Qeshqer 25- dékabir weqeside qolgha chüshken Uyghurlardin bir qisimi ölümge höküm qilindi

8 - Noyabir qeshqer wilayetlik ottura sot mehkimisi sot échip, xitay da'iriliri "25- dékabir dölet bixeterlikige ziyan sélish délosi"da qolgha chüshken Uyghurlardin abdu weli imin qararliq 6 neper Uyghurgha " döletni parchilash", " térrorluq teshkilat teshkillesh we rehberlik qilish", " qanunsiz bomba yasash" jinayetlirini artip ayrim- ayrim halda ölum we muddetsiz qamaq jazalirini bergen.

Shinxu'a agéntliqida bu heqte bérilgen xewerde: " abduweli imin qatarliq 6 neper eyibkar, döletni parchilash meqsitige yétish üchün, 2005- yili 8- aydin 2007- yili 1 ‏- ayghiche, diniy pa'aliyetler bilen aktip shughullan'ghan hemde ghazat terghibati élip barghan we térrorluq meshiq bazisi qurup islam xelipe döliti qurush üchün teyyarliq qilghan" dep körsitilgen.

Mezkur xewerde bildürüshiche, jazagha tartilghan bu 6 neper Uyghur, "sherqiy türkistan islam partiyisini teshkilligen we xitay armiyisi élip barghan ikki qétimliq axturup tutush manéwirigha qarshiliq körsetken hemde xewerlishish üskünlirige buzghunchiliq qilish, aptobus partlitish, kosrap yézisini igilep musteqilliq élan qilish qestide bolghan iken.

Bu nöwet xitayda jazagha tartilghanlar ichide, abduweli imin, muxter sétiwaldi, qurban mamut qatarliqlar ölümge buyrulghandin bashqa exmet raxman, imin méhman qatarliqlargha ölum jazasi bérilip ikki yil kéchiktürüp ijra qilish buyrulghan.