Xitay ikkinchi chong néfit, tebi'iy gaz turubisi qurushqa 13 milyard 600 milyon dollar meblegh saldi


2007.10.25

Birleshme agéntliqining peyshenbe xongkongdin tarqatqan xewiridin melum bolushiche, xitaydiki eng chong néfit hem tebi'iy gaz guruhi bolghan xitay néfit, tebi'iy gaz hessidarliq cheklik shirkiti gherbiy shimalda yene ikkinchi chong néfit gaz turuba qurulushi yasash üchün 102 milyard yüen yeni 13 milyard 600 milyon dollar meblegh salghan.

Xitay néfit, tebi'iy gaz hessidarliq cheklik shirkiti bu meblegh arqiliq qurmaqchi bolghan 8 ming kilométirliq néfit, tebi'iy gaz yötkesh turubisi qurulushini kéler yil béshida bashlap -2010 yili tamamlashni pilanlighan bolup, nöwette hökümet terepning munasiwetlik testiqliri bu yil axiri pütüsh aldida iken.

Awghustning axiri mezkur néfit, tebi'iy gaz hessidarliq cheklik shirkitining bashliqi jyang jiéminning birleshme agéntliqi muxbirigha ashkarilishiche, mezkur néfit gaz turuba qurulushi ilgiri Uyghur élide qurulghan " gherbning gazini sherqqe yötkesh turuba qurulushi " din qalsa ikkinchi chong gaz turuba qurulushi bolup, asasliqi türkmenistandin xitaygha tebi'iy gaz yötkeshni meqset qilidiken.

Mezkur gaz turubisi türkmenistandin bashlinip özbékistan, qazaqistanlarni bésip ötkendin kéyin ürümchi arqiliq lenju, shi'en,shangxey axirida gu'angjughiche yétip baridiken. Uyghur éli nöwette xitaydiki eng chong néfit hem tebi'iy gaz bazisi bolup xitay hökümiti töt ming kilométirliq " gherbning gazini sherqqe yötkesh" gaz turubisi arqiliq Uyghur élining tebi'iy gazini shangxeyge yiligha 33milyard kup métirdin aqquzmaqta.

Xitay mushu sür'ette gaz yötkeshni dawam qilsa Uyghur élining tebi'iy gaz zapisi 20 nechche yilgha qalmay pütünley tügeydu.

Uyghur élidiki yerlik xelq mezkur gaz yötkesh pilanidin héchqandaq menpe'etke érishelmigendin narazi boluwatqandin bashqa, mezkur pilan Uyghur élining ékologiyilik muhitini éghir buzghunchiliqqa uchritip kelgen. (Gülchéhre)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.