Xitay türmiside ishligen Uyghur saqchimu tutqun qilinishtin qutulalmighan

Kocha charlawatqan Uyghur saqchi. 2015-Yili 17-awghust, aqsu.

14-Aprél küni kanada döletlik radiyosida xitaydin tarqalghan korona wirusi yuqumi éghirlashqan mezgilde kanadada yashaydighan bir Uyghur xanimning ziyaret qobul qilghanliqini, uning xitay da'iriliri teripidin tutqun qilinip lagérgha qamalghan éri we yurtidiki ata-ana, uruq-tughqanlirining ehwalidin ensirewatqanliqi heqqide xewer bérildi.

Biz éniqlashlar dawamida gülshen haji isimlik bu xanimning 2016-yili kanadagha oqush üchün kelgenliki, nöwette kanadaning wankowir shehiride bir qizi bilen turuwatqanliqi, uning ürümchidiki xitay türmiside ishleydighan éri adil yaqupning 2018-yili tutqun qilinip, lagérgha qamalghanliqidin xewer taptuq.

Gülshen haji xanim 15-aprél radiyomiz ziyaritini qobul qilip, 22 yil türme saqchisi bolup ishligen éri adil yaqupningmu xitay da'iriliri teripidin tutqun qilinip, lagérgha qamilishtek qismettin qutulalmighanliqini bildürdi.

Gülshen xanimning bildürüshiche, uning éri adil yaqup 1975-yili 11-ayning 11-küni ürümchide tughulghan. U 1996-yildin bashlap, ürümchidiki lyudawan türmisi, gherbiy tagh rayonluq türme qatarliq jaylarda taki 2018-yili 3-aygha qeder 22 yil türme saqchisi bolup ishligen iken.

Emma 2018-yili 3-ayning 23-küni uning kanadada oquwatqan ayali gülshen xanim we qizi bilen bolghan téléfon alaqisi tuyuqsiz üzülüp qalghan. Gülshen xanim sürüshtürüsh arqiliq érining tutqun qilinip, ürümchidiki lagérgha élip kétilgenlik xewirini alghan.

Gülshen xanimning bildürüshiche, éri adil yaqupning eyni chaghda tutqun qilinish sewebi éniq emes iken. Uning bildürüshiche, adil yaqup tutqun qilinip 11 aydin kéyin, yeni 2019-yili 4-ayning 7-küni lagérdin qoyup bérilip, ürümchidiki öyige qayturulghan, emma xizmitidin heydelgen. U ürümchidin chiqmasliq sherti bilen a'iliside nazaretke élin'ghan.

Türme saqchisi adil yaqup lagérdin qoyup bérilgendin kéyin ündidar arqiliq kanadadiki ayali we qizi bilen téléfonda qerellik sözliship turghan. Gülshen xanimning bildürüshiche, éri uchrighan achchiq qismetler uning yürikini ezgen bolsimu, emma eyni chaghda éri we yurtidiki ata-ana, uruq-tughqanlirigha téximu köp xeter kélishidin ensirigenliki üchün amalsiz süküt yolini tallighan.

Emma 2020-yili 1-ayning 27-küni lagérdin qoyup bérilip öyide nazarette turuwatqan adil yaqupning 2-qétim tuyuqsiz ghayib bolushi gülshen xanimning érining ehwalini taratqulargha ashkarilishigha seweb bolghan iken.

Gülshen xanimning bildürüshiche, u 14-aprél küni kanada döletlik radiyosining ziyaritini qobul qilip, korona wirusi yuqumi éghir boluwatqan mezgilde tutqundiki érining ehwalidin xewer alalmasliqi özini qattiq ensiretkenlikini bildürgen.

Gülshen xanimning tekitlishiche, uning 15-aprél küni erkin asiya radiyosining ziyaritini qobul qilish qararigha kélishi xitayda 22 yil türme saqchisi bolup ishligen érige oxshash saqchi xadimlirining tutqun qilinip lagérgha qamilish qismitidin qutulalmighanliqidek heqiqetni dunyagha ashkarilash üchün iken.

Kanada sherqiy türkistan jem'iyitining re'isi tuyghun abduweli ependimu ziyaritimizni qobul qilip, gülshen xanimning jasaritidin téximu köp Uyghurlarning ilham élishi kéreklikini bildürdi.