Uyghur qirghinchiliqi we amérika hökümitining qanun-siyasetliri

Muxbirimiz eziz
2021-09-20
Share
Amérika tamozhna we chégra qoghdash idarisi Uyghur mejburiy emgiki bilen ishlepchiqirilghan mehsulatlarni tutup qélish buyruqi chiqardi Nyu-york portidiki amérika tamozhna we chégra qoghdash (CBP) xadimliri xitaydin kirgen, Uyghur rayonidiki türme yaki jaza lagérdikilerning emgiki bilen yasalghan dep guman qilin'ghan yalghan chach we qoshumche buyumlarni tekshürmekte. 2020-Yili 29-iyun.
AFP

Amérika we en'gliye bashchiliqidiki bir qisim gherb döletliri Uyghurlar duch kéliwatqan zor kölemlik tutqun we siyasiy basturush herikitini "Irqiy qirghinchiliq" dep élan qilghandin kéyin, buninggha mas halda bir qisim jaza tedbirlirini otturigha qoyghanidi. Bularning ijra qilinishigha egiship bulardin bezilirining, jümlidin mejburiy emgek mehsulatlirini amérika bazirigha kirishtin cheklesh tedbirlirining heqiqetenmu zor ünümge ige ikenliki tézla namayan boldi. Shuning bilen birge bu xil jazalarning yene bir qismi oxshimighan derijide arqigha sozulup, bu heqte türlük pikirlerning otturigha chiqishigha seweb boluwatqanidi. Nyo-york uniwérsitétining bingxamton shöbisi del mushu mesile heqqide mutexessislerning pikirini anglap béqish üchün 20-séntebir küni chüshtin burun "Uyghur qirghinchiliqigha inkas: amérika hökümitining bu heqtiki qanun we siyasetlirige nezer" témisidiki muhakime yighini chaqirdi.

Yighin riyasetchisi, mezkur uniwérsitétning proféssori maksim pénski bu heqtiki ijabiy we selbiy hadisilerni yighinchaqlap qisqiche bayan qilip ötti. Yighinda otturigha qoyulghan pikirlerning biri Uyghur qirghinchiliqini chöridigen halda xelq'araning ikki lagérgha ayrilishi boldi. Bolupmu amérika bashchiliqidiki Uyghur qirghinchiliqini ashkara étirap qilghan döletler otturigha qoyghan hemde ijra qilishni bashliwetken bir qisim tedbirler Uyghur qirghinchiliqini chekleshte tégishlik rol oynawatqan bolsimu emma buningdiki bir muhim halqa bolghan mejburiy emgek mehsulatlirini chekleshte yene köpligen "Yochuqlar" ning mewjutluqi dawam qilmaqtiken. Bu xil yochuqlarning biri nöwette mejburiy emgekke bolghan cheklimining toluq ijra bolmasliqi, Uyghur qirghinchiliqi heqqide delil-ispatlarning kemliki tüpeylidin "Qirghinchiliq" heqqidiki hökümning tewrinip qélishi iken. "Qirghinchiliqqa inkas birleshmisi" ning qurghuchiliridin biri, doktur éwélina ochab bu heqte pikir qilip bu xil kemtüklüklerni üzül-késil yoqitish üchün amérika hökümiti jezmen bu xil qirghinchiliqqa munasiwetlik barliq delil-ispatlarni toluq yighish iqtidarigha ige bir mukemmel méxanizm berpa qilishi lazim, dep körsetti.

