Kanadadiki bir Uyghur a'ilisi korona wirusi bilen yuqumlan'ghan

Ixtiyariy muxbirimiz jewlan
2020-04-30
Share
kanada-virus.jpg Saqliqni saqlash xadimliri korona wirus tekshürüsh merkizide bimarlar bilen paranglishiwatqan körünüsh. 2020-Yili 17-mart, kanada.
AFP

Pütün dunyagha yamrighan korona wirusining chet'elde yashawatqan Uyghurlarning hayatighimu tehdit peyda qiliwatqanliqi melum.

Yéqinda kanadada yashawatqan Uyghurlardin abdul'ezizning a'ile boyiche bu wirus bilen yuqumlinip, üch heptidin béri késellik bilen élishqanliqi, hazir ehwalining kündin kün'ge yaxshiliniwatqanliqi melum boldi.

Abdul'ezizning ayalining bildürüshiche, u karantin yolgha qoyulghandin buyan öydin chiqmighan, emma tordin bir mal alghan bolup, uni échip ishlitip ikki kündin kéyin özide korona wirusining késellik alametliri körülüshke bashlighanliqini hés qilghan.

Abdul'ezizning ayali ziyaritimizni qobul qilip, deslepki bir heptide késellik alametliri körülüshke bashlighanda özini zukam dep oylap qalghanliqini, özining bu wirusni ashu pochta yollanmisidin kelgen dep guman qilidighanliqini bildürdi.

Bir heptidin kéyin uningdiki késellik alametliri éghirlashqan, baliliridimu késellik alamiti körülüshke bashlighan we ularning burun giriptar bolghan késelliri qayta qozghalghan.

Abdul'eziz ayalidiki késellik alametlirige qarap, korona wirusi dep guman qilghan bolsimu, éniq höküm qilalmighanliqini, özi we baliliridimu késellik alametliri körülüshke bashlighanda andin doxturxanilar bilen uqushqanliqini éytti.

Abdul'ezizning éytishiche, ayalining ehwali éghirraq bolghachqa doxturxanigha élip barghanda doxturlar uning ehwaligha qarap béqip bir nerse démigen, öyige qaytip dawalinishqa buyrughan؛ ular öyide özini dawalashqa bashlighan, doxturlardin meslihet sorighan, özlirige paydiliq tébbiy uchurlar we bashqilarning tejribisidinmu paydilan'ghan.

Abdul'ezizning ayalining bildürüshiche, a'ile doxturi ulargha bir dora bergen bolup, bu dora kar qilmisa ulargha korona wirusi yuqqan bolidiken. Bu dorimu abdul'ezizning ayaligha payda qilmighachqa u ikkinchi qétim özini tekshürtüshke barghan. Tekshürüsh jeryanida doxturlarning wirustin yuqumlinishtin ensirishi we tedbir élish jehettiki pozitsiyisi uni ensizlikke sélip, öyide dawalinish iradisini kücheytken.

Abdul'ezizning éytishiche, ular öyge qaytip kelgendin kéyin, özliride bar imkaniyet we igiligen rétséplarning hemmisidin paydilan'ghan. Ayalini bu késellik xélila qiynighan bolsimu, özi we baliliri bir hepte qiynilip, arqidin yaxshilinishqa bashlighan.

Nyu-yorktiki kolombiye uniwérsitétining tébbiy penler tetqiqatchisi doktor memet imin ulargha tébbiy jehettin meslihet bérip kéliwatqan iken. Doktor memet imin bu munasiwet bilen ziyaritimizni qobul qilip, özining ulargha dawalinish jehette toluq yétekchilik qilip kételmisimu, rohiy jehettin ishench we xatirjemlik bergenlikini bildürdi.

Abdul'ezizning éytishiche, üch kündin kéyin tekshürüsh netijisi négatip chiqqan؛ buningdin bir turup xushal bolsa, bir turup gumanlan'ghan we doxturlardin meslihet sorighan.

Doktor memet imin bu heqte toxtilip, tekshürüsh netijisining négatip chiqishi bimarda u késellikning yoqluqidin dérek bermeydighanliqini, bashqilarning bixeterliki üchün özini karantin qilish we qet'iy dawalinish kéreklikini tewsiye qildi.

Abdul'eziz yene bu wirusning undaq yaki bundaq shekiller bilen kishilerge yuqushi mumkinlikini, tordin bir nerse alghanda diqqet qilish, zakaz qilghan mehsulatni hoylida yaki garajda bir nechche kün turghuzush, eger wirus yuqup qalghan teqdirde waqtida tedbir élip özini karantin'gha élishi we dawalinish kéreklikini tewsiye qildi.

Radiyomiz bu heqtiki uchurlargha izchil diqqet qiliwatqan bolup, en'gliyede bu wirus bilen yuqumlinip, kéyin saqayghan nefise we türkiyede bu wirus tüpeylidin ölüp ketken ghoja'abdulla toghriliq xewer bergen idi. Kanadadiki abdul'eziz a'ilisining wirus bilen yuqumlinish ehwali shuni körsitiduki, bu wirus her xil yollar bilen yuqidiken. Eger wirus yuqqan teqdirde imkaniyetning bariche özige tayinish arqiliq uningdin ghalip kélishke tirishish kérek izken.

Melumatlardin qarighanda, korona wirusi yamrighan döletler ichide kanada hazir 12-orunda bolup, yuqumlan'ghuchilar 50 minggha, ölgenler 2900 gha yéqinliship qalghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.