"Uyghur herikiti" teshkilati yawropa ellirini Uyghur mesiliside amérika bilen bir septe turushqa chaqirmaqta

Ixtiyariy muxbirimiz ekrem
2019-10-10
Élxet
Pikir
Share
Print
Amérikadiki "Uyghur herikiti" teshkilatining re'isi roshen abbas xanim amérikaning daniyediki elchisi karla sands xanim bilen. 2019-Yili 9=öktebir, kopénhagén.
Amérikadiki "Uyghur herikiti" teshkilatining re'isi roshen abbas xanim amérikaning daniyediki elchisi karla sands xanim bilen. 2019-Yili 9=öktebir, kopénhagén.
Photo: RFA

Amérikadiki "Uyghur herikiti" teshkilati yéqindin buyan öz pa'aliyetlirini yawropa ellirige kéngeytken bolup, yawropa ellirini Uyghur mesiliside amérika bilen bir septe turushqa chaqirmaqta.

Mezkur teshkilatining re'isi roshen abbas xanim bu munasiwet bilen yawropadiki 10 künlük ziyaritini 8-öktebir küni daniye paytexti kopénhagéndin bashlighan.

Roshen abbas xanim daniyening kopénhagén we alborg qatarliq ikki chong shehiride jaza lagérlirigha munasiwetlik uchrishishlargha we yighinlargha teklip qilin'ghan. Uning 9-séntebir kopénhagéndin bergen melumatlirigha qarighanda, u bügün birqanche muhim söhbetlerge daxil bolghan.

Roshen xanim "Uyghur herikiti" teshkilatining bu qétim yawropadiki pa'aliyetlirining meqsiti heqqide toxtilip, mundaq dédi: "Asasliq meqsitimiz yawropadimu amérikadikige oxshash hökümet organliri bilen xelq arisida xitaygha qarshi yuqiri sada peyda qilish, bolupmu yawropa ittipaqigha eza döletlerni xitayning jaza lagérlirigha qarshi amérika bilen bir septe turushqa ündeshtin ibaret."

Roshen abbas xanimning 9-öktebirdiki muhim söhbetlirining biri amérikaning daniyediki elchixanisigha orunlashturulghan. U elchilerge jaza lagérlirining nöwettiki weziyiti toghrisida melumat bérish bilen birge amérika hökümitining aldinqi ikki kün ichide élan qilghan xitaygha qarshi jaza tedbirliridin Uyghurlarning köp memnun bolghanliqini bildürüp ötken. Bu söhbettin kéyin bash elchi birqanche döletning diplomatliri bilen birge uni shexsiy turalghusidiki ziyapetke teklip qilghan.

Amérika hökümitining aldinqi küni élan qilghan xitaygha qarshi jaza tedbirlirige qarita d u q ning sabiq re'isi erkin aliptikin ependi öz memnuniyetlirini bildürdi. U yene amérika hökümitining amérikadiki Uyghur teshkilatlirigha xitaydiki jaza lagérlirigha qarshi pa'aliyetler üchün sorun hazirlap bériwatqanliqini alahide eskertip ötti.

"Uyghur herikiti" teshkilatining re'isi roshen abbas xanimning kopénhagéndiki pa'aliyetliri bezi aqillar ambirining mutexessisliri bilenla cheklinip qalmighan. U yene daniye we bashqa döletlerdiki Uyghurlar we jaza lagérliri mesilisini mexsus tetqiq qiliwatqan bezi tetqiqatchilar bilenmu uchrashqan.

"Uyghur herikiti" teshkilatining re'isi roshen abbas xanim daniyediki 4 künlük pa'aliyitini tamamlighandin kéyin, aldimizdiki künlerde yene chéx jumhuriyiti we bélgiye qatarliq döletlerde bolidiken.

Toluq bet