Qazaqistanliq ikki Uyghur tenheriketchi dunya musabiqiside chémpiyon boldi

Ixtiyariy muxbirimiz oyghan
2021.09.02
Share on WhatsApp
Share on WhatsApp
Qazaqistanliq ikki Uyghur tenheriketchi dunya musabiqiside chémpiyon boldi Ukra'inada ötken dunya musabiqisige qatnashqan qazaqistanliq tenheriketchiler. 2021-Yil 25-awghust.
RFA/Oyghan

Qazaqistandiki Uyghur yashlirining tenheriketning her xil türliride jumhuriyetlik, asiya qit'esi boyiche we dunya musabiqilirige qatniship, chong utuqlargha ériship kéliwatqanliqi melum. Boks, karaté, yeni qa'idisiz chélishish, chambashchiliq, kikboksing, yeni erkin mushtlishish, jyu-jitsu, yeni erkin chélishish we mushtlishish we bashqilar bilen bir qatarda tornikta ésilip, heriket qilish, ussul oynash qatarliq tenheriketning az uchraydighan türliridinmu dunya musabiqilirige qatniship, chémpyon bolghan Uyghur tenheriketchiliriningmu chiqiwatqanliqi éniq.

Yéqindin buyan qazaqistan ammiwiy axbarat wasitiliride ukra'ina paytexti kiyéf shehiride ötken “Stritliftin'g”, yeni tornikta tartilish we ikki qatar chengzide heriketlishish türi boyiche dunya musabiqisige qazaqistanliq tenheriketchilerningmu qatniship, yaxshi körsetküchlerge érishkenliki heqqide uchurlar tarqatqanidi. Ukra'ina metbu'atlirida élan qilin'ghan xewerlerge qarighanda, “Ukra'ina kocha worka'uti” birleshmisi uyushturghan mezkur musabiqige 15 memlikettin hem ukra'inaning 25 shehiridin bolup, 300 din oshuq tenheriketchi qatnashqaniken.

Ukra'inada ötken dunya musabiqisige dunya chémpiyoni bolghan ramil ablizof. 2021-Yil 25-awghust.
Ukra'inada ötken dunya musabiqisige dunya chémpiyoni bolghan ramil ablizof. 2021-Yil 25-awghust.

Emdi qazaqistanning eng inawetlik axbarat wasitilirining biri “Téngri nyus” agéntliqi élan qilghan “Qazaqistanliqlar stritliftin'g boyiche dunya musabiqiside dunya rékortlirini yéngilidi” namliq maqalide éytilishiche, qazaqistandin bu musabiqige 11 tenheriketchi qatnashqan bolup, ularning 8 nepiri chémpyon bolghanken. Shuning bilen qazaqistan komandisi alghan médalliri jehettin musabiqide birinchilikni igiligen. Damir nebiyéf, ildar yaghyayéf, walid gadjibékof qatarliq dunya rékorti yéngilighan tenheriketchiler ichide ramil ablizof we na'il iminof qatarliq Uyghur yigitliriningmu ismi tilgha élin'ghan. Jümlidin ramil ablizof öz salmaq derijside qoshumche éghirliq we yene 20 kilogramm qoshup ikki qoli bilen küch körsitish arqiliq rékort yéngilighan bolsa, 16 yashqiche bolghan 55 kilogrammliq salmaq bilen iminof na'il ikki qatar chengzide 151 qétim tartilip, dunya da'iriside yéngi körsetküch namayish qilghan.

Ukra'inada ötken dunya musabiqiside dunya chémpiyoni bolghan na'il iminof. 2021-Yil 25-awghust.
Ukra'inada ötken dunya musabiqiside dunya chémpiyoni bolghan na'il iminof. 2021-Yil 25-awghust.

Biz hazir almuta shehiride turidighan ramil ablizof bilen söhbetliship, uning tenheriketning “Worka'ut” türi bilen shughullinish netijiside yetken utuqliridin xewerdar bolduq. Uningdin igilishimizche, ramil ablizof damollam oghli 1999-yili almuta wilayiti Uyghur nahiyesining chonja yézisida tughulghan bolup, u tenheriket bilen 2012-yildin buyan shughulliniwatqaniken. U tornikta tartilishni özlikidin öginip, 2016-we 2017-yilliri sheherlik, jumhuriyetlik musabiqilerde aldinqi orunlarni igiligendi. Tenheriketning worka'ut türining qazaqistanda tarap, kücheyginigimu bir nechche yil bolghaniken.

