Истанбулда уйғур яшлириға миллий мәпкурә, таратқу вә тәшкилатчилиқ бойичә курс ечилди

Ихтиярий мухбиримиз арслан
2019-07-31
Елхәт
Пикир
Share
Принт
Истанбулда уйғур яшлириға миллий мәпкурә, таратқу вә тәшкилатчилиқ бойичә ечилған курстин көрүнүш. 2019-Йили 27-июл, түркийә.
Истанбулда уйғур яшлириға миллий мәпкурә, таратқу вә тәшкилатчилиқ бойичә ечилған курстин көрүнүш. 2019-Йили 27-июл, түркийә.
RFA/Arslan

Истанбулда уйғур яшлириға «миллий мәпкурә вә тәшкилатчилиқ» һәмдә «таратқу вә тәшвиқат» дегән темилар бойичә мәхсус курс ечилди.

7-Айниң 27-вә 28-күнлири истанбулда уйғур академийәси билән «һира» мәдәнийәт вә маарип вәхпиниң һәмкарлиқида уйғур яшлиридин кәлгүси таянч күч йетиштүрүш мәқситидә мәхсус курс ечилди. 9 Уйғур вә 2 түрк болуп, җәмий 11 тәтқиқатчи вә мутәхәссисниң лексийә бериши билән 39 нәпәр уйғур оқуғучи вә яш зиялийлар тәрбийәләнди. Бу қетимлиқ мәхсус курс 2-нөвәтлик «миллий мәпкурә вә тәшкилатчилиқ» һәмдә «таратқу вә тәшвиқат» дегән темида орунлаштурулди.

Түркийәниң һәр қайси шәһәрлиридики университетларда оқуватқан уйғур оқуғучилардин 39 нәпәр уйғур яш икки синипқа бөлүнүп, икки күнлүк тәрбийәләш курсиға қатнашти.

Курста һәр саһәдин кәлгән профессорлар, доктор вә мутәхәссисләр мәхсус темилар бойичә лексийә сөзлиди. Бу икки күнлүк курс толиму җанлиқ вә юқири кәйпият билән өткүзүлди.

Биз бу һәқтә техиму көп мәлуматқа игә болуш үчүн бу қетимлиқ курсни уюштурған уйғур академийәсиниң иҗраийә рәиси абдулһәмит қарахан вә «һира» мәдәнийәт вә маарип вәхпиниң мәсуллиридин лоқман әпәнди шундақла курсқа қатнашқан уйғур оқуғучи абдузаһирлар билән сөһбәт елип бардуқ.

Абдулһәмид қарахан әпәнди бу қетимлиқ мәхсус курсниң тәшкиллиниш җәряни вә әмәлий үнүми һәққидә мәлумат бәрди.

Лоқман әпәндиму зияритимизни қобул қилип, вәтән билән алақә үзүлгән, уйғурлар өз тарихида әң еғир киризискә дуч кәлгән бир пәйттә истанбулда уйғур тилида мушундақ бир курсниң уюштурулуши наһайити муһим әһмийәткә игә деди.

Курсқа қатнашқан уйғур яшлиридин абдузаһирму зияритимизни қобул қилип, буниңдин кийин милләтниң әң еғир йүкини зиммисигә елип, пүтүн күчи билән миллий күрәш йолиға атлинидиғанлиқи вә бир-бири билән һәмкарлиқ орнитип вәтән вә милләт үчүн төһпә қошидиғанлиқини ипадә қилди.

Толуқ бәт