Кучада нәмуничи оқутқучи мәмәттурсун даимниң 11 айдин буян тутқунда икәнлики ашкариланди

Мухбиримиз шөһрәт һошур
2020-03-23
Share
mettursun-daim-oqutquchi-1.jpg Куча наһийәлик 4-оттура мәктәпниң оқутқучиси мәмәттурсун даим.
Oqurmen teminligen

Техи бир йилниң алдида куча наһийәлик 4-оттура мәктәпниң йиғин заллирида мукапатлиниватқан көрүнүши тор архиплирида сақлинип туруватқан оқутқучи мәмәттурсун даимниң 11 айдин буян тутқунда икәнлики ашкариланди.

Фейсбукта уйғурийә алп намидики бирәйләнниң ашкарилишичә, куча наһийәлик 4‏-оттура мәктәпниң нәмуничи оқутқучиси мәмәттурсун даим, бултур 4 ‏-айда намәлум сәвәб билән тутуп кетилгән. Фейсбуктики бу учурда мәмәттурсун даимниң 2019 ‏-йили 3 ‏-айда мәзкур мәктәптики партийә әзалири йиғиниға қатнишиватқан сүрити көрситилгән. Хәвәрдики сүрәтләрдин биридә униң үстигә шәрәп лентиси тақалған һаләттә мәктәп мәйданида мукапат еливатқан көрүнүшиму берилгән.

Телефонимизни қобул қилған куча наһийәлик архип идариси мәмәттурсун даим һәққидики соаллиримизни тәпсилий аңлиғандин кейин бу киши һәққидә өзлиридә мәлумат йоқлуқини баян қилди.

Әмма фейсбуктики мәзкур учурда қистурулған сүрәтләрдики икки лозункидин мәмәттурсун даимниң компартийә әзаси икәнлики мәлум. Шуңа биз архип идариси хадимиға униң компартийә әзаси икәнликини баян қилғинимиздин кейин у мәмәттурсун һәққидики һәққидики учурларни ашкарилашқа болмайдиғанлиқини баян қилди.

Телефонимизни қобул қилған куча наһийәлик маарип идарисиниң ишхана мудири куча 4‏-оттура мәктәптә мәмәттурсун даим исимлик бир оқутқучиниң барлиқини инкар қилмиди. У пәқәт мәмәттурсун даим һәққидики учурларни ашкарилашқа болмайдиғанлиқини ейтти.

Фейсбуктики мәзкур учурда мәмәттурсун даимниң 25 йиллиқ бир маарипчи икәнлики, маарип саһәсидики төһпикарлардин бири икәнлики әскәртилгән. Биз мәмәттурсун дайимниң бу тәрипини сәмигә салғандин кейин, мәзкур маарип идарисиниң ишхана мудири мәмәттурсун даим һәққидә җ. Х. Тармақлиридин учур елишимизни тәвсийә қилиш арқилиқ униң нөвәттә тутқунда икәнликини ишарәтлиди. Биз униңға мәмәттурсун даимниң бир маарипчи икәнлики, шуңа әһвални маарип идарисидин уқушни халайдиғанлиқимизни билдүргинимиздә у ениқ һалда у бу учурниң бир дөләт мәхпийәтлики икәнликини әскәртти.

Фейсбуктики учурда йәнә мәмәттурсун даимниң химийә дәрси беридиғанлиқи, һәр йили кучадики алий мәктәп имтиһаниға қатнишидиған оқуғучиларға йетәкчилик қилидиғанлиқи қәйт қилинған. Маарип идарисиниң хадими бу һәқтики учурларни ашкарилимаслиқта чиң турди.

Бу идаридики йәнә бир хадим мәмәттурсун даимниң тутқунда икәнликини дәлиллиди. У мәмәттурсун даимниң тутулуш сәвәби һәққидә 4‏-оттура мәктәптин мәлумат елишимизни тәвсийә қилди. Мәзкур мәктәп хадимиму мәмәттурсунниң лагерда икәнликини дәлиллиди, әмма қайсий лагерда икәнлики һәққидә мәлумат берәлмиди.

Юқирида куча наһийәлик 4‏-оттура мәктәпниң нәмуничи оқутқучиси, партийә әзаси мәмәттурсун даимниң 11 айдин буян тутқунда икәнлики һәққидә аңлитиш бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт