Вашингтондики мусулманлар җәмийәтлири уйғурларни қоллаш намайиши өткүзди

Мухбиримиз меһрибан
2021-03-30
Share
Вашингтондики мусулманлар җәмийәтлири уйғурларни қоллаш намайиши өткүзди "америка ислам мунасивәтлири кеңиши" ниң тәшкиллишидә "иҗтимаий адаләт кеңиши", "шималий америка ислам кеңиши", қатарлиқ америкадики мусулман җәмийәтлири вә уйғур тәшкилатлири өткүзгән "уйғурларға қаритилған ирқий қирғинчилиқни тохтитиш" ни тәләп қилиш бирләшмә намайишидин көрүнүш. 2021-Йили 30-март, вашингтон.
Social Media

30-Март күни америка пайтәхти вашингтондики мусулманлар тәшкилатлиридин CAIR йәни "америка ислам мунасивәтлири кеңиши" ниң тәшкиллишидә "иҗтимаий адаләт кеңиши", "шималий америка ислам кеңиши", қатарлиқ америкадики мусулман җәмийәтлири вә уйғур тәшкилатлириниң "уйғурларға қаритилған ирқий қирғинчилиқни тохтитиш" ни тәләп қилиш бирләшмә намайиши өткүзүлди.

Мәлум болушичә 30-март күнидики намайиш вашингтондики хитай әлчиханиси алдида шу йәр вақти чүш саәт 12-дин 1 гичә бир саәт давамлашқан. Намайишта "америка ислам мунасивәтлири кеңиши" ниң директори ниһад авад вә мәсчит муһәммәтниң имами талип шарәф қатарлиқлар сөз қилған.

Ниһад авад сөзидә, уйғурларға қаритилған "ирқий қирғинчилиқни тохтитиш" ни тәләп қилиш намайишиға иштирак қилған мусулман җәмийәтлири вә уйғур тәшкилатлириға рәһмәт ейтқан. Шундақла у йәнә нөвәттә уйғур қериндашлар учраватқан зулумға қарита америка һөкүмитиниң қаттиқ инкас қайтурғанлиқини қоллайдиғанлиқини билдүрүп, мусулман дунясиниң уйғурлар билән бир сәптә турушиниң муһимлиқини тәкитлигән.

Вашингтондики мәсчитләрдин "мәсчит муһәммәт" ниң имами талип шарәфму сөз қилип, америкидики уйғурларниң хитай лагерлирида азаб чекиватқан тутқундики туғқанлириниң балдуррақ әркинликкә чиқишиға дуа қилидиғанлиқини вә хитай һөкүмитиниң уйғурларға қаратқан ирқий қирғинчилиқ һәрикитигә мусулман дунясиниң қаттиқ инкас қайтуруш мәҗбурийити барлиқини тәкитлигән.

Намайишқа америкадики уйғур тәшкилатлиридин "уйғур һәрикити", "уйғур кишилик һоқуқ қурулуши", "дуня уйғур қурултийи", "америка уйғур бирләшмиси", "уйғурларға адаләт" қатарлиқ уйғур тәшкилатлардики уйғур паалийәтчилириму қатнашқан.

Намайишта уйғур вәзийити һәққидә нутуқ сөзлигән уйғур паалийәтчилиридин "уйғур һәрикити" тәшкилатиниң башлиқи рошән аббас ханим зияритимизни қобул қилип, намайиш һәққидә мәлумат бәрди.

Рошән аббас ханимниң билдүрүшичә, бу хитай һөкүмити милйонлиған уйғурни лагерларға қамаш һәрикити башлиған 2017-йилдин буян, америкадики мусулманлар җәмийәтлириниң тунҗи қетим ашкара һалда, уйғур тәшкилатлири билән бирликтә, хитай һөкүмитигә қарши уйғурларни қоллап намайиш қилиши һесаблинидикән.

30-Март күни хитай әлчиханиси алдида өткүзүлгән "уйғурларға қаритилған ирқий қирғинчилиқни тохтитишни тәләп қилиш "намайишиға "уйғур кишилик һоқуқ қурулуши" ға вакалитән қатнашқан мәзкур тәшкилатниң программа кординатори, тәтқиқатчи мустафа ақсу әпәндиму намайишта уйғурларниң ирқий қирғинчилиққа учраш вәзийитини аңлатқан.

Мустафа әпәндиму зияритимизни қобул қилип, америкидики мусулманлар җәмийити билән өткүзүлгән бирләшмә намайишниң әһмийити һәққидә өз тәсиратини баян қилди.

Намайиш һәққидики тәпсилатларни юқириқи аваз улинишидин аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт