Londonda bashlan'ghan "Uyghur sot kollégiyesi" ning guwahliq anglash yighini xitayni qattiq bi'aram qilghan

Ixtiyariy muxbirimiz ekrem
2021-09-10
Share
Londonda bashlan'ghan "Uyghur sot kollégiyesi" ning ikkinji qétimliq we shundaqla axirqi qétimliq guwahliq anglash yighini 9-séntebir resmiy bashlandi.
Social Media

Xitay hökümiti bu yil 6-ayda ötküzülgen "Uyghur sot kollégiyesi" ning tunji qétimliq guwahliq anglash yighinining aldi-keynide "Pisent qilmaymiz" dep turup, "Uyghur soti" ni imkani yar bergen derijide qarilap, eyiblep kelgen idi. Bu nöwetmu "Uyghur sot kollégiyesi" ning 2-qétimliq guwahliq anglash yighinini qattiq eyibleshni, qarilashni bashlidi.

Xitayning zuwani bolghan "Yer shari waqti" torining 10-séntebirdiki xewirige asaslan'ghanda, 9-sénterbir küni xitayning en'giliyede turushluq bash elchixanisi bilen Uyghur aptonum rayonluq hökümet "Shinjanggha munasiwetlik mesililer" toghrisida tor arqiliq birleshme axbarat élan qilish yighini ötküzüp, "Uyghur sot kollégiyesi" ni qattiq eyibligen. Bu axbarat élan qilish yighinigha xitayning en'giliyediki bash elchisi jéng zégu'ang, Uyghur aptonum rayonluq partiye komitéti teshwiqat bölümining mu'awin mudiri shu güyshyang qatarliqlar riyasetchilik qilghan we söz qilghan. Ular sözide aldi bilen "Keng kölemlik tutqun qilish", "Diniy erkinlikni basturush", "Mejburiy emgek", "Jinsiy parakendichilik we xorlash", "Irqiy qirghinchiliq" qatarliq "Xitaygha qarshi unsurlar oydurup chiqarghan 28 yalghan pakit" ni pash qilghan.

Xewerde bayan qilishiche, shu güyshyang sözide "'Uyghur sot kollégiyesi' ning qara chümperdisini yirtip tashlap, bu atalmish sotning edliye orgini emeslikini, guwahliq anglash yighininingmu edliye tertipi emeslikini, belki bu sotning uchigha chiqqan saxtikar, bimene, külkilik yawayi organ bolghanliqi" ni pash qilghan. Jéng zégu'ang bolsa "Atalmish 'Uyghur sot kollégiyesi' ning saxta sot ikenlikini, xitaygha qarshi küchler oydurup chiqarghan bir meydan ighwagerchilik ikenlikini, sotning ghelibe qazinalmaydighanliqini we meghlubiyetke mehkum ikenlikini, bu sotning xitay hökümitining shinjang siyasitini özgertelmeydighanliqini, xitay hökümitining shinjang siyasitining tewrenmes bir siyaset bolghanliqini tekitligen". Xitay hakimiyiti yene en'giliye hökümitidin bu sotni men'iy qilishni telep qilghan.

Halbuki, "Uyghur sot kollogiyesi" ning 2-qétimliq guwahliq anglash yighini bügün londunda muweppeqiyetlik bashlandi. Xitayning bir kün burun birleshme axbarat élan qilip sotni eyiplishige qarita londunda sotqa qatnishiwatqan d u q ning mu'awin re'isi perhat muhemmidi ependi inkas bildürüp, bu sotning netijisidin xitayning qattiq endishe qiliwatqanliqini tilgha aldi.

Türkiyediki istiratégiye mutexessisi, d u q ning mu'awin re'isi doktur erkin ekrem ependi bu heqte toxtalghanda, eger bu sottin "Insaniyetke qarshi jinayet" yaki "Irqiy qirghinchiliq" qarari chiqqan teqdirde, xitay hakimiyitini xelq'arada éghir weziyetke qoyidighan 3 türlük yaman ehwalning yüz béridighanliqini bayan qilip ötti. D u q ijra'iye komitétining mu'awin re'isi semet abla ependimu bu heqte qarashlirini ipade qildi.

10-Séntebir londunda bashlan'ghan "Uyghur sot kollégiyesi" ning 2-qétimliq guwahliq anglash yighini 13-sintebirge qeder 4 kün dawamlishidiken. Bu jeryanda köpligen shahidlar xitayning jaza lagérliri toghrisida guwahliq bergendin tashqiri, yene köpligen mutexessisler we tetqiqatchilarmu xitayning Uyghurlar üstidin yürgüziwatqan basturushlirining "Insaniyetke qarshi jinayet" we "Irqiy qirghinchiliq" qa yatidighan-yatmaydighanliqi toghrisida özlirining qarashlirini bildürüp ötidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet