Uyghur gimnastika mahiri nariman qurbanof italiyediki musabiqide kümüsh médalgha érishken

Ixtiyariy muxbirimiz oyghan
2019-07-26
Share
Italiyede-Kumush-Medalgha-Erishken-Uyghur-Gimnastika-Mahiri-Nariman-Qurbanof-2019.jpg Italiyening ötküzülgen dunya musabiqiside kümüsh médalgha érishken Uyghur gimnastika mahiri nariman qurbanof (soldin birinchisi). 2019-Yili iyul. Né'apol, italiye.
RFA/Oyghan

Qazaqistanliq Uyghur yashlirining tenheriketning her xil türliri boyiche ötküzülüwatqan dunyawi musabiqilerde chong netijiler qaziniwatqanliqi melum. Yéqinda "Qazaq axbarat byurosi" agéntliqida élan qilin'ghan "Oqughuchilarning dunya tenheriket oyunliri 2019: gimnastika mahiri nariman qurbanof kümüsh médal utuwaldi" namliq maqale élan qilin'ghan. Uningda 21 yashliq Uyghur yigiti nariman qurbanofning gimnastikining "At üstidiki heriket" türi boyiche kümüsh médalgha érishkenliki xewer qilin'ghan.

Igilishimizche, mushu ayning 3-künidin 14-künigiche italiyening né'apol shehiride oqughuchilar-yashlarning tenheriket oyunliri boyiche 30-qétimliq yazliq dunya musabiqisi bolup ötken. Uninggha tenheriketning 18 türi boyiche 112 memlikettin 6000 gha yéqin tenheriketchi qatnashqan. Omumiy netijiler boyiche qazaqistan komandisi 1 altun médal, 5 kümüsh médal we 1 mis médal bilen 25-orunni igiligen.

Biz shu musabiqidin kéyin qirghizistanning issiqköl oblastida dem éliwatqan gimnastika mahiri nariman qurbanof bilen alaqiliship, uning italiyediki dunya musabiqiside körsetken tirishchanliqliri heqqide melumat igiliduq.

Nariman qurbanof radiyomiz ziyaritini qobul qilip, mundaq dédi: "Oqughuchi we yashlarning tenheriket oyunliri hem dunya musabiqisi méning bu yildiki ikki chong meqsitim bolup hésablinidu. Omumen italiyede ötken musabiqige 2016-yildin tartip meqsetlik halda teyyarlandim. Uninggha yaxshi teyyarlandim désem bolidu. Deslepte utuqlirim yaxshi bolghan idi, emma axirqi basquchta hemmini netijilik körsitish mumkin bolmidi. Shundaqtimu özüm tiriship, axirida ikkinchi orunni igilidim. Xulasilep éytqanda, bu netijemdin razi boldum désem bolidu. Emdi kélechekte bolidighan dunya musabiqisige maharetlirimni téximu murekkepleshtürüp, jiddiy teyyarlinishim kérek. Ötken yili bolghan dunya musabiqiside xelq'ara gimnastika birleshmisi manga dunya boyiche tenheriket mahiri dégen belge we guwahname bergen idi. Bu dunya boyiche chong sherep. Méning kélechekte birla meqsitim bar. Aldimizdiki dunya musabiqisige jiddiy teyyarlinish. Méning meqsitim peqet altun médal élishla emes, belki olimpik tenheriket musabiqiside dunya chémpiyonluqigha érishishtur."

Melum bolushiche, almuta shehiride yashawatqan nariman qurbanof besh yéshidin tartip gimnastika bilen shughullan'ghan. Uning dadisi hüsenjan qurbanofmu shu sahening mahiri bolup, narimanning érishken utuqlirida chong rol oynighan iken. Nariman qurbanof ötken yili awstraliyening mélborin shehiride ötküzülgen dunya musabiqiside altun médalgha érishken idi. U "At üstide mollaq étish" heriket usuli bilen dunya gimnastika tenherikiti saheside yéngiliq yaratqan hem uning téxnikisigha gimnastika fédératsiyesi teripidin "Qurbanof" yaki in'glizche "The Kurbanow" dep nam bérilgen. Nariman qurbanof shu yili yene silowéniyening kopér shehiride bolup ötken gimnastika boyiche dunya musabiqiside "At üstidiki heriket" boyiche orundighan maharetliri bilen ikkinchi orun'gha ériship, kümüsh médal bilen teqdirlen'gen idi. 

"Kéntawr" qabiliyetlik tenheriketchilerge yardem qilish jem'iyetlik fondining prézidénti, qazaqistanda xizmet körsetken meshqawul mexmut iskenderofning éytishiche, hazir qazaqistanliq gimnastika mahirliri mushu yili gérmaniyede ötküzülidighan dunya musabiqisige teyyarlanmaqtiken. U mundaq dédi: "Shtutgartta dunya musabiqisi bolidu. U ikki basquch boyiche élip bérilidu. 24 Komandining ichige kirish kérek bolghan birinchi basquchtin öttuq. Ular 16-orunni élip kirdi. Ular alte mahirdin teshkil tapqan bolup, shularning üchi Uyghur. Nariman qurbanof, hakim musayéf we ilyas ezizof. Ularning hemmisi qazaqistan komandisi terkibige kirgen. U yerde nachar tenheriketchiler bolmaydu. Nariman özining shexsiy téxnikisini körsitip, nam qazandi." 

Maxmud iskenderof yene gimnastika türlirining her xil bolidighanliqi, her bir türning öz aldigha telepliri we téxnikisi bolidighanliqini bildürdi. U tenheriketning gimnastika türi boyiche yuqirida ismi atalghan Uyghur yigitliridin bashqa yene karimi milad, érbol jantiqof qatarliq talantliq tenheriketchilerdin köp ümid kütidighanliqini otturigha qoydi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.