Türkiyedin norwégiyege kéliwalghan Uyghur musapirlar xatirjemlikke érishken

Ixtiyariy muxbirimiz ekrem
2021-09-27
Share
En'gliyediki yehudiylar orgini türkiyediki Uyghurlar üchün heriketke ötti "Dunya yehudiylargha yardem bérish orgini" türkiyediki Uyghur musapirliri üchün élan qilghan muraji'etnamesige ishlitilgen süret. 2021-Yili aprél.
Social Media

Qisqighine ikki hepte ichide 100 din artuq Uyghur musapir türkiyedin ayrilip, norwégiyege kélip siyasiy panahliq tiligen.

100 Din artuq Uyghurning ikki hepte ichide türkiyedin norwégiyege kélip xatirjemlikke érishkenliki norwégiyediki yerlikler üchün bir yéngiliq bolghan bolsa, norwégiyediki Uyghurlar üchün hem bu musapir Uyghurlarning özliri üchün zor xushalliq bolghan.

Norwégiyede yashaydighan d u q ning teptishi perhat yaqup ependining bildürüshiche, qisqighine ikki hepte ichide 100 din artuq Uyghurning türkiyediki xitay tehditidin qutulup norwégiye salamet yétip kelgenliki we xatirjemlikke érishkenliki norwégiyediki Uyghurlarni köp söyündürgen. U sözide, bu Uyghur musapirlirining hazir korona siniqi mezgilide turuwatqanliqini, pat arida hökümetning ularni oxshimighan rayonlargha teqsim qilidighanliqini tilgha aldi.

Uyghur musapirliri norwégiyege qedem basqandin kéyinla norwégiyediki Uyghurlar ularni yoqlap bérip hal sorighan. Norwégiye Uyghur komitétining re'isi, "Uyghur edliyesi arxip ambiri" ning mudiri bextiyar ömer ependi bu heqte toxtalghanda, bu musapir Uyghurlarning türkiyeni terk étip norwégiyege kélishidiki asasliq sewebning türkiye bilen xitay otturisida imzalan'ghan "Jinayetchilerni ötküzüp bérish kélishimi" ning tehditidin qutulush ikenlikini tekitlidi.

Korona siniqi mezgili axirlashquche we siyasiy panahliq resmiyetliri béjirilip bolun'ghuche bu musapir Uyghurlarning sirtqa chiqishi, axbaratning ziyaritini qobul qilishi waqtinche cheklen'geniken. Shundaqtimu, biz wasitilik halda ularning awazini anglash pursitige érishtuq. Türkiyedin kelgen bir xanim özlirini her türlük usullarda yoqlap turghan norwégiyediki Uyghurlargha bolghan minnetdarliqini ipade qildi. Ismini ashkarilashni xalimighan yene bir ermu norwégiyediki Uyghur qérindashlirining ghemxorluqidin köp memnun bolghanliqini tekitlidi.

Birdinla 100 din artuq Uyghur musapirning norwégiyege kélip siyasiy panahliq tiligenliki norwégiye axbarat sahesiningmu diqqitini tartqan. Norwégiyening "Kündilik gézit" ining muherriri kari furé xanim bu heqte élan qilghan "Uyghurlar sekrep chüshiwalghanda" namliq maqaliside, türkiyedin kelgen bu musapir Uyghurlarning bashqa yerge baridighan ayropilan'gha olturup, ayropilan norwégiyede toxtighanda "Sekrep chüshiwalghan" liqini eskertidu. Andin bularning derdi bar bir xelqning ezaliri ikenlikini, ularning qowmi-qérindashlirining xitayning jaza lagérlirida azab tartiwatqanliqini, özliriningmu xitaygha qayturulup lagérlargha kirip qalmasliqi üchün türkiyediki xitay tehditidin qéchip norwégiyege kélip panahliq tiligenlikini tekitlep ötkendin kéyin, norwégiye hökümitidin bu Uyghurlarning norwégiyede yashishigha yol qoyushini, ularning derdini chüshinishini telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet