Учтурпандики бир оқутқучи қийинчилиқи бар икки оқуғучисиға ярдәм қилғанлиқи үчүн 14 йиллиқ кесветилгән

Мухбиримиз шөһрәт һошур
2021-09-08
Share
toqquzaq-birinji-ottura-mektep.jpg Ятақ бинаси тәрбийәләш мәркизигә айландурулған тоққузақ биринчи оттура мәктәп. 2017-Йили, сентәбир.
RFA/Abduweli Ayup

Уйғур районда 2017 ‏-йилидин буян давам қиливатқан зор тутқунда, қилған хәйр-сахавәт ишлири "диний әсәбийликниң ипадиси" дәп қарилип кесиветилгәнләрниң сани аз әмәс. Көпинчә һалларда тиҗарәтчиләр бу қалпақ билән "тәрбийәләш" кә елип кетилгән болса, учтурпанниң имамлирим йезисидики башланғуч мәктәп оқутқучиси керәм абдурахман қейинчилиқи бар икки оқуғучисиға иқтисадий ярдәм қилғанлиқи үчүн 14 йиллиқ кесиветилгән. Дейилишичә, бу кесимгә униң мәзкур икки оқуғучисиниң телефонидин "чатақ" чиқип қолға елиниши түрткә болған икән.

Учтурпанлиқ муһаҗирлардин бири өткән һәптә радийомизға учур йоллап, учтурпанниң имамлирим йезисидики башланғуч мәктәп оқутқучиси керәм абдурахманниң қийинчилиқи бар икки оқуғучисиға ярдәм қилғанлиқи үчүн 14 йиллиқ кесеиветилгәнликини инкас қилди. Учтурпандики әдлийә хадимлири бу һәқтә мәлумат беришни рәт қилди. Инкаста дейилишичә, мәзкур икки оқуғучи ата-аниси аҗришип кәткәндин кейин, башланғучниң4 ‏-йиллиқидила оқушни тохтатқан вә қурулушларда ишләшкә мәҗбур болған. Бу икки оқуғучисниң дәрс нәтиҗилириниң яхшилиқидин хәвири болған керәм абдурахман, уларни өз йенидин пул чиқирип, үрүмчи кәспий оттура мәктипигә боғалтирлиқ вә ашпәзлик кәспи бойичә оқушқа йолға салған. Улар оқуш пүттүрүшкә 1 йил қалған мәзгилидә, илгири ишләткән телефондин "чатақ" чиқип тутуп кетилгән. Бу тутқун уларниң оқутқучиси керәм абдурахманниңму сорақ үстилигә келишигә сәвәп болған.

Хәвәр архиплиримизни ахтурғинимизда, учтурпан имамлиридимдин үрүмчи кәспий оттура мәктәпкә оқушқа барған вә тутуп кетилгән икки оқуғучиниң 16 яш вә 17 яшлиқ абдулла абдуреһим вә абдукерим абдуреһим икәнлики мәлум болди. Шу чағдики ениқлашлиримизда дәлиллинишичә, акиси абдулла абдуреһим дәрс аңлаватқан синипидин, укиси абдукерим абдулла болса практика қиливатқан ашханидин тутуп кетилгән. Улар "тәрбийәләш" тә 2 йилчә тутуп турулуп, яшлири 18дин ашқанда 5 йиллиқтин кесиветилгән.

Биз бу икки оқуғучиға ярдәм қилған оқутқучиси керәм абдурахманниң әһвалини ениқлаш үчүн учтурпан имамлиримдики алақидар кәнт сақчисидин мәлумат соридуқ. Мәзкур хадим юқириқи икки оқуғучиға ярдәм қилғанлиқи үчүн тутулған оқутқучиниң исми керәм абдурахман икәнлики вә тутулуштин илигири12 ‏-кәнт башланғуч мәктипидә хизмәт қилғанлиқини дәлиллиди. Керәм абдурахманниң 14 йиллиқ кесилгәнликини тилға алған бу хадим, униң кесилишигә мәзкур икки оқуғучиға ярдәм қилғинидин башқа йәнә аяли тәрәптики туғқанлириниң көпинчиси сиясий тутқун болушиниңму сәвәп болғанлиқини баян қилди. У йәнә соаллиримизға җавабән керәм абдрахманниң тәкшүрүлүш давамида пиландин артуқ бир пәрзәнти сәвәбликму "диний әсәбийлик" кә бағланғанлиқ еһтималлиқини илгири сүрди.

Юқурида учтурпан имамлиримда бир башланғуч мәктәп оқутқучисиниң икки оқуғучисға ярдәм қилғанлиқи үчүн 14 йиллиқ кесиветилгәнлики һәққидә аңлитиш бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт