«Уйғур һәрикити» тәшкилати явропа әллирини уйғур мәсилисидә америка билән бир сәптә турушқа чақирмақта

Ихтиярий мухбиримиз әкрәм
2019-10-10
Елхәт
Пикир
Share
Принт
Америкадики «уйғур һәрикити» тәшкилатиниң рәиси рошән аббас ханим американиң данийәдики әлчиси карла сандс ханим билән. 2019-Йили 9=өктәбир, копенһаген.
Америкадики «уйғур һәрикити» тәшкилатиниң рәиси рошән аббас ханим американиң данийәдики әлчиси карла сандс ханим билән. 2019-Йили 9=өктәбир, копенһаген.
Photo: RFA

Америкадики «уйғур һәрикити» тәшкилати йеқиндин буян өз паалийәтлирини явропа әллиригә кеңәйткән болуп, явропа әллирини уйғур мәсилисидә америка билән бир сәптә турушқа чақирмақта.

Мәзкур тәшкилатиниң рәиси рошән аббас ханим бу мунасивәт билән явропадики 10 күнлүк зияритини 8-өктәбир күни данийә пайтәхти копенһагендин башлиған.

Рошән аббас ханим данийәниң копенһаген вә алборг қатарлиқ икки чоң шәһиридә җаза лагерлириға мунасивәтлик учришишларға вә йиғинларға тәклип қилинған. Униң 9-сентәбир копенһагендин бәргән мәлуматлириға қариғанда, у бүгүн бирқанчә муһим сөһбәтләргә дахил болған.

Рошән ханим «уйғур һәрикити» тәшкилатиниң бу қетим явропадики паалийәтлириниң мәқсити һәққидә тохтилип, мундақ деди: «асаслиқ мәқситимиз явропадиму америкадикигә охшаш һөкүмәт органлири билән хәлқ арисида хитайға қарши юқири сада пәйда қилиш, болупму явропа иттипақиға әза дөләтләрни хитайниң җаза лагерлириға қарши америка билән бир сәптә турушқа үндәштин ибарәт.»

Рошән аббас ханимниң 9-өктәбирдики муһим сөһбәтлириниң бири американиң данийәдики әлчиханисиға орунлаштурулған. У әлчиләргә җаза лагерлириниң нөвәттики вәзийити тоғрисида мәлумат бериш билән биргә америка һөкүмитиниң алдинқи икки күн ичидә елан қилған хитайға қарши җаза тәдбирлиридин уйғурларниң көп мәмнун болғанлиқини билдүрүп өткән. Бу сөһбәттин кейин баш әлчи бирқанчә дөләтниң дипломатлири билән биргә уни шәхсий туралғусидики зияпәткә тәклип қилған.

Америка һөкүмитиниң алдинқи күни елан қилған хитайға қарши җаза тәдбирлиригә қарита д у қ ниң сабиқ рәиси әркин алиптикин әпәнди өз мәмнунийәтлирини билдүрди. У йәнә америка һөкүмитиниң америкадики уйғур тәшкилатлириға хитайдики җаза лагерлириға қарши паалийәтләр үчүн сорун һазирлап бериватқанлиқини алаһидә әскәртип өтти.

«Уйғур һәрикити» тәшкилатиниң рәиси рошән аббас ханимниң копенһагендики паалийәтлири бәзи ақиллар амбириниң мутәхәссислири биләнла чәклинип қалмиған. У йәнә данийә вә башқа дөләтләрдики уйғурлар вә җаза лагерлири мәсилисини мәхсус тәтқиқ қиливатқан бәзи тәтқиқатчилар биләнму учрашқан.

«Уйғур һәрикити» тәшкилатиниң рәиси рошән аббас ханим данийәдики 4 күнлүк паалийитини тамамлиғандин кейин, алдимиздики күнләрдә йәнә чех җумһурийити вә белгийә қатарлиқ дөләтләрдә болидикән.

Пикирләр (0)
Share
Толуқ бәт