Ramil ablizof radiyomiz ziyaritini qobul qilip, tenheriketning bu türi boyiche jumhuriyet da'iriside musabiqilerge qatnishiwatqanlar ichidin Uyghurlardin hazirche özining yalghuz bolup kelgenlikini körsitip, mundaq dédi: “Worka'ut bilen shughulliniwatqinimgha 10 yildek boldi. 2017-Yildin 2020-yilghiche qazaqistan chémpyoni boldum. 2021-Yili qazaqtstan boyiche musabiqe bolmidi. 2019-Yili birinchi qétim dunya musabiqisige qatniship, 3-orunni aldim. 2020-Yili ukra'inada dunya musabiqiside 2-orunni alsam, bu yili 1-orunni aldim. Qazaqistandin 15 bala bérip, ularning arisidin ikki Uyghur balisi, yeni men we méning shagirtim na'il iminof boldi. U bir yil burun méningda meshiqlinishke bashlidi. Bizning bu tenheriket türi boyiche musabiqide onche qatnashquchi boldi.”

Ramil ablizofning ata-anisi mu'ellimler bolup, almuta wilayitining Uyghur nahiyesige qarashliq ardolata yézisidin iken. U hazir almuta shehiridiki “Banzay” tenheriket kulubida worka'ut boyiche trénérliq qilip kelmekte.

Ramil ablizof yene mundaq dédi: “Bu musabiqige firansiye, bélgiye, chéxiye, bolghariye, chili, xitay, moldowa, polsha yene bashqa memliketlerdin qatnashti. ‛birinchi orun aldi‚ dégen xewer kelgende bek xushal boldum. Özümning oqughuchum na'il iminof birinchi orun alghanda uningdin artuq xushal boldum. Musabiqe pütüp, almutagha qaytip kelgende bizni daqa-dumbaq, karnay-surneyler bilen nahayiti umdan kütüwaldi. Uningghimu xushal bolduq. Ukra'inada biz qazaqistanning abruyini yene bir qétim köterduq. Biz Uyghurlar, kélechektimu élimizning tughini égiz kötürüshke tirishimiz. Apam bilen dadam méni nahayiti qollidi. Shulargha ming bir rehmet!”

Ramilning anisi hemrabüwi zayirowa xanim her qandaq perzentning xushalliqi bu hem ata-aniningmu xushalliqi ikenlikini otturigha qoyup, mundaq dédi: “Balamning dunya musabiqisige qatniship, birinchi orunni igiliginige we qazaqistanning tughini kötürüp, Uyghurlarni dunyagha tonutqinigha men xushalmen. Men balamgha kélechekte uningdinmu égiz choqqilardin körünüshige we salametligining zor bolushigha tilekdashmen.”

Ramil ablizof kichikidinla Uyghur milliy sen'itige qiziqip, milliy ussullarni ijra qilishni yaqturup kelgeniken. Buningdin tashqiri u özi tallap alghan tenheriket boyiche dunya musabiqilirige qatniship, yene köpligen utuqlargha yétishni arman qilidiken.

Radiyomiz ziyaritini qobul qilghan ramil ablizofning kesipdishi we trénér tahir seydullayéf ependi mundaq dédi: “Besh-alte yil boldi ramilni közitip kéliwatimen. Özining tirishchanliqidin tenheriketning worka'ut türi boyiche chong utuqlargha yétiwatidu. Yéqinda u dunya chémpyoni atilip keldi. U shagirtlirinimu élip bérip, na'il iminofmu dunya chémpyoni ataldi. Bu, elwette xelqimiz üchün, memlikitimiz üchün chong xushalliq dep oylaymen. Worka'ut boyiche ramillar birinchilerdin bolup köch bashlap kéliwatidu. Men ramil we uning shagirtlirigha chong utuqlar tileymen”

Igilishimizche, qazaqistanda tenheriketning her xil türliri boyiche dunya miqiyasida zor netijilerge érishiwatqan tenheriketchiler arisida Uyghurlarmu barken. Shularning ichide bolupmu boks boyiche chémpyon atalghanlarmu köp bolup, Uyghurlar ulardin köp ümidlerni kütmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.