Uyghur milyardér elijan ibrahimofning méyiti qirghizistanning toqmaq shehiride depne qilindi

Ixtiyariy muxbirimiz féruze
2021-02-04
Share
Uyghur milyardér elijan ibrahimofning méyiti qirghizistanning toqmaq shehiride depne qilindi Ottura asiya döletliride tonulghan Uyghur milyardér elijan ibrahimofning méyitini uzitish murasimidin körünüsh. 2021-Yili 4-féwral, qirghizistan.
RFA/Féruze

4-Féwral küni qirghizistanning toqmaq shehiride ottura asiya döletliride tonulghan Uyghur milyardér elijan ibrahimofning méyiti yerlikke qoyuldi. Merhumning jinazi namizigha qirghizistanda tonulghan siyasetchilerdin ömürbek babanof, isa ömürqulof, prézidétliqqa namzat körsitilgen shexslerdin kanat isayéf we aymén kasénof, chu wilayitining waliysi mirbék miyarof, qirghizistan aliy kéngishining ezasi perhat tuléndibayéf, qirghizistan jumhuriyitning bash muptisi meqsetbek toktomushéf, toqmaq shehirining hökümet bashchisi daniyar aman'gélidiyéf, toqmaq sheherlik kéngesh ezaliri we puqralar bolup, 2 mingdin oshuq kishi qatnashti.

Ottura asiya döletliride tonulghan Uyghur milyardér elijan ibrahimofning méyitini uzitish murasimidin körünüsh. 2021-Yili 4-féwral, qirghizistan.

Merhumning jinaza namizigha yene qoshna qazaqistandin tonulghan shexsler bilen bir qisim karxanichilarmu kélip qatnashti.

2019-Yil "Forbés" zhurnili elijan ibrahimofning bayliqini 2 milyard 300 milyon amérika dolliri dep élan qilghan hemde 2020-yili uni qazaqistandiki eng bay 5 karxanichining biri qatarigha kirgüzgeniken. Elijan ibrahimofning yawro-asiya énirgiye shirkitide 20. 7 Pirsent péyi bar iken.

Igilinishiche, elijan ibrahimof 1953 yili özbékistanda tughulup, yash-ösmürlük yilliri toqmaq shehiride ötken. Ata terep tughqanlirimu shu sheherde olturlashqan. Elijan ibrahimof öz yurti toqmaq shehirining tereqqiyatida muhim rol oynighan iken.

Radi'omiz ziyaritini qobul qilghan toqmaq shehirining aliy kéngesh ezasi we tunggan jem'iyitining sabiq re'isi gaysir wanshu, közliri nemlen'gen halda "Elijan ibrahimofning wapati toqmaq shehiri üchün chong yoqutush boldi." dédi.

U yene mundaq dédi: "Bügün ajayip bir qayghuluq kün boldi, bu kishining arimizdin ketkenliki chong bir yoqitish, chünki elijan ibrahimof aliyjanap, mert, yuqiri derijilik bir tonulghan karxanichi idi. Toqmaq shehiri üchün nurghun yaxshi ishlarni qilghan idi. Mesile, yol yasash, doxturxanilargha yéngi dawalash üsküniliri élip bérish, kocha chiraqlirini ornitish, mohtaj a'ililerge maddiy yardem bérish, axiriqi alte yil dawamida 1940-yillardiki natsist gérmaniyesige qarshi urushqa qatnashqanlargha ming dollardin sowghat bérip turghan idi. U yene yash tijaretchilerni qollap, meslihet qilip ularghimu yardem qolini sun'ghan idi. Merhum héch qachan millet yaki diniy asasta kishilerni bölmigen idi. U exlaqliq we isil xisletliq adem idi. Uning saxawetlik ishliri toqmaqliqlarning yurekliride menggü öchmeydu."

Igilinishiche, merhum elijan ibrahimof 2020-yilning mart éyida korona wirusi kiséli qirghizistanda peyda bolghanda, derhal toqmaq sheherlik doxturxanilargha kéreklik apparatlarni élip bergen, awghust éyida üch dane jiddiy qutquzush mashinisini sowghat qilghan iken. U yash balilar üchün "Shungqar" tenterbiye kulubini qurghan, toqmaq shehirining asasliq kochlirini rémont qildurup we chiraqlar ornatqan. Mohtaj a'ililerge maddiy yardem bergen, hetta bezilerge öy sétiwélip köchürüp qoyghan.

Elijan ibrahimof toqmaq shehiridiki Uyghur jama'iti üchün Uyghur diyaridiki qeshqer shehiridin on yürüsh milliy kiyim-kéchekler sétiwélip, sowghat qilghan hemde yashlarni qollash üchün nurghun tenherket musabiqiliri uyushturghan. Elijan ibrahimofning namidin yene toqmaq shehiridiki ikki meschitte milliy we eneniwiy nezir-chiraqlarni ötküzüsh üchün binalar qurulup we kéreklik buyumlar sétilip bérilgen. Her yili ramizan aylirida iptar pa'aliyetliri ötküzgen.

Radiyomiz ziyaritini qobul qilghan qirghizistan jumhuriyitning bash muptisi meqsetbek toktomushéw, elijan ibrahimofning qirghizistan jumhuriyitning iqtisadigha chong hesse qoshqanlighini tilgha élip, mundaq dédi:

"Elijan ibrahimofni pütün dunya tonuydu. Bu kishi pütün qirghizistan puqralirigha yardem körsetken, memliketke chong hessilerni qoshqan. Shexsen men özüm nurghur iptarlirigha we bashqa saxawetlik pa'aliyetlirige qatnishqan idim. Bu kishi heqiqetenmu wetenperwer, öz yurtigha küygen kishilerdin birsi idi. Bügün biz hem shahid boluwatimiz, merhum chet memlikette jan üzgen bolsimu, ballirigha nesihet qilip, öz wetinide depne bolushini istigen. Bügün merhumni axiriqi sepirige uzitish üchün minglighan kishiler kélishti. Merhumning rohi jennete bolsun, qebrisi xeyirliq bolsun! hayat shundaq iken, biz hemmimiz bu dunyadin kétimiz. Biz üchün uning rohi ülge bolush kérek, mana bügün qazaqstanning birinchi prézidénti nursultan nazarbayéf, we hazirqi prézidénti tokayéf we bashqilar öz teziyelirini bildürishti. Chünki merhum peqet qirghizistan'gha emes, belki qazaqstan'gha we bashqa ellerge chong xizmetlerni körsetken we saxawetlik ishlarni élip barghan kishi idi."

Melum bolushiche, elijan ibrahimof korona wirusi bilen yuqumlinip, bélgiyede 3-féwral küni alemdin ötken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet