Ghulja penjimde 2000‏-yillardin kéyin tughulghan “Xeterlik ewlad” tin 100 nechche yash tutqun qilin'ghan

Muxbirimiz shöhret hoshur
2022.10.25
Share on WhatsApp
Share on WhatsApp
Tutqundiki pénsiyonér niyaz nasirning lagérdin jesiti chiqqan Watikan shehirining ikki hessisi bilen teng, 10,000 jinayetchi sighidighan ürümchi 3-türmisining aldi körünüshi. 2021-Yili 23-aprél.
AP

Ötken heptidiki éniqlashlirimizda Uyghur élida 20-qurultay harpisida yene bir ret “Qattiq zerbe” dolquni qozghalghanliqi we xotendila 1000 din artuq kishining tutqun qilin'ghanliqi ashkarilan'ghan idi. Bügünki éniqlashlirimiz dawamida, mezkur dolqunda ghulja shehirining penjim yézisinla 100 nechche kishining tutqun qilin'ghanliqi, tutulghanlarning köpinchisining 2000‏-yillardin kéyin tughulghan atalmish “Xeterlik ewlad” qa mensup yashlar ikenliki aydinglashti.

Xitayning kompartiyesining 20‏-qurultiyi harpisida, Uyghur élida yene bir qattiq “Qattiq zerbe” dolquni qozghalghanliqi ashkarilan'ghandin kéyin, bu dolqunning ghuljadiki tesiri heqqidimu éniqlash élip barduq. Nöwette xitayning ichkiri ülkiliride yashawatqan weziyettin xewerdar bir kishining inkas qilishiche, bu qétimqi dolqunda 2017‏-yildiki chong tutqunda tordin chüshüp qalghanlar, bolupmu yéshi seweblik jazalanmay qalghanlar nuqtiliq zerbe obyékti bolghan.

Téléfonimizni qobul qilghan ghulja sheher penjim yéziliq saqchixana xadimining ashkarilishiche, bu qétimqi dolqunda, penjim yézisidin 125 kishi tutqun qilin'ghan. Penjim yézisining eng chong kentliridin bolghan we sheherge yéqin jaylashqan töwen penjim kent partiye sékritarining ashkarilishiche, mezkur kenttin bu yil 9‏-ayning axiri we 10‏-ayning bashlirida jem'iy 62 kishi tutqun qilin'ghan. Bu xadimning yene eskertishiche, bu qétimqi tutqunda nuqtiliq kishiler bilen munasiwette bolghanlar, bolupmu 2000‏-yillardin kéyin tughulghan “Xeterlik ewlad” qa mensup yashlar asasliq nishan bolghan.

Mezkur xadim, bu qétim tutulghanlarning qeyerge apirilghanliqi, nede tutup turuliwatqanliqi we qandaq bir terep qilinidighanliqi heqqide melumat bérelmidi. Emma u bu qétim tutulghanlarning aptonum rayon we oblasttin chüshken tizimlik boyiche tutulghanliqini ashkarilidi.

Mezkur xadimning bayanliridin yene melum bolushiche, yuquridin chüshken tutush tizimlikide her bir shexsning néme üchün tutulidighanliqi heqqide izahat bérilgen we köpichisining “Xeterlik ewlad” qa mensup kishiler ikenliki tilgha élin'ghan.

Xitay taratqulirining bu yil 7‏-aydiki bir xewiride, j x tarmaqlirining memliket boyiche “Qara küchlerge zerbe bérish” dolquni qozghap, jem'iy 72 ming kishini tutqun qilghanliqini bayan qilghan idi. Eyni chaghdiki éniqlashlirimiz dawamida, xotendiki bir saqchi xadimi, mezkur dolqunning xoten'ge kelgende tordin chüshüp qalghan “Üch xil küch” lerge zerbe bérish dolqunigha aylan'ghanliqi we özi qatnashqan bir yighinda waris qatarliq 20 nechche kishining béshigha qara xalta kiydürlgenlikini ashkarilighan idi.

Ötken hepte téléfonimizni qobul qilghan xotendiki xitay qoralliq qisim alahide etritining bashliqining anisimu, oghlining 20‏-qurultay harpisida bashlan'ghan “Qattiq zerbe” dolquni seweblik tolimu aldirash ikenlikini tilgha alghan idi.

Penjimdin téléfonimizni qobul qilghan mezkur kent sékritari bu qétimqi tutqunlarning éniq kimlikliri heqqide melumat bermidi, emma u 2000‏-yillardin kéyin tughulghan yashlarning “Asan qaymuqidighan” bolghachqa, ularning bir mezgil “Telim-terbiye” ge muhtaj ikenlikini ilgiri sürdi.

Yoqurida ghuljaning penjim yézisida xitay kompartiyesining 20‏-qurultiyi harpisida, 2000‏-yillarda tughulghan “Xeterlik ewlad” katégoriyesige mensup yashlardin 100 nechche kishining tutqun qilin'ghanliqi heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.