خىتاي ئىككىنچى چوڭ نېفىت، تەبىئىي گاز تۇرۇبىسى قۇرۇشقا 13 مىليارد 600 مىليون دوللار مەبلەغ سالدى


2007-10-25
Share

بىرلەشمە ئاگېنتلىقىنىڭ پەيشەنبە خوڭكوڭدىن تارقاتقان خەۋىرىدىن مەلۇم بولۇشىچە، خىتايدىكى ئەڭ چوڭ نېفىت ھەم تەبىئىي گاز گۇرۇھى بولغان خىتاي نېفىت، تەبىئىي گاز ھەسسىدارلىق چەكلىك شىركىتى غەربىي شىمالدا يەنە ئىككىنچى چوڭ نېفىت گاز تۇرۇبا قۇرۇلۇشى ياساش ئۈچۈن 102 مىليارد يۈەن يەنى 13 مىليارد 600 مىليون دوللار مەبلەغ سالغان.

خىتاي نېفىت، تەبىئىي گاز ھەسسىدارلىق چەكلىك شىركىتى بۇ مەبلەغ ئارقىلىق قۇرماقچى بولغان 8 مىڭ كىلومېتىرلىق نېفىت، تەبىئىي گاز يۆتكەش تۇرۇبىسى قۇرۇلۇشىنى كېلەر يىل بېشىدا باشلاپ -2010 يىلى تاماملاشنى پىلانلىغان بولۇپ، نۆۋەتتە ھۆكۈمەت تەرەپنىڭ مۇناسىۋەتلىك تەستىقلىرى بۇ يىل ئاخىرى پۈتۈش ئالدىدا ئىكەن.

ئاۋغۇستنىڭ ئاخىرى مەزكۇر نېفىت، تەبىئىي گاز ھەسسىدارلىق چەكلىك شىركىتىنىڭ باشلىقى جياڭ جىېمىننىڭ بىرلەشمە ئاگېنتلىقى مۇخبىرىغا ئاشكارىلىشىچە، مەزكۇر نېفىت گاز تۇرۇبا قۇرۇلۇشى ئىلگىرى ئۇيغۇر ئېلىدە قۇرۇلغان " غەربنىڭ گازىنى شەرققە يۆتكەش تۇرۇبا قۇرۇلۇشى " دىن قالسا ئىككىنچى چوڭ گاز تۇرۇبا قۇرۇلۇشى بولۇپ، ئاساسلىقى تۈركمەنىستاندىن خىتايغا تەبىئىي گاز يۆتكەشنى مەقسەت قىلىدىكەن.

مەزكۇر گاز تۇرۇبىسى تۈركمەنىستاندىن باشلىنىپ ئۆزبېكىستان، قازاقىستانلارنى بېسىپ ئۆتكەندىن كېيىن ئۈرۈمچى ئارقىلىق لەنجۇ، شىئەن،شاڭخەي ئاخىرىدا گۇاڭجۇغىچە يېتىپ بارىدىكەن. ئۇيغۇر ئېلى نۆۋەتتە خىتايدىكى ئەڭ چوڭ نېفىت ھەم تەبىئىي گاز بازىسى بولۇپ خىتاي ھۆكۈمىتى تۆت مىڭ كىلومېتىرلىق " غەربنىڭ گازىنى شەرققە يۆتكەش" گاز تۇرۇبىسى ئارقىلىق ئۇيغۇر ئېلىنىڭ تەبىئىي گازىنى شاڭخەيگە يىلىغا 33مىليارد كۇپ مېتىردىن ئاققۇزماقتا.

خىتاي مۇشۇ سۈرئەتتە گاز يۆتكەشنى داۋام قىلسا ئۇيغۇر ئېلىنىڭ تەبىئىي گاز زاپىسى 20 نەچچە يىلغا قالماي پۈتۈنلەي تۈگەيدۇ.

ئۇيغۇر ئېلىدىكى يەرلىك خەلق مەزكۇر گاز يۆتكەش پىلانىدىن ھېچقانداق مەنپەئەتكە ئېرىشەلمىگەندىن نارازى بولۇۋاتقاندىن باشقا، مەزكۇر پىلان ئۇيغۇر ئېلىنىڭ ئېكولوگىيىلىك مۇھىتىنى ئېغىر بۇزغۇنچىلىققا ئۇچرىتىپ كەلگەن. (گۈلچېھرە)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت