Явропа уйғур институти уйғур илмий вә мәдәнийәт алий суписи һазирлашқа тәйярлиқ қилмақта

Мухбиримиз гүлчеһрә
2019-12-05
Елхәт
Пикир
Share
Принт
Дилнур рәйһан ханим өзиниң иҗтимаий таратқуларда явропа уйғур тор ианә пиланини тонуштуруватқан көрүнүш.
Дилнур рәйһан ханим өзиниң иҗтимаий таратқуларда явропа уйғур тор ианә пиланини тонуштуруватқан көрүнүш.
Social Media

Фирансийәдики явропа уйғур институти хизмәт даириси техиму кеңәйтиш пиланлирини ишқа ашурушта парижда бир мәхсус орунни иҗаригә елип, тунҗи қетим явропада уйғур илмий вә мәдәнийәт алий суписи һазирлашқа еһтияҗлиқ болуп, 2019-йил 1-декабир күни рәсмий һалда торда пүтүн дуняға уйғурчә вә башқа тилларда ианә чақириқи башлиған иди. явропа уйғур институтини бир орунға игә қилиш үчүн, йеқинқи күнләрдин буян иҗтимаий тартқуларда мәзкур институтни видийолуқ қоллаш чақириқиға аваз қошуш вә ианә топлаш давам қилмақта.

Явропа уйғур институти он йилдин бери фирансийәдә оғуз уюшмиси намида йүзгә йеқин пидаийларниң күч чиқириши билән уйғур тили вә мәдәнийити үчүн хизмәт қилип кәлгән болуп буниңдин кейин, бир институт намида парижда бир мәхсус орунни иҗаригә елип, тунҗи қетим явропада уйғур илмий вә мәдәнийәт алий суписи һазирлимақчи икән. Институт уйғур тили вә мәдәнийитиниң өлмәслики, давамлиқ раваҗлиниши вә явропада гүллиниши үчүн хизмәт қилишни ғайә қилған болуп, институтниң қурғучиси, бирюссел шәрқшунаслиқ университетида доктор аштилиқ унвани үчүн тәтқиқатқа қатнишиватқан дилнур рәйһан ханим өзиниң иҗтимаий таратқуларға йоллиған чақириқида, өзлириниң муқим орунға игә болғандин кейин бу орундин пайдилинип уйғур тили вә башқа һәрхил дәрсханилири, илмий тәтқиқат йиғинлири, уйғур мәдәнийәт байрамлири, кутупхана, нәшрият вә чайханиларни тәсис қилишни пилан қилғанлиқини илгири сүргән.

Уларниң чақириқиға чәтәлләрдики уйғурлар, уйғурларни тәтқиқ қилғучилар вә қоллиғучилардин башқа хәлқаралиқ органларму қизғин аваз қошуватқан болуп, кишилик һоқуқни көзитиш тәшкилатиниң хитай ишлири директори софи ричардсонму өз намидин видийолуқ қоллаш әвәткән.

Биз дилнур ханимни явропа уйғур институтиниң алдимизда елип бармақчи болған хизмәтлири вә институт дуч кәлгән риқабәтләр һәққидә зиярәт қилдуқ.

У явропа уйғур институтиниң хизмәт даирисиниң техиму кәң, милләт алдидики бурчиниң техиму еғир икәнликини, парижда бир мәхсус орунни тепиштин ибарәт реал бир мәсилини һәл қилмай туруп кейинки пиланларни ишқа ашурушниң қийинлиқини оттуриға қойди. Дилнур ханим йәнә институтниң тапавәт қилмайдиған бир мәдәнийәт орни болуш сүпити билән елип баридиған дәрс сөзләш, илмий тәтқиқат йиғинлирини уюштуруш, уйғур мәдәнийәт байрамлирини өткүзүш, кутупхана, нәшрият орнини қуруш қатарлиқ пиланлирини әмәлгә ашуруш үчүн бир муқим орунға игә болуши керәкликини тәкитлиди. Улар бу иҗаригә алған орунда йәнә чайхана тәсис қилиш арқилиқ һечқандақ иқтисадий капаләт йоқ һаләттә өзиниң чиқимини чайхана кирими арқилиқ тәмин етиштәк пиланниму түзгән.

Дилнур ханимниң ейтишичә, явропа уйғур институти нөвәттә келәр һәптә бирюссел әркинлик университети билән бирлишип, тунҗи қетимлиқ чоң типтики уйғуршунаслиқ илмий муһакимә йиғини вә униңға улап парижда «уйғур кечиси» паалийити өткүзүшкә җиддий тәйярлиқ көрүватқан икән. Униң ейтишичә, явропа уйғур институти «уйғур кечиси» паалийитини 15-декабир ахшам, париждики 850 кишилик «мәрмәр» тиятир залида, фирансийәниң даңлиқ язғучиси, «аммиви мәйдан» партийәси рәиси гафаәл глүкисманниң һәмкарлиқида өткүзидиған болуп, буниңға фирансийәниң даңлиқ артислири, сиясәтчилири тәклип қилинған, мәзкур кечиликниң асаслиқ мәқсити фирансийәликләрни уйғур трагедийәси һәққидә һәрикәткә кәлтүрүштин ибарәт икән.

Явропа уйғур институтиниң қурулуш вә барлиқ паалийәтлири вә хизмәтлиригә йеқиндин ярдәмдә болуватқан бирюссел әркинлик университети профессори ванесса ханим, явропа уйғур институтиниң кеңәйтилгәндин кейин қилидиған хизмәтлириниң әһмийити һәққидә көз қарашлирини оттуриға қойди. Униң билдүрүшичә, институтта нөвәттә 10 ға йеқин пидаий тәтқиқатчи профессорлар халис хизмәт қиливатқан болуп, кәлгүси йәниму көп кишиләрниң күч қатидиғанлиқиға ишәнчи камил икән. Бу институти фирансийәдики уйғурлар вә уларниң пәрзәнтлириниң өз мәдәнийити вә тилини сақлиши һәм раваҗландуруши үчүнму пайдилиқ болупла қалмай, уйғурлар вә уларниң өзгичә мәдәнийитини, тарихини фирансузларға вә башқиларға тонуштурушта муһим рол ойниялайду.

Пикирләр (0)
Share
Толуқ бәт