Rusiyediki ataqliq Uyghur ressami azad memedinof alemdin ötti

Ixtiyariy muxbirimiz oyghan
2020-04-24
Élxet
Pikir
Share
Print
Ressamliq ijadiyiti bilen shughulliniwatqan tonulghan Uyghur ressami, rusiye ressamlar ittipaqining ezasi azad memedinof (1952-2020).
Ressamliq ijadiyiti bilen shughulliniwatqan tonulghan Uyghur ressami, rusiye ressamlar ittipaqining ezasi azad memedinof (1952-2020).
Waqqas Memedinof teminligen

24-Aprélda rusiyening sankit-pétérburg shehiride yashap, ressamliq ijadiyiti bilen shughulliniwatqan tonulghan Uyghur ressami, rusiye ressamlar ittipaqining ezasi azad memedinof 68 yéshida alemdin ötti.

Igilishimizche, azad memedinof hazirqi künde ottura asiyada ijad qilip kéliwatqan tonulghan ressamlar küresh zulpiqarof, ruslan yüsüpof, exmetjan ehed, erkin zulpiqarof, hashimjan qurbanoflar bilen dewrdash hem kesipdash bolup ötken iken.

Qazaqistanning almuta shehiride turuwatqan azad memedinofning akisi waqqas memedinofning éytishiche, azad abbas oghli memedinof 1952-yili 12-martta Uyghur élining ghulja shehiride tughulghaniken. U mundaq dédi: "Bizning dadimiz abbas qarim memedinofni 1955-yili ürümchige ewetidu. Dadam shinjang qatnash idarisining bashliqi bolup ishleydu. 1962-Yili yanwarda köchüp, almutigha kélidu. Azad almutada mektepni tügitidu. Andin u üch yil gérmaniyede armiyede bolidu. Andin lénin'gradta ikki oqush ornini tamamlap, almutagha kélidu. Bir ay ishqa kirelmey, dadimizning raziliqini élip, lénin'gradqa kétidu we arktika-antarktida institutida ishlep, shu yerde qalidu."

Igilishimizche, azad memedinof 1977-yili shu waqittiki lénin'grad, yeni hazirqi sankit-pétérburg shehiridiki mémarchiliq-qurulush mektipini, andin 1984-yili muxina namidiki aliy bedi'iy-sana'et institutini tamamlighan. U 1992-yili rusiye ressamlar ittipaqining ezaliqigha qobul qilinidu we shundaqla "Mastér-klass" layihesining aptori süpitide köpligen körgezmilerni uyushturidu.

Hazir sankit-pétérburg shehiride yashawatqan Uyghur pa'aliyetchisi hemrajan zayitof ependining éytishiche, azad memedinofning wapati peqet rusiyediki Uyghurlar üchünla emes, belki dunyaning her qaysi memliketliride yashawatqan pütkül Uyghurlar üchünmu orni tolmas judaliq iken.

Hemrajan zayitof mundaq dédi: "Uning resimliri chet memliketlerde, nurghun yerlerde saqlanmaqta. Ete biz uning öyige bérip, teziye bildürmekchimiz. U köpligen ressamlarning resimlirini yighip, körgezmilerni achatti. Yéqin arilishattuq. Uyghurlar jem bolghanda azad akining galléréyeside yighilattuq. Mushu martta shu yerde yighilmaqchiduq. Korona wirusi dep, uchrishalmay qalduq. Uning ayali sémyonowa tamaramu ressam. Érmitazhning prézidénti pi'otrowskiy, dölet dumasi ezasi goworuxin, azad memedinof we tamara sémyonowaning töt kishilik chong uyushmisi bolghan."

Hemrajan zayitof yene goworuxin hem pi'otrowskiylarning Uyghurlar üchün köp yaxshi ishlarni qilghanliqini tekitlep, yene mundaq dédi: akisi waqqas memedinof kélip, pi'otrowskiy we goworuxin bilen uchriship, bir filim ishlep chiqardi. Bu filim tor betliride bar. Azad akining singlisi güzel memedinowa qazaqistan dölet akadémiyelik Uyghur tiyatirining bash ressami. Biz chongqur qayghurup, teziye bildürimiz."

Köpligen jumhuriyetlik we xelq'ara körgezmilerning qatnashquchisi azad memedinofning emgiki yuqiri bahalinip, bir nechche mukapatlar bilen teqdirlen'gen.


Toluq bet