“Uyghur sot kollégiyesi” ning tunji soti échilish harpisida “Sherqiy türkistan teshkilatlar hemkarliq munbiri” jiddiy yighin chaqirdi
2021.05.31

Dunya Uyghur qurultiyining re'isi dolqun eysa ependining teklipi bilen 5-ayning 29-küni chüshtin kéyin “Sherqiy türkistan teshkilatlar hemkarliq munbiri” jiddiy yighin chaqirip, nöwettiki muhim mesililer we pa'aliyetler toghrisida muzakire élip bardi. Muzakire netijiside yighinda bezi muhim qararlar maqullandi. D u q ning mu'awin re'isi perhat muhemmidi riyasetchiliq qilghan bu yighinda aldi bilen d u q re'isi dolqun eysa ependi söz qilip, bu yighinning meqsiti toghrisida tepsiliy melumat berdi. Tor yighini axirlashqandin kéyin ziyaritimizni qobul qilghan d u q re'isi dolqun eysa ependi hazir xelq'arada muhim ishlarning yüz bériwatqanliqini, bulardin birining 2020-yili 9-ayda en'giliyede qurulghan musteqil “Uyghur sot kollégiyesi” ning tunji soti bashlinish aldida sherqiy türkistan teshkilatlirini bu tarixiy ehmiyetke ige bolghan sotning jeryanigha masliship bérishini telep qilidighanliqini bayan qildi.
D u q re'isi dolqun eysa ependi yighinni ötküzüshtiki ikkinchi meqsetning Uyghur diyaridiki mejburiy emgektin payda éliwatqan wolkswagén shirkitining gérmaniyening wolfsburg shehridiki merkiziy binasi aldida we mezkur shirketning dunyaning her qaysi döletliridiki shöbe shirketliri aldida namayish qilish toghrisida muzakire élip bérilghanliqini bayan qildi.
Melum bolghinidek, 6-ayning 23-küni dunya olimpik küni. Mezkur yighinda bu kün munasiwiti bilen sherqiy türkistan ammiwiy teshkilatliri, bolupmu yawropa döletliride pa'aliyet élip bériwatqan sherqiy türkistan ammiwiy teshkilatliri 23-iyun küni shiwétsariyening lozan shehridiki olimpik idarisining aldida namayish ötküzüp, béyjingda ötküzülmekchi bolghan qishliq olimpik musabiqisini bayqut qilish toghrisida muzakire élip bérildi. Dolqun eysa ependi bu heqte melumat berdi.
Tor arqiliq chaqirilghan yighin'gha dunyaning her qaysi jaylirida pa'aliyet élip bériwatqan 50 teshkilatning mes'ulliri ishtirak qildi. 2 Sa'et dawamlashqan yighinda yuquriqi mesililer toghrisida muzakire élip bérilip, bu heqte qarar maqullandi. D u q re'isi dolqun eysa ependi bu heqte melumat berdi.
Dolqun eysa ependi d u q ning sherqiy türkistan ammiwiy teshkilatlirining qollishi bilen xitaygha qarshi élip barghan pa'aliyetlirining netijside xitayning xelq'arada qéyin weziyetke chüshüp qalghanliqini, shunga bu peytning chet eldiki sherqiy türkistanliqlarning ittipaqlishish zamani ikenlikini tekitlidi.
Yighinda 4-iyundin 7-iyun'ghiche londonda musteqil “Uyghur sot kollégiyesi” ning tunji sotining bixeterlik xizmetliri toghrisidimu muzakire élip bérilghan. D u q ning mu'awin re'isi perhat muhemmidi ependi bu heqte melumat berdi.
Dunya Uyghur qurultiyining chaqiriqi bilen 2020-yili 26-mart küni amérika, kanada, awstraliye, yaponiye, türkiye, norwégiye, shiwétsiye, finlandiye, bélgiye, firansiye, shiwétsiye, awstraliye, gérmaniye, en'gliye, gollandiye, qazaqistan, qirghizistan qatarliq döletlerde aktip pa'aliyet élip bériwatqan Uyghur teshkilatlirining qollishi we qatnishishi bilen “Sherqiy türkistan teshkilatlar hemkarliq munbiri” qurulghanidi. Mezkur munber her ayda izchil halda yighin chaqirip, nöwettiki muhim mesililer toghrisida muzakire élip barmaqta we ortaq qararlarni maqullimaqta.