Enqerede "2-Nöwetlik siyaset we istratégiye kursi" échildi

Ixtiyariy muxbirimiz erkin tarim
2019-07-18
Share
erkin-ekrem.jpg "2-Nöwetlik siyaset we istratégiye kursi" da istratégiye mutexessisi doktor erkin ekrem ependi sözlimekte. 2019-Yili iyul, enqere.
RFA/Erkin Tarim

Türkiyening paytexti enqerediki Uyghur tetqiqat instituti yash mutexessis Uyghurlarni yétishtürüsh meqsitide "2-Nöwetlik siyaset we istratégiye kursi" achti. 7-Ayning 14-künidin 21-künigiche enqerediki institutning ishxanisida ötküzülidighan kursqa türkiyening herqaysi sheherliridin kelgen 25 Uyghur yash ishtirak qilmaqta. Bular 20-35 yashlardiki aliy mektepte toluq kurs, doktorluq we magistirliq oquwatqan yashlar arisidin tallan'ghan.

Bir hepte dawamlashqan kursta derslerning köpini Uyghur tetqiqat instituti mudiri, istratégiye mutexessisi doktor erkin ekrem ependi ötmekte. Uningdin sirt izmirdiki ege uniwérsitéti proféssori alimjan inayet, "Milliy mepkure we qimmet qarashlar", kanadadiki Uyghur ziyaliysi ruqiye turdush xanim "Millet we milletchilik", enqerediki haji bayram uniwérsitéti tarix proféssori doktor qonur alip erjilasun ependi "Bashqilarning neziride Uyghurlar", zhurnalist adiljan eruyghur ependi bolsa ''biz kim? Uyghurmu? sherqiy türkistanliqmu? biz özimizni tonumduq? özimizni qandaq bayan qilishimiz kérek?" dégen témilarda ders berdi. Bulardin bashqa amérikidiki Uyghur adwokat nuri türkel ependi "Skayp" arqiliq "Qanun we xelq'ara qanun", iqtisadshunas muhemmetjan bughra "Iqtisad we soda: yüksiliwatqan xitayning küchi", shiwétsiyediki Uyghur yash nijat turghun ependi "Xelq'ara munasiwette sherqiy türkistan" témilirida sözlidi

"2-Nöwetlik siyaset we istratégiye kursi" ning asasiy ders bergüchisi istratégiye mutexessisi doktor erkin ekrem bolup, u, "Dölet we siyaset: xelqlerning igilik hoquqi, döletler we xelq'ara munasiwet: gherbtin kelgen hakimiyetler ara munasiwetler, tarix we istratégiye, istratégiyelik tepekkur, xelq'ara sehnidiki özgirishler" dégen'ge oxshash bir qatar témilarda ders bermekchi.

Bir hepte dawamlishidighan kurs qandaq ötüwatidu? "2-Nöwetlik siyaset we istratégiye kursi" échishtiki meqset néme dégen'ge oxshash so'allargha jawab tépish üchün Uyghur tetqiqat instituti mudiri erkin ekrem we kursqa ishtirak qiliwatqan oqughuchilar bilen söhbet élip barduq. Doktor erkin ekrem ependi bu kursta uniwérsitétlarda öginelmeydighan Uyghur dewasi üchün paydiliq melumatlarning ögitiliwatqanliqini bayan bayan qildi.

Bu kursqa qatnishiwatqan istanbuldiki sabahittin za'im uniwérsitéti tarix kespi oqughuchisi müyesser éli ziyaritimizni qobul qobul qilip, témilarning nahayiti yaxshi tallan'ghanliqini, özliri üchün paydiliq boluwatqanliqini bayan qildi.

Istanbuldiki qoch uniwérsitéti oqughuchisi muhammetimin bu kursta peqet léksiyela anglapla qalmastin, belki léksiye axirida muzakire élip bériliwatqanliqini bayan qildi.

Mezkur kursning 1-nöwetliki 2018-yili 12-ayning 24-künidin 30-künigiche enqerede ötküzülgenidi. Birinchi qétimliqigha qatnashqan enwer ependi bu qétimliqighimu ishtirak qilghan. U ikkinchi qétimliqigha köp yéngi mezmunlarning qoshulghanliqini, téximu köp yéngi melumatlarni öginiwatqanliqini bayan qildi.

Enwer semet ependi Uyghur dewasigha qiziqidighan, Uyghur dewasi bilen shughullishni pilan qiliwatqan her bir Uyghur yashning "Siyaset we istratégiye kursi" gha qatnishishi kéreklikini bayan qildi.

Müyesser éli xanim kursqa qatnashqandin kéyin dostlirigha téléfon qilip, ularningmu qatnishishini tewsiye qilghanliqini éytti.

"Siyaset we istratégiye kursi" enqerediki Uyghur instituti achqan ikkinchi qétimliq kurs bolup, bundin kéyin her yili ötküzülidiken. Kursqa milliy rohqa ige, in'gliz tilini bilidighan 20 yashtin 35 yashqiche bolghan herqandaq Uyghurning iltimas qilalaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.