Yawropa Uyghur instituti Uyghur krizisi we lagérlar heqqide xelq'araliq muhakime yighini ötküzdi

Muxbirimiz gülchéhre
2019-12-12
Élxet
Pikir
Share
Print

Yawropa Uyghur instituti bilen biryusséldiki hörriyet uniwérsitétining hemkarliqida "Uyghur krizisi, lagérlar we uning höjjet menbeliri heqqide izdinish" muhakime yighini ötküzülgen.

Mezkur yighin fransiyide qurulghan yawropa Uyghur institutining qurghuchiliridin biri bolghan tetqiqatchi dilnur reyhan bilen béryussél hörriyet uniwérsitétining tetqiqatchisi wanisa fran'gwilli xanimning birlikte pilanlishi, Uyghurlar üstide tetqiqat élip bériwatqan mutexessisler, közge körün'gen zhurnalistlar, Uyghur pa'aliyetchiler, uniwérsitét proféssorliri we oqughuchilirining ishtirak qilishi bilen intayin netijilik axirlashqan.

Ziyaritimizni qobul qilghan dilnur reyhan xanim muhakime yighinining intayin ehmiyetlik we netijilik bolghanliqini bildürdi. Dilnur xanim bu muhakimini uyushturushtiki közligen nishan'gha yetkenlikini bildürüp, mundaq dédi: "Dunyaning her qaysi jayliridin yighilghan Uyghurshunas tetqiqatchilar, zhurnalistlar we pa'aliyetchiler özlirining lagérlar heqqidiki izdinishliri hemde Uyghurlarning yéqinqi weziyiti heqqidiki pakitliq tetqiqatlirini otturigha qoydi. Bu yighinda muhakime we analizlar arqiliq xitay hökümitining Uyghur siyasitige da'ir köz boyamchiliqlirining mahiyitini échip körsitish we uningdin agah bolush heqqidiki nishanimizgha yettuq, dep oylaymen."

Yighin'gha xelq'arada közge körün'gen Uyghurshunaslardin rayin tam, johanna smis, tim gros, jin bunin qatarliqlar özlirining yéqinqi izdinishlirini otturigha qoyghan. En'giliyediki musteqil tetqiqatchi eziz eysa ependi "Jawabsiz qalghan téléfon" namliq höjjetlik filimni tonushturghan. Uyghur aktipliridin xalmurat Uyghur muhajirettiki Uyghurlarning pa'aliyetliri heqqide tonushturush bergen. Uningdin bashqa yéqinda Uyghur diyarida ziyarette bolghan zhurnalist olsi yaziji, tetqiqatchi xanna bordof qatarliqlar özlirining Uyghur diyaridiki ziyariti jeryanida shahit bolghanlirini anglatqan.

Xanna bordof xanim ziyaritimizni qobul qilip, özining mezkur yighindin alghan tesiratlirini bayan qildi. Xanna özining tunji qétim dunyaning her qaysi jayliridin kelgen we metbu'atlarda ismini anglighan köpligen Uyghurshunaslar bilen uchrashqanliqidin bekmu söyün'genlikini bildürdi. U mundaq dédi: "Men bu muhakime yighinining Uyghurlar heqqide tetqiqat élip bériwatqanlargha nisbeten eng zor ehmiyiti hemkarliq we ortaqlishishta dep oylaymen. Biz bir yerge kélip, ortaq tetqiqat témilirimizni we bu heqtiki izdinishlirimizni ortaqlashtuq. Uyghurlargha a'it uchur we pakitlar cheklik bolghan bügünkidek bir shara'itta muhakimige qoyulghan maqale we analizlarning kelgüsidiki xizmetlirimizge zor yardimi bolidu. Men teminligen uchurlirimning bashqilarning Uyghurlar heqqidiki tetqiqatlirigha paydisi bolushini ümid qilimen."

3 Künlük muhakime yighinini netijilik tamamlighan yighin qatnashchiliri alahide teklip qilin'ghan "Yawropa Uyghur ansambili" diki Uyghur artistlar orundighan naxsha-ussulliridin birlikte behr alghan.

Toluq bet