оңдин солға: таҗикистанниң баш әлчиси, мисирниң баш әлчиси, абдулһаким идрис, бенгалниң баш әлчиси, рошән аббас, өзбекистанниң баш әлчиси, иорданийә баш әлчиси вә қатарниң фирансийәдә турушлуқ баш әлчиси. 2022-Йили 12-апрел.
Roshen abbas teminligen

Абдулһаким идрисниң билдүришичә, шәмсиддин һапиз әпәнди мәтбуатларда тарқиливатқан уйғур ирқий қирғинчилиқиға даир учурларни көргәндин кейин, хитай әлчиханисиға берип, буниңға чүшәнчә беришни тәләп қилған. Хитай әлчиханиси болса уйғур мусулманларниң наһайити бәхтияр, хатирҗәм яшаватқанлиқини, “җаза лагери”, “ирқий қирғинчилиқ” дәйдиған нәрсиләрниң мәвҗут әмәсликини тәрғип қилидиған сахта мәлуматларни әвәтип, уларни алдиған. Буниң биләнла қалмай, хитай әлчиханиси йәнә шәмсиддин һапиз башлиқ мусулманлар рәһбәрлири билән аталмиш уйғур аптонум райониниң рәһбәрлири арисида син көрүнүшлүк бир сөһбәт уюштуруп, алдамчилиқлирини давамлаштурған.

Абдулһаким идрис шәмсиддин һапиз әпәндигә уйғур дияриниң һәқиқий вәзийитини аңлитип хитайниң әпти-бәширисини ечип бәргән. У бу рамазан мәзгилидә роза тутуштин вә ибадәт қилиштин мәһрум қеливатқан шәрқий түркистан мусулманлири үчүн франсийә мәсчитлиридики хутбиларда дуалар қилишни орунлаштурушни тәләп қилған.

Абдулһаким идрис, рушән аббасларниң 12-априлдики муһим учришишлиридин йәнә бирси, уйғур ирқий қирғинчилиқи мәсилисигә көңүл бөлүш пикридә чиң турғанлиқи үчүн б д т дики хизмитидин айрилип қалған емма ханим билән өткүзүлгән учришиш болған. Емма ханим уларға әркин асия радийоси уйғур бөлүминиң мухбирлири вә д у қ ниң рәиси долқун әйсаниң уруғ-туғқанлириниң қолға елинишиға б д т ниң хитайға тәминлигән мәлуматлириниң сәвәб болғанлиқини сөзләп бәргән һәмдә хитайниң б д т ни қандақ қолға киргүзивалғанлиқи тоғрисида тохталған.

Абдулһаким идрис әпәнди сөзидә, 13-април кәчтә америка баш әлчиси тәрипидин өткүзүлгән иптарлиқ паалийәтниң наһайити муһим бир сорун болғанлиқини, көплигән мусулман рәһбәрлири қатнишидиған бу сорунға америка әлчиханисиниң өзлирини алаһидә тәклип қилғанлиқини тилға алди. Рушән аббас ханим болса бу иптар соруниға дахил болған бир қисим мусулман дөләтләрниң рәһбәрлири билән айрим-айрим учришип, шәрқий түркистан мәсилисини аңлитиш пурситигә еришкәнликини тәкитләп өтти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.