Русийәдики атақлиқ уйғур рәссами азад мәмәдиноф аләмдин өтти

Ихтиярий мухбиримиз ойған
2020-04-24
Share
uyghur-ressam-Azat-Muhemmedinof-azad-memedinof.jpg Рәссамлиқ иҗадийити билән шуғуллиниватқан тонулған уйғур рәссами, русийә рәссамлар иттипақиниң әзаси азад мәмәдиноф (1952-2020).
Waqqas Memedinof teminligen

24-Апрелда русийәниң санкит-петербург шәһиридә яшап, рәссамлиқ иҗадийити билән шуғуллиниватқан тонулған уйғур рәссами, русийә рәссамлар иттипақиниң әзаси азад мәмәдиноф 68 йешида аләмдин өтти.

Игилишимизчә, азад мәмәдиноф һазирқи күндә оттура асияда иҗад қилип келиватқан тонулған рәссамлар күрәш зулпиқароф, руслан йүсүпоф, әхмәтҗан әһәд, әркин зулпиқароф, һашимҗан қурбанофлар билән дәврдаш һәм кәсипдаш болуп өткән икән.

Қазақистанниң алмута шәһиридә туруватқан азад мәмәдинофниң акиси ваққас мәмәдинофниң ейтишичә, азад аббас оғли мәмәдиноф 1952-йили 12-мартта уйғур елиниң ғулҗа шәһиридә туғулғаникән. У мундақ деди: "бизниң дадимиз аббас қарим мәмәдинофни 1955-йили үрүмчигә әвәтиду. Дадам шинҗаң қатнаш идарисиниң башлиқи болуп ишләйду. 1962-Йили январда көчүп, алмутиға келиду. Азад алмутада мәктәпни түгитиду. Андин у үч йил германийәдә армийәдә болиду. Андин ленинградта икки оқуш орнини тамамлап, алмутаға келиду. Бир ай ишқа кирәлмәй, дадимизниң разилиқини елип, ленинградқа кетиду вә арктика-антарктида институтида ишләп, шу йәрдә қалиду."

Игилишимизчә, азад мәмәдиноф 1977-йили шу вақиттики ленинград, йәни һазирқи санкит-петербург шәһиридики мемарчилиқ-қурулуш мәктипини, андин 1984-йили мухина намидики алий бәдиий-санаәт институтини тамамлиған. У 1992-йили русийә рәссамлар иттипақиниң әзалиқиға қобул қилиниду вә шундақла "мастер-класс" лайиһәсиниң аптори сүпитидә көплигән көргәзмиләрни уюштуриду.

Һазир санкит-петербург шәһиридә яшаватқан уйғур паалийәтчиси һәмраҗан зайитоф әпәндиниң ейтишичә, азад мәмәдинофниң вапати пәқәт русийәдики уйғурлар үчүнла әмәс, бәлки дуняниң һәр қайси мәмликәтлиридә яшаватқан пүткүл уйғурлар үчүнму орни толмас җудалиқ икән.

Һәмраҗан зайитоф мундақ деди: "униң рәсимлири чәт мәмликәтләрдә, нурғун йәрләрдә сақланмақта. Әтә биз униң өйигә берип, тәзийә билдүрмәкчимиз. У көплигән рәссамларниң рәсимлирини йиғип, көргәзмиләрни ачатти. Йеқин арилишаттуқ. Уйғурлар җәм болғанда азад акиниң галлерейәсидә йиғилаттуқ. Мушу мартта шу йәрдә йиғилмақчидуқ. Корона вируси дәп, учришалмай қалдуқ. Униң аяли семйонова тамараму рәссам. Ермитажниң президенти пиотровский, дөләт думаси әзаси говорухин, азад мәмәдиноф вә тамара семйонованиң төт кишилик чоң уюшмиси болған."

Һәмраҗан зайитоф йәнә говорухин һәм пиотровскийларниң уйғурлар үчүн көп яхши ишларни қилғанлиқини тәкитләп, йәнә мундақ деди: акиси ваққас мәмәдиноф келип, пиотровский вә говорухин билән учришип, бир филим ишләп чиқарди. Бу филим тор бәтлиридә бар. Азад акиниң сиңлиси гүзәл мәмәдинова қазақистан дөләт академийәлик уйғур тиятириниң баш рәссами. Биз чоңқур қайғуруп, тәзийә билдүримиз."

Көплигән җумһурийәтлик вә хәлқара көргәзмиләрниң қатнашқучиси азад мәмәдинофниң әмгики юқири баһалинип, бир нәччә мукапатлар билән тәқдирләнгән.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт