Явропа уйғур институти уйғур кризиси вә лагерлар һәққидә хәлқаралиқ муһакимә йиғини өткүзди

Мухбиримиз гүлчеһрә
2019-12-12
Елхәт
Пикир
Share
Принт

Явропа уйғур институти билән бирюсселдики һөррийәт университетиниң һәмкарлиқида «уйғур кризиси, лагерлар вә униң һөҗҗәт мәнбәлири һәққидә издиниш» муһакимә йиғини өткүзүлгән.

Мәзкур йиғин франсийидә қурулған явропа уйғур институтиниң қурғучилиридин бири болған тәтқиқатчи дилнур рәйһан билән берюссел һөррийәт университетиниң тәтқиқатчиси ваниса франгвилли ханимниң бирликтә пиланлиши, уйғурлар үстидә тәтқиқат елип бериватқан мутәхәссисләр, көзгә көрүнгән журналистлар, уйғур паалийәтчиләр, университет профессорлири вә оқуғучилириниң иштирак қилиши билән интайин нәтиҗилик ахирлашқан.

Зияритимизни қобул қилған дилнур рәйһан ханим муһакимә йиғининиң интайин әһмийәтлик вә нәтиҗилик болғанлиқини билдүрди. Дилнур ханим бу муһакимини уюштуруштики көзлигән нишанға йәткәнликини билдүрүп, мундақ деди: «дуняниң һәр қайси җайлиридин йиғилған уйғуршунас тәтқиқатчилар, журналистлар вә паалийәтчиләр өзлириниң лагерлар һәққидики издинишлири һәмдә уйғурларниң йеқинқи вәзийити һәққидики пакитлиқ тәтқиқатлирини оттуриға қойди. Бу йиғинда муһакимә вә анализлар арқилиқ хитай һөкүмитиниң уйғур сияситигә даир көз боямчилиқлириниң маһийитини ечип көрситиш вә униңдин агаһ болуш һәққидики нишанимизға йәттуқ, дәп ойлаймән.»

Йиғинға хәлқарада көзгә көрүнгән уйғуршунаслардин райин там, җоһанна смис, тим грос, җин бунин қатарлиқлар өзлириниң йеқинқи издинишлирини оттуриға қойған. Әнгилийәдики мустәқил тәтқиқатчи әзиз әйса әпәнди «җавабсиз қалған телефон» намлиқ һөҗҗәтлик филимни тонуштурған. Уйғур актиплиридин халмурат уйғур муһаҗирәттики уйғурларниң паалийәтлири һәққидә тонуштуруш бәргән. Униңдин башқа йеқинда уйғур диярида зиярәттә болған журналист олси язиҗи, тәтқиқатчи ханна бордоф қатарлиқлар өзлириниң уйғур дияридики зиярити җәрянида шаһит болғанлирини аңлатқан.

Ханна бордоф ханим зияритимизни қобул қилип, өзиниң мәзкур йиғиндин алған тәсиратлирини баян қилди. Ханна өзиниң тунҗи қетим дуняниң һәр қайси җайлиридин кәлгән вә мәтбуатларда исмини аңлиған көплигән уйғуршунаслар билән учрашқанлиқидин бәкму сөйүнгәнликини билдүрди. У мундақ деди: «мән бу муһакимә йиғининиң уйғурлар һәққидә тәтқиқат елип бериватқанларға нисбәтән әң зор әһмийити һәмкарлиқ вә ортақлишишта дәп ойлаймән. Биз бир йәргә келип, ортақ тәтқиқат темилиримизни вә бу һәқтики издинишлиримизни ортақлаштуқ. Уйғурларға аит учур вә пакитлар чәклик болған бүгүнкидәк бир шараитта муһакимигә қоюлған мақалә вә анализларниң кәлгүсидики хизмәтлиримизгә зор ярдими болиду. Мән тәминлигән учурлиримниң башқиларниң уйғурлар һәққидики тәтқиқатлириға пайдиси болушини үмид қилимән.»

3 Күнлүк муһакимә йиғинини нәтиҗилик тамамлиған йиғин қатнашчилири алаһидә тәклип қилинған «явропа уйғур ансамбили» дики уйғур артистлар орундиған нахша-уссуллиридин бирликтә бәһр алған.

Пикирләр (0)
Share
Толуқ бәт