Muhakime yighinida söz qilghan mutexessislerning biri "Uyghur herikiti" teshkilatining re'isi roshen abbas bolup, u xitay hökümitining bu jehette qandaq "Ustatliq" qiliwatqanliqini yighin ehlige yene bir qétim eskertti. . Uning pikriche, alliqachan ashkara halda natsistlar gérmaniyesining yehudiylar qirghinchiliqini ijra qilishta "Ketküzüp qoyghan yerliri" din qandaq "Sawaq" élishni tekitlewatqan hemde Uyghur qirghinchiliqining ispatlirini tashqi dunyagha körsetmeslik üchün barliq tirishchanliqni qiliwatqan xitay hökümiti buninggha qarshi bir qatar tedbirlerni almaqta iken. Jümlidin lagérlargha qoshna orunlarda hemde jeset köydürüsh en'enisi bolmighan Uyghur olturaq rayonlirida tesis qiliniwatqan jeset köydürüsh orunliri buning bir ispati iken. Yene bir yaqtin xitay hökümiti islam dunyasini iqtisadiy jehettin özige béqindi qiliwélish arqiliq musulmanlar jama'itining bu jehettiki pikirini basmaqta iken. Shunga bundaq ehwalda "Yehudiylar qirghinchiliqi" mezgilidiki "Zeherlik gaz bilen öltürüsh zallirini tesis qilishni kütüsh" hajetsiz iken؛ ularning nomussizlarche olimpik musabiqisige sahibxaniliq qilishigha yol qoymasliq kérek iken؛ téximu muhimi "Insaniyetke qarshi bir meydan jinayet" sadir boluwatqanda téximu küchlük emili heriket qollinip bu xil rezillikni cheklesh barliq insanlarning ortaq mejburiyiti bolushi lazim iken.

Amérika xelq'ara diniy erkinlik komitétining mu'awin re'isi nuri türkel Uyghur diyaridiki qirghinchiliqqa baghlinishliq bolghan mejburiy emgek mesilisi heqqide muhim söz qildi. Uning pikriche, amérika baziri xitaydiki ishlepchiqirish bazilirining eng muhim éksport nishanlirining biri iken. Shundaq bolghanliqi ‍üchün amérika istémalchilirining bu heqtiki chüshenchisi nahayiti muhim orun tutidiken. Ularda "Mejburiy emgektin kelgen bu xil mehsulatlarni ishlitish" ke qarshi mewqe shekillense, buning qanunsiz qilmish ikenlikini chüshense u halda "Erzan" bahada kéliwatqan mejburiy emgek mehsulatlirini chekleshte zo ünüm qazinish mumkin iken. U yene Uyghur qirghinchiliqini cheklesh üchün otturigha qoyulghan bir qisim teklipler we charilerning téxiche üzül-késil ijra bolmaywatqanliqni tekitlep, bunche uzun kütüshning hajetsiz ikenlikini, baydin hökümitining xitay hökümiti bilen bolghan söhbette uruq-tughqanliridin xewer alalmaywatqan muhajirettiki Uyghurlar üchün söz qilishi kéreklikini, qirghinchiliqning qurbanliri boluwatqan Uyghur jama'itining eng eqelliy bolghan panahliq iltimaslirining tézleshtürüp hel qilinishi zörürlükini alahide tekitlidi. .

Muhakime yighinida pikir qilghan mutexessislerning yene biri amérika tashqi ishlar ministirliqining xadimi brét xansén idi. Umu yighin ehlining pikirini himaye qilidighanliqini bildürüsh bilen birge amérika hökümiti hazirghiche zadila emelge ashuralmay kéliwatqan mesililerning biri del mushu qirghinchiliq heqqidiki chüshenchining amérika xelqi arisida omumlashmasliqi ikenlikini körsetti. . Uning qarishiche, xitay hökümiti bu jehette pütkül xitay xelqini qozghap, bu heqtiki "Ichki birlik" ni emelge ashurup bolghan. Amérika xelqi bolsa Uyghurlarning béshigha kéliwatqan bu ishlardin asasen xewersiz iken. Bundaq ehwalda amérika xelqining mejburiy emgek mehsulatlirini bayqut qilishi xuddi quyash énérgiye taxtilirining bexiraman import qilinishidek yoqning ornida bolmaqtiken.

Melum bolushiche, nöwette ‍amérika hökümiti bashchiliqidiki gherb döletlirining Uyghurlar mesiliside téximu keskin we emeliy bolghan tedbirlerni élishi heqqidiki teklipler köplep otturigha chiqiwatqan bolup, bu qétimqi muhakime yighini ene shularning biri hésablinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet