Iranda ötküzülgen taylandche janbazliq musabiqiside Uyghur mahir ghelibe qildi

Istanbuldin ixtiyariy muxbirimiz arslan teyyarlidi
2023.11.22
Uyghur-Janba-Halid-Ataman-İranda-kurunush02-1024 Uyghur janbaz xalid atamanning iranda ötküzülgen janbazliq musabiqide ghelibe qilghanliqini élan qiliwatqan körünüsh, 2023-yili 20-noyabir, téhran
RFA/Arslan

20-Noyabir iranning paytexti téhranda ötküzülgen taylandche janbazliq musabiqige qatnashqan ataman janbazliq kulubining meshqawuli xalid ataman reqibini yéngip janbazliq kemerge érishti.

Biz bu heqte toluq melumat élish üchün bu musabiqini uyushturghan “Qorqunchluq jeng” namliq janbazliq kulubining mes'uli ferman qorqutan bilen söhbetleshtuq. Ferman qorqutanning bildürüshiche, ötken ayda antaliyede ötküzülgen janbazliq musabiqiside xalid ataman reqibini yenggendin kéyin irandiki asiya janbazliq kulubi özining bir mahirining xalid ataman bilen musabiqige chüshüshni xalaydighanliqini bildürgen we musabiqilishishni telep qilghan. Ferman ependi bu telepni xalid ataman'gha yetküzgen we musabiqini orunlashturghan. Musabiqe téhranda ötküzülgen bolup xalid ataman reqibini yéngip yene bir kemerge ige bolghan.

Bu heqte ferman qorqutan ependi mundaq dédi: “Biz kéyin irandiki asiya janbazliq kulubi re'isining telipi boyiche xalid ataman bilen iran'gha bérip musabiqigha qatnashtuq, xalid atamanning japaliq meshiqliri we tirishchanliqi netijiside musabiqide reqibni yéngip kemerni qolgha keltürgen bolduq. Allah bizge bu qelbini nésip qildi. Kulubimizning meqsiti türk we türkiy tilliq mahirlirimizni dunya sehnisige chiqirish we dunyagha türklerni tonushturushtin ibaret” .

Ferman qorqut ependining bildürüshiche, Uyghur démek türk démektur, türk démek Uyghur démektur. Shundaq bolghaniken, hemmisi musulman bolghan hemde qérindash bolghan Uyghurlar, shuningdek özbék, qazaq, türkmen qatarliqlarning hemmisi türkler bilen qérindash hésablinidu. Kéyinki birnechche ayda xalid ataman yene ikki qétimliq musabiqige qatnishidighan bolup, buning xelq'ara sehnilerge chiqishigha yol échishi mumkin iken.

U ziyaritimiz jeryanida xalid atamanning mahariti toghrisida toxtilip mundaq dédi: “Xalid ataman sherqiy türkistan we Uyghur türkliri üchün bek qimmetlik bir mahir, néme üchün dégende, u bu sahede bir yol bashchi boldi, yashlargha bashlamchiliq qilishi chong bir ilgirilesh boldi, men her qandaq musabiqide xalid atamanning yénida bolimen we uni qollaymen. ”

Biz yene bu qétimqi musabiqe toghrisida téximu tepsiliy melumat élish üchün “Ataman janbazliq kulubi” ning meshqawuli xalid ataman bilen söhbetleshtuq. Ziyaritimizni qobul qilghan xalid ataman bu musabiqe toghrisida xéli köp nersilerni sözlep berdi.

Xalid atamanning éytishiche, uning iranliq reqibi mehdi mehmetni yéngip ghelibe qilghanliqi buning xelq'araliq chong musabiqilerge qatnishish üchün yene bir qedem ilgirileshke türtke bolidiken. Xalid ataman bu qétimqi musabiqige özi yalghuz barghanliqi üchün musabiqe meydan'gha türkiye bayriqi yaki sherqiy türkistan bayriqini chiqirish pursiti bolmighanliqini bildürdi.

Xalid ataman buningdin kéyin resmiy xelq'araliq musabiqilerge qatnishish pursitini qolgha keltürüsh üchün téximu köp tirishidighanliqini hemde chéniqishni dawam qilidighanliqini bildürdi.

 “Qorqunchluq jeng” kulubining mes'uli ferman qorqutning bildürüshiche, 2024-yili 4-ayning 20-küni yette dölet we yette rayondin janbazliq mahirlarning qatnishishi bilen antaliyede yene bir qétimliq “Qorqunchluq jeng kéchisi” ötküzülidighan bolup, xalid atamanmu bu musabiqige chüshidiken.  

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.