Америкадики уйғур зиялийлири торонтодики уйғур җамаити билән учрашти

Мухбиримиз ирадә
2019-05-08
Елхәт
Пикир
Share
Принт
(Солдин оңға) профессор майсәм мутәллипова ханим, доктор әркин сидиқ, доктор ришат аббас, доктор мәмәт имин әпәндиләр. 2019-Йили 4-май, канада.
(Солдин оңға) профессор майсәм мутәллипова ханим, доктор әркин сидиқ, доктор ришат аббас, доктор мәмәт имин әпәндиләр. 2019-Йили 4-май, канада.
RFA/Irade

Йеқинда канададики «шәрқий түркистан җәмийити» вә шундақла уйғур җамаитиниң тәклипигә бинаән америкадики бир қисим тонулған уйғур зиялийлири торонто шәһиригә йетип берип, у йәрдики уйғур җамаити билән учрашқан. Бу паалийәтни тәшкиллигүчи орун болған «шәрқий түркистан җәмийити» ниң башлиқи туйғун абдувәли әпәндиниң билдүрүшичә, улар бу паалийәтни мәзкур тәшкилатниң йиллиқ күн тәртипигә асасән, бу зиялийларниң хизмәт вә оқуш тәҗрибилири вә һазирқи уйғур миллий давасида актип рол елиштики сәвәблирини башқилар билән ортақлишиши үчүн тәклип қилған.

Мәзкур паалийәткә тәклип қилинған уйғур зиялийлири америка коломбийә университетиниң тәтқиқатчиси доктор мәмәт имин, америкадики дора тәтқиқат бирләшмә идариси рак кесәлликлири тәтқиқат тармиқиниң йетәкчиси доктор ришат аббас, американиң әң даңлиқ алий мәктәплиридин бири масачусетис технологийә институтиниң (MIT) профессори, һәмдә хәлқара төрәлмә ғол һүҗәйриси саһәсидики әң нопузлуқ алимларниң бири болған майсәм мутәллипова ханим вә америка аләм тәтқиқат идарисиниң тәтқиқатчиси доктор әркин сидиқ әпәндиләр иштирак қилған.

Уларниң торонтодики зиярити 5-айниң 3-вә 4-күнлири икки күн давам қилған.

Туйғун әпәндиниң баян қилишичә, улар торонтода 400 әтрапидики уйғур җамаити билән учришип, лексийә сөзләп, пикир алмаштурған. Шундақла торонтодики икки мәсчиттә мусулман җамаитигә уйғурларниң нөвәттики вәзийити һәққидә доклат бәргән.

Улар йәнә, торонтодики уйғур мәдәнийәт өйини вә уйғур ана тил мәктипини зиярәт қилған.

Уйғур ана тилини сақлап қелиш мәсилисидә көп баш қатуруп келиватқан әркин сидиқ әпәнди торонтодики зиярити һәққидики тәсиратлирини биз билән ортақлашти.

Әркин сидиқ әпәнди торонтодики уйғур җамаитиниң уйғур мәдәнийәт өйини вә уйғур ана тил мәктипини вуҗудқа кәлтүрүш йолидики аңлиқ тиришчанлиқлиридин көп тәсирләнгәнликини билдүрди.

Бүгүн майсәм мутәллипова ханимму зияритимизни қобул қилип, өзиниң торонтодики уйғур җамаити билән көрүшкәндики тәсиратлирини ортақлашти. У бизгә бу қетимлиқ сәпириниң тунҗи қетим илмий хизмәтлири билән мунасивәтлик болмиған бир сәпәр болғанлиқини билдүрди. Майсәм ханим сөзидә «торонтода наһайити кәң бир уйғур җамаити бар икән, улар бизни бәк яхши күтүвалди. Мән буниңдин бәк сөйүндүм вә миннәтдар болдум» деди.

Майсәм ханим торонтода уйғур елидә хитай һөкүмити йүргүзүватқан аталмиш «омумий хәлқ саламәтлик тәкшүрүши» арқилиқ уйғурларниң ген учурини йиғиш һәрикити үстидики бир қисим тәтқиқатлири һәққидә доклат бәргән болуп, униң бу доклати зор диққәт қозғиған икән.

Юқиридики зиялийлар сөзлиридә бирдәк, нөвәттә уйғурларниң вәзийитиниң интайин җиддийликини, уйғур миллити һаят-маматлиқ бир пәйттә туруватқанда уйғур зиялийлириниң милләткә болған йүксәк мәсулийәт билән өзигә тегишлик рол ойнишиниң зөрүрлүкини тәкитләп, бу қетимқи паалийәтниң асасий мәқситиниңму дәл мушу икәнликини билдүрди.

Пикирләр (0)
Share
Толуқ бәт